ဝၼ်းတီႈ 8/3/2020 မႃးၼႆႉ တပ်ႉသိုၵ်းမၢၼ်ႈ တပ်ႉၶလယ 9 မိူင်းၼွင် ပိုတ်ႇတၢင်းမိူင်းၼွင် – ၵေးသီး ပၼ်ၵူၼ်းမိူင်း ၵႂႃႇမႃးၶိုၼ်းယဝ်ႉ။
ၸၢႆးၸၢမ်ႇမိူင်း ၽူႈတႅၼ်းသၽႃး ၸႄႈမိူင်းၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းၵေးသီး လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝႃးၼႆႉ တီႈၵဵတ်ႉမိူင်းၼွင်ၼၼ်ႉ တႄႇပိုတ်ႇပၼ်ၵူၼ်းၵႂႃႇမႃးယဝ်ႉ။ ၵူၺ်းၵႃႈ ၶဝ်တိုၵ်ႉဢဝ်မႆႉႁႄႉဝႆႉသေ ၵူတ်ႇထတ်းၵူၼ်းၵႂႃႇမႃး ယူႇ” ဝႃႈၼႆ။
တပ်ႉၶလယ 9 ဢိုတ်းဝႆႉ လၢၼ်ႇ/ ၵဵတ်ႉတီႈမိူင်းၼွင် တင်ႈတႄႇ ဝၼ်းတီႈ 2/3/2020 တေႃႇထိုင် ဝၼ်းတီႈ 7/3/2020 ဢိုတ်း ဝႆႉ ႁိုင်ၶၢဝ်းတၢင်း 6 ဝၼ်း။ ၵူၼ်းမိူင်းၵႂႃႇမႃးႁႃၵိၼ်ယၢပ်ႇ။
“ တီႈလၢၼ်ႇမိူင်းၼွင်ၼၼ်ႉ မိူဝ်ႈၵူႈပွၵ်ႈတႄႉ ၶဝ်ဢမ်ႇၵူတ်ႇထတ်းၵူၼ်းမိူင်းၵႂႃႇမႃးၸိူင်ႉၼႆႉ ပေႃးပဵၼ်ၵႃး ဢွၼ်ႇ ၸိူဝ်းၼႆႉ တႄႉ ၵႂႃႇမႃးလႅဝ်ႈလွတ်းယူႇ ဢမ်ႇထဵတ်ႈဢမ်ႇထၢမ်သင်။ ပေႃးပဵၼ်ၵႃးတၢင်ႇၵုၼ်ႇ ၵႃးလူင်တႄႉ လူင်း ပၼ်သဵၼ်ႈမၢႆသေ ၵႂႃႇမႃးႁဵတ်းၼၼ်။ တေႃႈလဵဝ်ၼႆႉ ဢမ်ႇၸႂ်ႈၸိူင်ႉၼၼ် ၵႃးဢွၼ်ႇ ၵႃးလူင် ထဵတ်ႈထၢမ်မူတ်း” ၸၢႆးၸၢမ်ႇမိူင်းလၢတ်ႈ။
ၼႂ်းၶၢဝ်းတၢင်း 6 ဝၼ်း ဢၼ်တပ်ႉသိုၵ်းလူင်ပွင်ၸိုင်ႈမၢၼ်ႈ ဢိုတ်းဝႆႉၼႆႉ ပၼ်ၵူၼ်းမိူင်း လုၵ်ႉၵေးသီး ၵႂႃႇမိူင်းၼွင်။ ၵူၺ်းၵႃႈ ဢၼ်လုၵ်ႉတၢင်း မိူင်းၼွင် မႃးတၢင်းၵေးသီးတႄႉ ဢမ်ႇလႆႈ။
ၸၢႆးၸၢမ်ႇမိူင်း လၢတ်ႈဝႃႈ “ တေႃႈလဵဝ်တႄႉ ငဝ်းလၢႆးၵၢၼ်သိုၵ်း၊ ၵၢၼ်ၶဵင်ႈၶႅင်ၵၼ်ၵေႃႈ ယဵၼ်ၵႂႃႇယဝ်ႉ ၵူၼ်းပၢႆႈၽေးသိုၵ်း တီႈၵေးသီးၵေႃႈ ဢွၼ်ၵၼ်ပွၵ်ႈမိူဝ်းမူတ်းယဝ်ႉ။ သိုၵ်းမၢၼ်ႈဢၼ်မီးယူႇၸွမ်းလွႆတွၼ်းၸိူဝ်းၼၼ်ႉၵေႃႈ ၶဝ်ဢွၼ်ၵၼ် ထွၼ်ဢွၵ်ႇတင်းၼမ်ယဝ်ႉ။ ၵူၺ်းၵႃႈ တီႈတပ်ႉပၢင်သဝ်း ဢၼ်ၶဝ်လႆႈတီႈၼိူဝ်လွႆတွၼ်းၼၼ်ႉတႄႉ ဢမ်ႇထွၼ်” ဝႃႈၼႆ။
မိူဝ်ႈဝၼ်းတီႈ 2/3/2020 ယၢမ်းဝၢႆးဝၼ်း 1 မူင်းၼၼ်ႉ တပ်ႉသိုၵ်းလူင်ပွင်ၸိုင်ႈမၢၼ်ႈ တပ်ႉၶလယ 131 ၵေးသီး တင်း တပ်ႉ ၶလယ 9 မိူင်းၼွင် လႆႈဢိုတ်းသဵၼ်ႈတၢင်းမိူင်းၼွင် – ၵေးသီး။ ဝၼ်းၼၼ်ႉၵူၺ်းၼင်ႇၵဝ်ႇ ယၢမ်းႁူဝ်ၶမ်ႈ 5 မူင်း တီႈၵဵတ်ႉ ၶလယ 131 ၵေးသီးတႄႉ ပိုတ်ႇပၼ်ၵူၼ်းမိူင်းၵႂႃႇမႃးၶိုၼ်း။ ၵူၺ်းၵႃႈ တီႈမိူင်းၼွင်တႄႉ ဢမ်ႇပိုတ်ႇ ဝႃႈၼႆ။
သိုၵ်းလူင်ပွင်ၸိုင်ႈမၢၼ်ႈလၢတ်ႈဝႃႈ လူဝ်ႇၵႂၢတ်ႇလၢင်ႉၼႂ်းပိုၼ်ႉတီႈလႄႈ ထႅမ်ႁႅင်းသိုၵ်း ယွၼ်ႉၼၼ် ပေႃးပဵၼ်ပၢင်တိုၵ်း ၵၼ်ၼႆ ၵူဝ်တုမ်ႉတိူဝ်ႉၵူၼ်းမိူင်း ၵႂႃႇမႃး လႄႈၸင်ႇလႆႈပိၵ်ႉသဵၼ်ႈတၢင်း ဝႃႈၼႆ။
တပ်ႉသိုၵ်းလူင်ပွင်ၸိုင်ႈမၢၼ်ႈ ဢဵၼ်ႁႅင်း 4 တပ်ႉၵွင် ႁႅၼ်းသိုၵ်းၶိုၼ်ႈလေႃႇယိုဝ်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်း ၸိုင်ႈတႆး RCSS/SSA တီႈလွႆတွၼ်း ဢိူင်ႇႁၢမ်းငၢႆး ၸႄႈဝဵင်းမိူင်းၵိုင် မိူဝ်ႈဝၼ်းတီႈ 27/2/2020 ယၢမ်းၵၢင်ၼႂ်သေ သွင်ၾၢႆႇ လႆႈပဵၼ်ပၢင်တိုၵ်းၵၼ်ႁၢဝ်ႈႁႅင်း။ လိူဝ်ၼၼ်ႉ ၾၢႆႇသိုၵ်းလူင်ပွင်ၸိုင်ႈမၢၼ်ႈ ထႅမ်ႁႅင်းသိုၵ်း တီႈလွႆတွၼ်း တင်း လွႆႁူၼ်း ထႅင်ႈသေ ၵူၼ်းမိူင်း ၼပ်ႇႁူဝ်ပၢၵ်ႇ လႆႈဢွၼ်ၵၼ်ပၢႆႈယၢၼ်ႁိူၼ်းယေး မႃးသွၼ်ႈဝႆႉတီႈ ဢိူင်ႇႁၢမ်းငၢႆး တင်း ၸႄႈဝဵင်းၵေး သီး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ