သိုၵ်းလူင်ပွင်ၸိုင်ႈမၢၼ်ႈ ၵူတ်ႇထတ်းၵူၼ်းဢွၵ်ႇတႃႈပႆတၢင်း ၼႂ်းၵႄႈလႃႈသဵဝ်ႈ – သီႇပေႃႉ ႁၢဝ်ႈႁႅင်း။
မိူဝ်ႈၼႆႉ ဝၼ်းတီႈ 6/3/2020 ယူႇတီႈသိုၵ်းလူင်ပွင်ၸိုင်ႈမၢၼ်ႈ ၵူတ်ႇထတ်းၵူၼ်းဢွၵ်ႇတႃႈပႆတၢင်း ႁၢဝ်ႈႁႅင်း တီႈႁိမ်း တႃႈရူတ်ႉ ၼႃးမၢၵ်ႇၶေႃ ၼိူဝ်သဵၼ်ႈတၢင်း လႃႈသဵဝ်ႈ – သီႇပေႃႉ ၼႂ်းၸႄႈဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ။
ၸၢႆးႁၢၼ် ႁူဝ်ၼႃႈၸုမ်းၵူၼ်းၼုမ်ႇတႆး TYO ၸိုင်ႈတႆးပွတ်းႁွင်ႇ လၢတ်ႈတီႈၽူႈတွႆႇႁွၵ်ႈဝႃႈ “ၸႂ်ႈၶႃႈဢေႃႈ ၶဝ်ပႂ်ႉၵူတ်ႇ ထတ်း တီႈတၢင်းဢွၵ်ႇၵႂႃႇသီႇပေႃႉ တီႈဝၢင်းၵႃးၼႃးမၢၵ်ႇၶေႃ လႃႈသဵဝ်ႈၼႆႉ။ တီႈၼၼ်ႈ မိူဝ်ႈၵူႈပွၵ်ႈၵေႃႈၶဝ်ၵူတ်ႇယူႇ ၵူၺ်း ၵႃႈ မၼ်းဢမ်ႇပႃးသိုၵ်းမၢၼ်ႈ ပဵၼ်ပလိၵ်ႈလၢႆလၢႆၵူၺ်း။ ၵမ်းၼႆႉ ပဵၼ်သိုၵ်းမၢၼ်ႈလၢႆလၢႆၶႃႈယဝ်ႉ ဢၼ်ၵူတ်ႇထတ်းၼႆႉ” ဝႃႈၼႆ။
သိုပ်ႇလၢတ်ႈဝႃႈ “ ဢၼ်ၶဝ်ၵူတ်ႇထတ်းၼၼ်ႉ ၵႃးဢၼ်လုၵ်ႉတၢင်းၼွၵ်ႈ တေၶဝ်ႈလႃႈသဵဝ်ႈၸိူဝ်းၼႆႉ ၶဝ်ႁႄႉၵိုတ်းမူတ်း သေ ၵူတ်ႇၼႂ်းၵႃးဢေႃႈ။ ၶဝ်ၵူဝ်ပိူၼ်ႈပႃးၵွင်ႈၵၢင်ႇၶႃႈယူဝ်ႉ။ ၵူၺ်းၵႃႈ ဢၼ်လုၵ်ႉတၢင်းလႃႈသဵဝ်ႈ ဢွၵ်ႇၵႂႃႇသမ်ႉ ဢမ်ႇပေႃး ၵူတ်ႇ” ဝႃႈၼႆ။
ဢိင်ၼိူဝ်လွင်ႈၼႆႉသေ ၵူၼ်းဢွၵ်ႇတႃႈပႆတၢင်း ၼႂ်းပွတ်းတွၼ်ႈၼၼ်ႉ သိုၵ်းလူင်ပွင်ၸိုင်ႈမၢၼ်ႈ ၵူတ်ႇထတ်း ၸွမ်း တူဝ် ၸွမ်းထွင်းသိူဝ်ႈၶူဝ်း ပေႃးပဵၼ်ၵူၼ်းၸၢႆးၼႆ ႁွင်ႉလူင်းၵႃးသေ ၵူတ်ႇထတ်းႁၢဝ်ႈႁႅင်း ဝႃႈၼႆ။
ၵူၼ်းဢွၵ်ႇတႃႈပႆတၢင်း ၽူႈႁၼ်တႂ်ႈၼႃႈတႂ်ႈတႃ လၢတ်ႈဝႃႈ “ မိူဝ်ႈမႃးၸွမ်းတၢင်းၼႆႉ သိုၵ်းမၢၼ်ႈၶဝ် ၵူတ်ႇၸႅတ်ႈၵူၼ်းၸၢႆး တႆးႁဝ်းၶႃႈ ႁွင်ႉလူင်းၵႃးမူတ်းမူတ်းသေ ၵူတ်ႇတူၺ်းၸူၵ်းတူၺ်း ၸွမ်းထူင်ၸွမ်းထွင်းသိူဝ်ႈ၊ ၵူၼ်ၸိူဝ်းၼႆႉ။ လိူဝ်ၼၼ်ႉ ၼႂ်းၾူၼ်း ၸိူဝ်းၼႆႉ ၵူတ်ႇထတ်းတူၺ်းမူတ်း ။ ၵွပ်ႈၼႆပေႃးတေမႃးတၢင်းသဵၼ်ႈၼႆႉ ႁႂ်ႈၾၢင်ႉၼႂ်းၾူၼ်း ၸဝ်ႈၵဝ်ႇမီးသင် ၵေႃႈဢဝ်ဢွၵ်ႇဝႆႉသေၵွၼ်ႇ တေၸၢင်ႈလွတ်ႈၽေး” ဝႃႈၼႆ။
မိူဝ်ႈဝၼ်းတီႈ 27/2/2020 ၼၼ်ႉ ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ ႁႅင်းသိုၵ်း 4 တပ်ႉၵွင် ၶိုၼ်ႈလေႃႇယိုဝ်း ၶွင်ႇသီႇ ဢဝ်ၶိုၼ်းၸိုင်ႈတႆး/ တပ်ႉ သိုၵ်း ၸိုင်ႈတႆး RCSS/SSA တီႈလွႆတွၼ်း ဢိူင်ႇႁၢမ်းငၢႆး ႁၢဝ်ႈႁႅင်းသေဢမ်ႇၵႃး ၶိုၼ်ႈယိုဝ်း ထႅင်ႈတီႈလွႆႁူၼ်း။ ဢိင်ၼိူဝ် လွင်ႈပဵၼ်ပၢင်တိုၵ်းၵၼ် တၢင်းပွတ်းၸႄႈဝဵင်းမိူင်းၵိုင် ၸိုင်ႈတႆးပွတ်းၸၢၼ်းၼႆႉသေ ၵူၼ်း မိူင်း ၼႂ်းဢိူင်ႇႁၢမ်းငၢႆး ဢွၼ်ၵၼ်ပၢႆႈၽေးသိုၵ်း ၼပ်ႉႁူဝ်ပၢၵ်ႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ