တပ်ႉသိုၵ်းလူင်ပွင်ၸိုင်ႈမၢၼ်ႈ တိုၵ်ႉသိုပ်ႇဢိုတ်းသဵၼ်ႈတၢင်း မိူင်းၼွင် – ၵေးသီး ၵူၼ်းမိူင်း ႁူပ်ႉလွင်ႈယၢပ်ႇၽိုတ်ႇတႃႇ ၵႂႃႇမႃး။

တႄႇဢဝ် မိူဝ်ႈဝၼ်းတီႈ 2/3/2020 ယၢမ်းဝၢႆးဝၼ်း တေႃႇထိုင်မိူဝ်ႈၼႆႉ ဝၼ်းတီႈ 3/3/2020 တပ်ႉသိုၵ်းလူင်ပွင်ၸိုင်ႈ တပ်ႉ ၶလယ 9 မိူင်းၼွင် ဢိုတ်းသဵၼ်ႈတၢင်း ၼႂ်းၵႄႈ မိူင်းၼွင် – ၵေးသီး ၸိုင်ႈတႆးပွတ်းၸၢၼ်း တေႃႇထိုင်ယၢမ်းလဵဝ် ပႆႇပိုတ်ႇ ပၼ်ၵႂႃႇမႃး ၶိုၼ်းလီလီ။

ၸၢႆးၸၢမ်ႇမိူင်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းၵေးသီး လၢတ်ႈတီႈၽူႈတွႆႇႁွၵ်ႈဝႃႈ “ တီႈၵေးသီး ႁဝ်းၶႃႈ ၶဝ်ပိုတ်ႇပၼ်ၶိုၼ်းမိူဝ်ႈဝႃး ၵႂႃႇမႃးလႆႈၶိုၼ်းယဝ်ႉ။ တီႈမိူင်းၼွင်ၼၼ်ႉၵူၺ်းၶႃႈ ပႆႇပိုတ်ႇပၼ်။ ပေႃးလုၵ်ႉ တၢင်းၵေး သီးၵႂႃႇမိူင်းၼွင်သမ်ႉလႆႈယူႇ။ ပေႃးလုၵ်ႉတၢင်းမိူင်းၼွင် တေၶဝ်ႈမႃးတၢင်းၵေးသီးသမ်ႉ ဢမ်ႇလႆႈ။ ၶဝ်ဝႃႈတႄႉ တေၵႂၢတ်ႇ လၢင်ႉၼႂ်းပိုၼ်ႉတီႈၼႂ်းၵႄႈၸိူဝ်းၼႆႉ ယဝ်ႉၵေႃႈ ထႅမ်ႁႅင်းသိုၵ်း” ဝႃႈၼႆ။

သဵၼ်ႈတၢင်းၼႆႉ ပဵၼ်သဵၼ်ႈတၢင်းသၢႆၵၢင်မိူင်းတႆး လုၵ်ႉတၢင်းပွတ်းၸၢၼ်း ၶိုၼ်ႈၸူးပွတ်းႁွင်ႇ။ လုၵ်ႉတၢင်းပွတ်းႁွင်ႇ လူင်းၸူးပွတ်းၸၢၼ်း ၵူၼ်းမိူင်းတေႃႉသူင်ႇၵႃႉၶၢႆသၢႆတၢင်းၼႆႉၵၼ်ၼမ်။

ၸၢႆးၸၢမ်ႇမိူင်း သိုပ်ႇလၢတ်ႈဝႃႈ “ ပေႃးမီးပၢင်တိုၵ်း ၵူဝ်မၢၵ်ႇၵွင်ႈတုမ်ႉတိူဝ်ႉၵူၼ်းမိူင်း ၸိူဝ်းဢွၵ်ႇတႃႈပႆတၢင်းၼႆဝႃႇ။ ဢၼ် ၶဝ် ဢိုတ်းတၢင်းၼႆႉ ၵူၺ်းပေႃးတုမ်ႉတိူဝ်ႉၵူၼ်းမိူင်းၵႂႃႇတႃႈပႆတၢင်းၼႃႇယဝ်ႉ။ ႁဵတ်းႁႂ်ႈၵူၼ်းမိူင်းႁူပ်ႉလွင်ႈ ယၢပ်ႇၽိုတ်ႇ။ ၸိူဝ်းဢၼ်မႃးၶမ်သေ ႁူၼ်ပွၵ်ႈၶိုၼ်းၵေႃႈ မီးၼမ်ၼႃႇၶႃႈယဝ်ႉ မိူဝ်ႈဝႃးတင်းမိူဝ်ႈၼႆႉ” ဝႃႈၼႆ။

တေႃႈလဵဝ်ၼႆႉ သိုၵ်းလူင်ပွင်ၸိုင်ႈမၢၼ်ႈ တိုၵ်ႉသိုပ်ႇထႅမ်ႁႅင်းသိုၵ်း ၶိုၼ်ႈၸူးတပ်ႉပၢင်သဝ်း RCSS ၼႂ်းၵႄႈမိူင်းၼွင် – ၵေး သီး ယူႇတိၵ်းတိၵ်း ဝႃႈၼႆ။

“ပေႃးမႃးၼပ်ႉသွၼ်ႇတူၺ်းၸိုင် ၼႂ်းၵႄႈသဵၼ်ႈတၢင်း မိူင်းၼွင် – ၵေးသီးၼႆႉ သိုၵ်းမၢၼ်ႈၶဝ် ထႅမ်ႁႅင်းသိုၵ်းၼႆႉ ၼမ် လိူဝ် မႃးႁၢဝ်ႈႁႅင်း ပၢင်တိုၵ်းတႄႉ လႅပ်ႈတေပဵၼ်ၵၼ်ထႅင်ႈယူႇ ႁဝ်းၶႃႈၵူၼ်းမိူင်းတႄႉ ႁၼ်ထိုင်ဝႆႉၸိူင်ႉၼႆ” ၵူၼ်းပိုၼ်ႉတီႈ ပွတ်း မိူင်းၼွင်ၵေႃႉၼိုင်ႈလၢတ်ႈၼႄၼင်ႇၼႆ။

ယွၼ်ႉပၢင်တိုၵ်းတီႈလွႆတွၼ်း လႄႈ လွႆႁူၼ်း ဝၼ်းတီႈ 2/3/2020 ၼၼ်ႉသေ ၵူၼ်းဝၢၼ်ႈၵူၼ်းမိူင်း ၸိူဝ်းပၢႆႈၽေးသိုၵ်း မွၵ်ႈ 400-500 ၼႆႉ ယင်းပႆႇၸၢင်ႈပွၵ်ႈၶိုၼ်း။