ပၢင်သွၼ်လိၵ်ႈ ၶၢဝ်းမႆႈ တီႈဝတ်ႉၵုင်းပဝ်း ၵႃလီႉ တေတႄႇၵၢင်လိူၼ်ၼႆႉ

ပၢင်သွၼ်လိၵ်ႈၶၢဝ်းမႆႈ တီႈတိူၵ်ႈသွၼ်လိၵ်ႈဝတ်ႉၵုင်းပဝ်း ဝဵင်းၵႃလီႉ ပီၼႆႉ တေသွၼ်လိၵ်ႈဢင်းၵိတ်းလႄႈ တိုင်ႈပီႇၼမ်ႉ တဝ်ႈ ဝႃႈၼႆ။

ပၢင်သွၼ်ဢင်းၵိတ်းၶၢဝ်းမႆႈၼႆႉ တႄႇပိုတ်ႇပူင်သွၼ် ၼႂ်းဝၼ်းတီႈ 21/3/2020 ၼႆႉ တေႃႇထိုင် ဝၼ်းတီႈ 9/5/2020 တေ ႁပ်ႉလုၵ်ႈႁဵၼ်းတႃႇ 50 ၵေႃႉ၊ လုၵ်ႈႁဵၼ်းၸၼ်ႉ 8 ထိုင် ၸၼ်ႉ 10 ။ တေပူင်သွၼ်ပၼ် တီႈတိူၵ်ႈသွၼ်လိၵ်ႈ ဝတ်ႉၵုင်းပဝ်း ပွၵ်ႉ 3 ဝဵင်းၵႃလီႉ ၸႄႈဝဵင်းၵုၼ်ႁဵင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။

ၸဝ်ႈၶူးၶမ်းလႅင်း ၶေႇမိၼ်ႇတ (B.A, M.Ed) လၢတ်ႈတီႈၽူႈတွႆႇႁွၵ်ႈဝႃႈ “ ယိူင်းဢၢၼ်း ဢၼ်လႆႈပိုတ်ႇပၢင်သွၼ်လိၵ်ႈ ဢိင်း ၵလဵတ်ႈၶၢဝ်းၼႆႉ တႃႇၵမ်ႉ ထႅမ်ၵၢၼ်ႁဵၼ်း လုၵ်ႈဢွၼ်ႇၼုမ်ႇတႆးသေ ႁႂ်ႈမေႃမီးၾိင်ႈယၢမ်ႈလီ ႁႃၵိၼ်လဵင်ႉတွင်ႉတူဝ်ၵဝ်ႇ” ဝႃႈၼႆ။

ဢၼ်တေပူင်သွၼ်ပၼ်တႄႉ မိူၼ်ၼင်ႇ Grammar, Speaking, Tai Literature လႄႈ General Knowledge ၸိူဝ်းၼႆႉ။ ၶၢဝ်းယၢမ်းပူင်သွၼ်သမ်ႉ တေပဵၼ်ယၢမ်းၵၢင်ၼႂ် 8:30 မူင်း -11:30 မူင်း၊ ယၢမ်းၵၢင်ဝၼ်း 12:30 မူင်း – 1:00 မူင်းဝၢႆးဝၼ်း လႄႈ ယၢမ်းဝၢႆးဝၼ်း 1:15 မူင်း – 4:00 မူင်း ဝၢႆးဝၼ်း။

လိူဝ်ၼၼ်ႉ ပၢင်သွၼ်တိုင်ႈပီႇၼမ်ႉတဝ်ႈ သမ်ႉပဵၼ်တႃႇၶၢဝ်းတၢင်း 12 ဝၼ်း တေပိုတ်ႇပူင်သွၼ်ပၼ် ၼႂ်းဝၼ်းတီႈ 26/3/2020 – 6/4/2020 ၶၢဝ်းယၢမ်း 1:00 မူင်း – 3:00 မူင်းဝၢႆးဝၼ်း။ ယိူင်းဢၢၼ်း ၼင်ႇႁိုဝ် ထုင်းတႆး တေဢမ်ႇႁူင်ႈႁၢႆသေ တေလႆႈ သိုပ်ႇၽႄႈတိူၼ်း ၸိုမ်းၶဝ်ႈၼႂ်းတူင်ႇဝူင်းလုၵ်ႈဢွၼ်ႇၼုမ်ႇတႆးၵႂႃႇ ဝႃႈၼႆ။

တွၼ်ႈတႃႇ ပၢင်သွၼ်ဢင်းၵိတ်း ၶဝ်းမႆႈလႄႈ ပၢင်သွၼ်တိုင်ႈပီႇၼမ်ႉတဝ်ႈ 12 ဝၼ်းၼႆႉ ယၢမ်းလဵဝ် ႁပ်ႉသဵၼ်ႈၸိုဝ်ႈလုၵ်ႈ ႁဵၼ်းၸိူဝ်းသူၼ်ၸႂ်ယူႇယဝ်ႉ ဝႃႈၼႆ။