TYN လူင်းပိုၼ်ႉတီႈ ပၼ်ပိုၼ်ႉႁူႉ ၵူၼ်းပၢႆႈၽေးသိုၵ်း တီႈႁၢမ်းငၢႆး ၵဵဝ်ႇလူၺ်ႈလွၵ်းလၢႆးငိူင်ႉဝႄႈ မၢၵ်ႇမႅင်းလႄႈ မၢၵ်ႇမိုဝ်ႉၸိုၼ်း ယၢမ်း။
ဝၼ်းတီႈ 5/3/2020 ယၢမ်းဝၢႆးဝၼ်း 2 မူင်း ထိုင် 3 မူင်း ယူႇတီႈၵေႃႁူမ်ႈသၢင်ႈၵူၼ်းၼုမ်ႇတႆး Tai Youth Network လူင်း ပိုၼ်ႉတီႈ ပၼ်ပိုၼ်ႉႁူႉ လွင်ႈမၢၵ်ႇမႅင်းလႄႈ မၢၵ်ႇမိုဝ်ႉၸိုၼ်းယၢမ်း တီႈဝတ်ႉလွႆၸွၵ်ႇ/ လွႆၸၢၵ်ႈ(ႁူဝ်လွႆ) ၼႂ်းဢိူင်ႇႁၢမ်းငၢႆး ၸႄႈဝဵင်းမိူင်းၵိုင် ၸိုင်ႈတႆးပွတ်းၸၢၼ်း။
ၸၢႆးၼေႃႇသႅင် ၽူႈႁဵတ်းၵၢၼ်လုမ်း TYN လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ လူင်းပိုၼ်ႉတီႈသေ ၵႂႃႇပၼ်ပိုၼ်ႉႁူႉ ပၼ် ၵူၼ်းပၢႆႈၽေးသိုၵ်း တီႈဝတ်ႉလွႆၸွၵ်ႇ/ လွႆၸၢၵ်ႈၶႃႈ။ ပၼ်တၢင်းႁူႉ ၵဵဝ်ႇၵပ်း လွၵ်းလၢႆးငိူင်ႉဝႄႈ မၢၵ်ႇမႅင်း တင်း မၢၵ်ႇ မိုဝ်ႉၸိုၼ်းယၢမ်း ၸိူဝ်းၼႆႉ။ မိူၼ်ၼင်ႇ မၢၵ်ႇမိုဝ်ႉၸိုၼ်းယၢမ်း ဢၼ်ၵိုတ်းဝႆႉ ၼႂ်းပၢင်တိုၵ်း ဢၼ်ပႆႇတႅၵ်ႈၸိူဝ်းၼႆႉ ။ ပေႃးပီႈၼွင်ႉႁဝ်း ၵႂႃႇၼႂ်းထိူၼ်ႇၼႂ်းၶိူဝ်း တေလႆႈၾၢင်ႉၸိူင်ႉႁိုဝ်၊ ပေႃး ႁၼ် ဢၼ်လၢၵ်ႇ ဢၼ်လၢႆးမၼ်း တေလႆႈႁဵတ်းၸိူင်ႉႁိုဝ် ၸဵမ်ၸိူဝ်းၼႆႉၶႃႈ” ဝႃႈၼႆ။
မိူဝ်ႈၵူႈပွၵ်ႈပူၼ်ႉမႃး ဝၢႆးလင်ပၢင်တိုၵ်းယဵၼ်ယဝ်ႉၵေႃႈ ၵူၼ်းဝၢၼ်ႈၵူၼ်းသူၼ်ယဵပ်ႇၺႃးမၢၵ်ႇသေလႆႈမၢတ်ႇၸဵပ်း လူႉတၢႆမီးမႃးတႃႇသေႇ။ ပၢင်ပၼ်ပိုၼ်ႉႁူႉ ၵဵဝ်ႇၵပ်းလူၺ်ႈ လွၵ်းလၢႆးငိူင်ႉဝႄႈ မၢၵ်ႇမႅင်းၾင်လိၼ်လႄႈ မၢၵ်ႇမိုဝ်ႉၸိုၼ်းယၢမ်းၼႆႉ ၼင်ႇႁိုဝ် ၵူၼ်းမိူင်း ၵူၼ်းပၢႆႈၽေး ပေႃးတေမေႃၾၢင်ႉသတိၵၼ် လွင်ႈၵႂႃႇမႃး ၸွမ်းၼႂ်းပိုၼ်ႉတီႈ ၸဵမ်ၸိူဝ်းၼႆႉ ဝႃႈၼႆ။
ယူႇတီႈ ၵေႃႁူမ်ႈသၢင်ႈၵူၼ်းၼုမ်ႇတႆး TYN ၼႆႉ လူင်းပိုၼ်ႉတီႈပၼ်ပိုၼ်ႉႁူႉ ၵဵဝ်ႇလူၺ်ႈ လွင်ႈမၢၵ်ႇမႅင်းလႄႈ မၢၵ်ႇမိုဝ်ႉ ၸိုၼ်းယၢမ်း ပၼ်ၵူၼ်းမိူင်း ၵူၼ်းပၢႆႈၽေးသိုၵ်းမႃး လၢႆလၢႆပွၵ်ႈယဝ်ႉ ဝႃႈၼႆ။
ဢိင်ၼိူဝ် သိုၵ်းလူင်ပွင်ၸိုင်ႈမၢၼ်ႈ ႁႅင်းသိုၵ်း 4 တပ်ႉၵွင် ၶိုၼ်ႈလေႃႇယိုဝ်း သိုၵ်းတႆး RCSS တီႈလွႆတွၼ်း ဢိူင်ႇႁၢမ်းငၢႆး ၸႄႈဝဵင်းမိူင်းၵိုင် ႁၢဝ်ႈႁႅင်း တႄႇဢဝ်မိူဝ်ႈဝၼ်းတီႈ 27/2/2020 ၼၼ်ႉသေ ၵူၼ်းဝၢၼ်ႈ ၸွမ်းတိၼ်လွႆတွၼ်း ဢွၼ်ၵၼ် ပၢႆႈၽေးသိုၵ်း ၵႂႃႇသွၼ်ႈဝႆႉဝတ်ႉလွႆၸၢၵ်ႈ၊ ဝတ်ႉၵွင်းမူးသၢႆးလႄႈ ဝတ်ႉၵုင်းၸူင် ၸဵမ်ၸိူဝ်းၼႆႉ။ လိူဝ်ၼၼ်ႉ တၢင်းပွတ်း ၸႄႈဝဵင်းၵေးသီးၵေႃႈ ဢွၼ်ၵၼ်ပၢႆႈၵႂႃႇထႅင်ႈ။ ဝၼ်းမိူဝ်ႈၼႆႉတႄႉ ဢွၼ်ၵၼ်ပွၵ်ႈမိူဝ်းၶိုၼ်းဝၢၼ်ႈၽႂ်မၼ်းၽွင်ႈယဝ်ႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ