ၵူၼ်းၵႂႃႇႁဵတ်းၵၢၼ်မိူင်းၶႄႇ ဢမ်ႇယူႇလီသေပွၵ်ႈႁိူၼ်းၶိုၼ်း ၵေႃႉၼိုင်ႈ လူႉတၢႆပႅတ်ႈတီႈႁူင်းယႃ လႃႈသဵဝ်ႈ။
ဝၼ်းတီႈ 5/3/2020 ယၢမ်းၵၢင်ၶမ်ႈ မွၵ်ႈ 8 မူင်းၶိုင်ႈ ၵူၼ်းၵႂႃႇႁဵတ်းၵၢၼ်တၢင်းမိူင်းၶႄႇၵေႃႉၼိုင်ႈ လုၵ်ႉတၢင်းလႅၼ်လိၼ် တႆး – ၶႄႇ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇသေ ၶီႇရူတ်ႉတူႈ (မၢၼ်ႇလူင်ႇ) ပွၵ်ႈႁိူၼ်းၶိုၼ်း။ ၽွင်း ထိုင်တီႈဝဵင်းလႃႈသဵဝ်ႈမၼ်းၸၢႆးဢမ်ႇယူႇလီႁႅင်းလႄႈ ၸဝ်ႈရူတ်ႉၵႃးၵပ်းၾူၼ်းႁႃၸုမ်းၸွႆႈထႅမ်မႃးဢဝ်တူဝ်မၼ်းၸၢႆးၵႂႃႇႁူင်းယႃလႃႈသဵဝ်ႈ လူႉတၢႆပႅတ်ႈၵၢင်တၢင်း။
ၵူဝ်ႇမိၼ်ႉၸေႃႇ ၸုမ်းၸွႆႈထႅမ် ၸေႇတၼႃႇသိၼ်ႇ(သွေး) လႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းပဵၼ်ၼၼ်ႉ ၶီႇၵႃး မၢၼ်ႇလူင်ႇ လုၵ်ႉတၢင်းမူႇၸေႊမႃး။ ၸဝ်ႈၵႃးထူဝ်းႁွင်ႉသေ ၸုမ်းႁဝ်းၶႃႈ ဢွၼ်ၵၼ်ၵႂႃႇႁပ်ႉ။ ၽိူဝ်ႇဢဝ်တူဝ်ၵူၼ်းပဵၼ် ၼၼ်ႉမႃးထိုင်တီႈႁူင်းယႃၵေႃႈ လႆႈလူႉသဵင်ႈၵႂႃႇယဝ်ႉ၊ မၼ်းၸၢႆးဢႆ ႁၢၵ်ႈဢွၵ်ႇလိူတ်ႈပႃး”ဝႃႈၼႆ။
ၵေႃႉဢၼ်ၵႂႃႇႁဵတ်းၵၢၼ်မိူင်းၶႄႇသေပွၵ်ႈမႃးတၢႆတီႈလႃႈသဵဝ်ႈၼၼ်ႉ ပဵၼ်ၵူၼ်းၸႃႇတိ တၢင်းၸႄႈမိူင်းရၶႅင်ႇ။ မၼ်းၸၢႆးၵႂႃႇ ႁဵတ်းၵၢၼ်တၢင်းမိူင်းၶႄႇ တိုၵ်ႉလႆႈလိူၼ်ပၢႆၵူၺ်းလႄႈ ဢဝ်ဢမ်ႇယူႇလီပႅတ်ႈ ဝႃႈၼႆ။
ၵူဝ်ႇမိၼ်ႉၸေႃႇ လၢတ်ႈဝႃႈ “ လႆႈႁူႉဝႃႈမၼ်းဢႆ ႁိုင်ၼႃႇယဝ်ႉ။မၼ်းတၢႆယွၼ်ႉၶူဝ်ႊရူဝ်ႊၼႃႊႁႃႉ ဢမ်ႇၸႂ်ႈႁႃႉဢၼ်ဝႃႈၼၼ်ႉတႄႉ တိုၵ်ႉပႂ်ႉထွမ်ႇတီႈမေႃယႃၶဝ်ၵူတ်ႇထတ်းတူၺ်းယူႇ” ဝႃႈၼႆ။
ၵူၼ်းၶီႇမႃးၸွမ်းၼႂ်းၵႃးမၢၼ်ႇလူင်ႇၸိူဝ်းၼၼ်ႉတႄႉ ယၢမ်းလဵဝ် ပၢႆးယူႇလီၶႅမ်ႉၵၼ်ယူႇသေတႃႉၾၢႆႇပၢႆးယူႇလီတိုၵ်းသူၼ်းႁႂ်ႈၶဝ်ၵႂႃႇၵူတ်ႇထတ်းတူၺ်းလီလီယူႇ။ လႆႈၵဵပ်းဝႆႉတီႈယူႇတၼ်းသဝ်းၶဝ်ၵူႈၵေႃႉယူႇ – ဝႃႈၼႆ။
ၵဵဝ်ႇလူၺ်ႈလွင်ႈၼႆႉ ယူႇတီႈၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇ ၵူၼ်းႁေႃႈရူတ်ႉၵႃးၼၼ်ႉၵေႃႈ တေႃႇထိုင်ယၢမ်းလဵဝ် ပႆႇၵပ်းသိုပ်ႇ လႆႈ ။
တီႈႁူင်းယႃ ဝဵင်းလိူဝ်ႇၼၼ်ႉၵေႃႈ ၵူၼ်းပဵၼ်ဢၼ်ထၢင်ႇထိူမ်ဝႃႈပဵၼ်ၶူဝ်ႊရူဝ်ႊၼႃႊ ၵေႃႉၼိုင်ႈ လႆႈလူႉတၢႆၵႂႃႇတီႈႁူင်းယႃမိူဝ်ႈဝၼ်းတီႈ 5/3/2020 ယၢမ်းဝၢႆးဝၼ်း။ မၼ်းၼၢင်းၼႆႉဢႃယု 60 ပၢႆယဝ်ႉ ပဵၼ်ၵူၼ်းဝဵင်းလိူဝ်ႇၵူၺ်း ။ ၶဝ်ႈႁူင်းယႃမိူဝ်ႈဝၼ်းတီႈ 4/3/2020 လူၺ်ႈတၢင်းပဵၼ်ဢႆ ထူၺ်ႈၸႂ်ၵပ်ႉ။ ၽွင်းတိုၵ်ႉသူင်ႇၵူတ်ႇထတ်းတၢင်းပဵၼ်ဝႆႉ ယင်းပႆႇလႆႈႁူႉၶေႃႈတွပ်ႇ မၼ်းၼၢင်းလႆႈတၢႆၵႂႃႇပႅတ်ႈ။ ၾၢႆႇပၢႆးယူႇလီတိူင်း မၼ်းတလေးတႄႉပိုၼ်ၽၢဝ်ႇဝႃႈ မၼ်းၼၢင်းမီးတၢင်းပဵၼ် လိူတ်ႈၶိုၼ်ႈ၊ ႁူဝ်ၸႂ် ၊ယဵဝ်ႈဝၢၼ် တၢင်းပဵၼ်ၵူၼ်းထဝ်ႈၸိူဝ်းၼႆႉပႃး ဝႃႈၼႆ။
တေႃႈလဵဝ် ၵူၼ်းမိူင်းၸပ်းတၢင်းပဵၼ်ၸိူဝ်ႉမႅင်းၶူဝ်ႊရူဝ်ႊၼႃႊ တင်းလုမ်ႈၾႃႉၼႆႉ မီးၵႂႃႇ 97,985 ၵေႃႉ၊ တၢႆ 3,383 ၵေႃႉ၊ ၶႅၼ်းၶိုၼ်း 55,189 ၵေႃႉ ယူႇတီႈသိုဝ်ႇၶၢဝ်ႇ South China Moring Post ဢွၵ်ႇဝႆႉ။
ၾၢႆႇပၢႆးယူႇလီမိူင်းၶႄႇၵေႃႈပိုၼ်ၽၢဝ်ႇမိူဝ်ႈဝၼ်းတီႈ 5/3/2020 ဝႃႈ ၸွမ်းၼင်ႇလႆႈၵူတ်ႇထတ်းၽႃႇတတ်းတူၺ်းၵူၼ်းတၢႆယွၼ်ႉတၢင်းပဵၼ်ၶူဝ်ႊရူဝ်ႊၼႃႊသေ လႆႈႁူႉဝႃႈ ၸိူဝ်ႉမႅင်းၼႆႉ မၼ်းၵိၼ်ပွတ်ႇ၊ ယႃႉမၢမ်ႉ၊ ၵိၼ်ႁူဝ်ၸႂ်ၵူၼ်းပေႃးလူႉလႅဝ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ