သိုၵ်းလူင်ပွင်ၸိုင်ႈမၢၼ်ႈတင်း RCSS လႆႈပဵၼ်ပၢင်တိုၵ်းၵၼ် တီႈလွႆတွၼ်း မွၵ်ႈ 20 ပွၵ်ႈ ၼႂ်းၶၢဝ်းတၢင်း 4 ဝၼ်း ယၢမ်း လဵဝ် ၾၢႆႇသိုၵ်းလူင်ပွင်ၸိုင်ႈတိုၵ်ႉသိုပ်ႇထႅမ်ႁႅင်းသိုၵ်းယူႇတိၵ်းတိၵ်း။
တႄႇဢဝ် ဝၼ်းတီႈ 27/2/2020 ထိုင် 1/3/2020 မႃးၼႆႉ ၶၢဝ်းတၢင်း 4 ဝၼ်း သိုၵ်းလူင်ပွင်ၸိုင်ႈမၢၼ်ႈ တင်း ၶွင်ႇသီႇဢဝ် ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA လႆႈပဵၼ်ပၢင်တိုၵ်းၵၼ်မႃး တင်းမူတ်း 18 ပွၵ်ႈ တၢင်းပွတ်းလွႆတွၼ်း ဢိူင်ႇႁၢမ်းငၢႆး ၸႄႈဝဵင်းမိူင်းၵိုင် ၸိုင်ႈတႆးပွတ်းၸၢၼ်း။
ၸဝ်ႈႁၢၼ် ၶမ်းၸၢမ်ႇ ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းၶၢဝ်းတၢင်း 4 ဝၼ်းမႃးၼႆႉ ဢၼ် RCSS ႁဝ်း ၶႃႈ တင်း သိုၵ်းမၢၼ်ႈ လႆႈပဵၼ်ပၢင်တိုၵ်းၵၼ်မႃးၼႆႉ တင်းမူတ်း 18 ပွၵ်ႈ။ ဢၼ်ယွႆႈယႅမ်းမၼ်းၵေႃႈမီးၵူၺ်းၵႃႈ ပဵၼ်လၢႆ ပွၵ်ႈဢၼ်ဝႃႈ ၼၼ်ႉပႆႇႁူႉ။ လွင်ႈၾၢႆႇႁဝ်းၶႃႈ ၵူၼ်းလူႉတၢႆတႄႉ ဢမ်ႇမီး။ လွင်ႈမၢတ်ႇၸဵပ်းဢိတ်းဢွတ်းတႄႉ မီးယူႇ။ ဢမ်ႇ ထိုင် တီႈလႆႈမႆႈၸႂ်” ဝႃႈၼႆ။
လိူဝ်ၼၼ်ႉ ယူႇတီႈၾၢႆႇသိုၵ်းတႆး RCSS လႆႈပႃးၵွင်ႈၵၢင်ႇထႅင်ႈ တီႈတပ်ႉသိုၵ်းလူင်ပွင်ၸိုင်ႈမၢၼ်ႈ တီႈပၢင်တိုၵ်းလွႆတွၼ်း ဝႃႈၼႆ။
ၸဝ်ႈႁၢၼ် ၶမ်းၸၢမ်ႇ လၢတ်ႈဝႃႈ “ တၢင်းႁဝ်းၶႃႈတႄႉ လႆႈၵွင်ႈၵၢင်ႇတၢင်းသိုၵ်းမၢၼ်ႈၶဝ်ထႅင်ႈ 10 လဝ်း၊ ပဵၼ်ၵွင်ႈသႅၼ်း MA ၵမ်ႈၼမ်။ ၾၢႆႇၶဝ်ၵေႃႈမီး လွင်ႈၵူၼ်းမၢတ်ႇၸဵပ်းလူႉတၢႆယူႇ။ ၵူၺ်းၵႃႈ ႁဝ်းၶႃႈ ဢမ်ႇလႆႈႁူႉၸွမ်းသဵၼ်ႈသၢႆမၢႆၶဝ်။ ယၢမ်းလဵဝ်ၼႆႉ ပၢင်တိုၵ်းယဵၼ်ယဝ်ႉ၊ လွင်ႈၶဵင်ႈၶႅင်ၵေႃႈ လူတ်းယွမ်းဢိတ်းၼိုင်ႈယဝ်ႉ ဝႃႈၼႆသေတႃႉ တၢင်းၾၢႆႇသိုၵ်း မၢၼ်ႈၶဝ် တိုၵ်ႉသွၵ်ႈတဝ်ႁဝ်းၶႃႈယူႇ။ ႁႅင်းၵူၼ်းၶဝ်တႄႉ ပႆႇလူတ်းယွမ်း ” ဝႃႈၼႆ။
လိူဝ်ၼၼ်ႉ တႄႇဢဝ် ဝၼ်းတီႈ 1/3/2020 ၼႆႉမႃး ယူႇတီႈ ၾၢႆႇ RCSS တင်း သိုၵ်းလူင်ပွင်ၸိုင်ႈမၢၼ်ႈ ဢုပ်ႇဢူဝ်းငူပ်ႉငီႉ ၵၼ်သေ သွင်ၾၢႆႇ လႆႈငိူင်ႉဝႄႈပၼ်ၵၼ် တၢင်းပွတ်းလွႆတွၼ်းတႄႉ ပၢင်တိုၵ်းလႆႈယဵၼ်လူင်းၵမ်ႈၼမ်ယဝ်ႉ။ လွင်ႈၶဵင်ႈ ၶႅင်ၵၢၼ်သိုၵ်းၵေႃႈ လူတ်းယွမ်းလူင်းၵမ်ႈၽွင်ႈယဝ်ႉ ဝႃႈၼႆ။
“လွင်ႈဝႃႈ သိုၵ်းမၢၼ်ႈ ထွႆယဝ်ႉၼႆၼၼ်ႉ ၶဝ်ဢမ်ႇထွႆ ၶဝ်လူတ်းယွမ်းလွင်ႈၵၢၼ်ၶဵင်ႈၶႅင်ၵၢၼ်သိုၵ်းၵူၺ်း။ ဢၼ်ၶဝ်ထွႆမႃး ၼၼ်ႉ မႃးသွၵ်ႈတဝ်ၸွမ်းႁိူၼ်းယေး ၵူၼ်းဝၢၼ်ႈ ဢၼ်မီးၸွမ်းတိၼ်လွႆတွၼ်း ၾၢႆႇတူၵ်းလွႆ ၸိူဝ်းၼႆႉ။ ယင်းပၢႆပိၵ်ႉ သဵၼ်ႈတႃႈသၢႆတၢင်းၸိူဝ်းၼႆႉထႅင်ႈလူးၵွၼ်ႇ” ၵူၼ်းပိုၼ်ႉတီႈ ပွတ်းႁၢမ်းငၢႆး လၢတ်ႈၼႄၼင်ႇၼႆ။
မိူဝ်ႈဝၼ်းတီႈ 27/2/2020 ယၢမ်းၵၢင်ၼႂ်ၼၼ်ႉ ယူႇတီႈၾၢႆႇသိုၵ်းလူင်ပွင်ၸိုင်ႈမၢၼ်ႈ ႁႅင်းသိုၵ်း 4 တပ်ႉၵွင် ၶိုၼ်ႈလေႃႇ ယိုဝ်းတပ်ႉပၢင်သဝ်း RCSS တီႈလွႆတွၼ်း ဢိူင်ႇႁၢမ်းငၢႆး ၸႄႈဝဵင်းမိူင်းၵိုင်မႃး ဝႃႈၼႆ။
ၶွင်ႇသီႇ ဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ၼႆႉ ပဵၼ်ၸုမ်းဢၼ်လူင်းလၢႆးမိုဝ်း ၵိုတ်းတိုၵ်းပတ်းပိုၼ် တူဝ်ႈမိူင်း NCA ၸုမ်းၼိုင်ႈသေ ဢမ်ႇၵႃး ၸွမ်သိုၵ်းလူင် ယွတ်ႈသိုၵ်း ၽူႈၼမ်း RCSS ၵေႃႈ ႁပ်ႉတၼ်းႁဵင်း ပဵၼ်ႁူဝ်ပဝ်ႈ ၸူဝ်ႈၶၢဝ်း ၼႂ်းၸုမ်း PPST ထႅင်ႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ