ဝူဝ်းၵူၼ်းဝၢၼ်ႈ 15 တူဝ် ၵိၼ်ၺႃးၾုၼ်ႇထၢတ်ႈသေ တၢႆထင်တီႈတင်းမူတ်း ၼႂ်းၸႄႈဝဵင်းသီႇသႅင်ႇ။
မိူဝ်ႈဝၼ်းတီႈ 2/3/2020 ၼၼ်ႉ တီႈဝၢၼ်ႈၵွင်းၵေး ဢိူင်ႇလွႆပုတ်း ၸႄႈဝဵင်းသီႇသႅင် ၸိုင်ႈတႆးပွတ်းၸၢၼ်း။ ဝူဝ်းၵူၼ်း ဝၢၼ်ႈ 15 တူဝ် ၵိၼ်ၺႃးၾုၼ်ႇထၢတ်ႈ(မေႇဢေႃးၸႃႇ) သေ လႆႈလူမ်ႉတၢႆထင်တီႈ တင်းမူတ်း။
လုင်းပႃႉသူၺ်ႇ ၸဝ်ႈၶွင်ဝူဝ်း လၢတ်ႈဝႃႈ “ ၶႃႈလႆႈႁၼ်ဝူဝ်းၶႃႈ လႆႈတုၵ်ႉၶၢၼ်ၸႂ် ၽွင်းတေတၢႆၼၼ်ႉ ၶႃႈပဵၼ်ၸႂ်ဢမ်ႇ လီၸွမ်းတႄႉတႄႉ ပဵၼ်ၽူႈလႂ် ၽႂ်မႃး ဢွႆႇၾုၼ်ႇထၢတ်ႈဝူဝ်းၶႃႈ ႁဵတ်းလႆႈပဵၼ် တၢၼ်ႇၼႆႉ” ဝႃႈၼႆ။
ပိူင်ပဵၼ်ၼႆႉ မိူဝ်ႈယၢမ်းၼႃႈမိူင်းၸမ်လႅင်း၊ မီးၵူၼ်းလၵ်ႉ ဢဝ်ၾုၼ်ႇထၢတ်ႈမႃးသႂ်ႇၼႂ်းဢၢင်ႇႁၢင်းဝူဝ်း တီႈႁိူၼ်း လုင်း ပႃႉသူၺ်ႇ။ ၽိူဝ်ႇၸဝ်ႈႁိူၼ်း မႃးႁၼ်ဝူဝ်းပေႃးလူမ်ႉၼွၼ်းသေ တဵၼ်ႈၽႅဝ်ဢဝ်ၸႂ်ယူႇယဝ်ႉ။
ယူႇတီႈ လုင်းပႃႉသူၺ်ႇ ၼႅတ်ႈၵႂႃႇႁွင်ႉမေႃယႃသတ်းမႃးထတ်းတူၺ်း၊ ၽိူဝ်ႇ မေႃယႃမႃးၽႅဝ်ၵေႃႈ ဝူဝ်းပေႃးတၢႆမူတ်း ယဝ်ႉ ဝႃႈၼႆ။
ၵူဝ်ႇတႅတ်ႉၼွင်ႇ မေႃယႃသတ်း လၢတ်ႈဝႃႈ “ ၽွင်းယၢမ်းၵႂႃႇထိုင်ၼၼ်ႉ ဝူဝ်း 15 တူဝ် ပေႃးလႆႈတၢႆၵႂႃႇယဝ်ႉ။ ၸွမ်းၼင်ႇ ယၢမ်ႈယူတ်းယႃမႃးတႄႉ ဝူဝ်းလုင်းပႃႉသူၺ်ႇတၢႆၼႆႉ ဢမ်ႇၸႂ်ႈ ပဵၼ်ရေႃးၵႃႇတၢင်းပဵၼ်သင်” ဝႃႈ ၼႆ။
ယူႇတီႈၽူႈမီးပုၼ်ႈၽွၼ်း လႆႈၵူတ်ႇထတ်းတူၺ်းသေ လႆႈႁူႉဝႃႈ ၼႂ်းဢၢင်ႇႁၢင်းဝူဝ်းၼၼ်ႉ မီးၾုၼ်ႇထၢတ်ႈ (ပုလဲကွန် ပေါင်းဓါတ်မြေဩဇာ)၊ ၶိုၼ်းသိုပ်ႇထတ်းတူၺ်းထႅင်ႈ ၼႂ်းၼမ်ႉၵိၼ် ၸဝ်ႈႁိူၼ်းၵေႃႈ လႆႈထူပ်း ႁၼ်ထႅင်ႈ မိူၼ်ၵၼ် ဝႃႈ ၼႆ။
ၵဵဝ်ႇလူၺ်ႈလွင်ႈဝူဝ်းလႆႈလူႉတၢႆၼႆႉသေ လုင်းပႃႉသူၺ်ႇ ဢမ်ႇပႆႇလႆႈတၢင်ႇထိုင်ႁူင်းပလိၵ်ႈသေတႃႉ လႆႈတၢင်ႇဝႆႉ တီႈ ပူႇၵၢင်ႉဝၢၼ်ႈ ႁႂ်ႈၸွပ်ႇပၼ် ၵေႃႉဢၼ်ဢဝ်ၾုၼ်ႇထၢတ်ႈမႃးပွႆႇသႂ်ႇဝူဝ်းလႄႈၸဝ်ႈႁိူၼ်းယူႇ ဝႃႈၼႆ။
