ၵႃးပိၼ်ႈၶႂမ်ႈ ၼႂ်းၵႄႈ လၢႆးၶႃႈ – မိူင်းၼွင် လမ်းၼိုင်ႈ

ရူတ်ႉၵႃး လမ်းၼိုင်ႈ ပဵၼ်ၽေးဢုပၢတ်ႈ ပိၼ်ႈၶႂမ်ႈ ၵူၼ်းမႃးၸွမ်းၼႂ်းၵႃး မီးလွင်ႈမၢတ်ႇၸဵပ်းၵၼ် ၵမ်ႈၽွင်ႈ။

ဝၼ်းတီႈ 1/3/2020 ယၢမ်းဝၢႆးဝၼ်း 4 မူင်း ရူတ်ႉၵႃး လမ်းၼိုင်ႈ ႁေႃႈဝႆးသေ ပဵၼ်ၽေးဢုပၢတ်ႈ ပိၼ်ႈၶႂမ်ႈ လမ်းၼိုင်ႈ ၼႂ်းၵႄႈ လၢႆးၶႃး – မိူင်းၼွင် ယၢၼ်ၵၢႆဝဵင်းလၢႆးၶႃႈ မွၵ်ႈ 4 လၵ်း ၼႂ်းၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်း ၸၢၼ်း။

ၸဝ်ႈၶူး သီရိထမ်ႇမ ဝဵင်းဢိၼ်း ၽူႈႁၼ်တႂ်ႈၼႃႈတႂ်ႈတႃ လၢတ်ႈတီႈၽူႈတွႆႇႁွၵ်ႈဝႃႈ “ ၵႃးတၵ်ႉၵႃႇၶဝ်ၼၼ်ႉ ယၢၼ်ၵႆၵႃး ႁဝ်းၸဝ်ႈၶီႇမႃး မွၵ်ႈ 10 ဝႃးၼႆႉ ပဵၼ်ၽေးဢုပၢတ်ႈသေ ပိၼ်ႈၶႂမ်ႈၵႂႃႇ။ ယွၼ်ႉဝႃႈ ၾုၼ်ႇမုၵ်ႉၵေႃႈၼမ်သေ ၵူၼ်းႁေႃႈၵႃး ၵေႃႈသမ်ႉၶႂ်ႈမဝ်းဝႆႉဢိတ်းဢွတ်း လႆႈငိၼ်းမႃးၼင်ႇၼၼ်။ ဢဝ်ႁူဝ်ၵႃးၶဝ် ငွၵ်ႈဢွၵ်ႇတၢင်းၵႂႃႇသေ ၵိူင်းၶႂမ်ႈၵႂႃႇ” ဝႃႈၼႆ။

ၵူၼ်းမႃးၸွမ်းၼႂ်းၵႃးၼၼ်ႉ မီးၵူၼ်းလူင် 5 ၵေႃႉ လုၵ်ႈဢွၼ်ႇ 4 ၵေႃႉ ဢွၼ်ၵၼ်မၢတ်ႇၸဵပ်းဢိတ်းဢွတ်း မိူၼ်ၼင်ႇ ႁူဝ် ပူမ်၊ ၶႃလွၵ်ႈ၊ ၶႅၼ်ၶတ်း ၸိူဝ်းၼႆႉ။ ၵႃးၼႆႉ လုၵ်ႉတၢင်းလၢႆးၶႃႈၶိုၼ်ႈမႃးမိူင်းၼွင် ဝႃႈၼႆ။

ၸဝ်ႈၶူး သိုပ်ႇလၢတ်ႈဝႃႈ “ ၵူၼ်းၸၢႆးဢွၼ်ႇ 2 ၵေႃႉ ဢၼ်ၶီႇမႃးၸွမ်းတၢင်းလင်ၵႃးၼၼ်ႉ မိူဝ်ႈၽွင်းၵႃးၵိူင်းသေ တေလူမ်ႉ ပိၼ်ႈ ၵႂႃႇၼၼ်ႉၶႃ ဝူတူၵ်းၵႂႃႇၼိူဝ်သဵၼ်ႈတၢင်း။ ၵူၼ်းမႃးၸွမ်းၼႂ်းၵႃးၼၼ်ႉ ဢွၼ်ၵၼ် လႆႈမၢတ်ႇၸဵပ်းဢိတ်း ဢွတ်းၵၼ် ” ဝႃႈၼႆ။

ၸဝ်ႈၶူး သီရိထမ်ႇမ ဝဵင်းဢိၼ်း လၢတ်ႈဝႃႈ “ တၵ်ႉၵႃႇႁဝ်းၶႃႈ ၵူႈၵေႃႉ သင်ဝႃႈဢွၵ်ႇတၢင်းၵၼ်ၶၢဝ်းၼႆႉ ဝႆႉသတိႁႂ်ႈလီ ႁႂ်ႈ ၾၢင်ႉၵၼ်သေၵမ်း ယႃႇၶပ်းႁေႃႈဝႆးၼႃႇၽႅဝ် ၽႂ်ၵႃႈၶႂ်ႈႁိပ်ႈၼႅတ်ႈတၢၼ်ႇလႂ်ၵေႃႈယဝ်ႉ၊ မီးၵၢၼ်လမ်ႇလွင်ႈလူဝ်ႇၼႅတ်ႈ ၼႃႇၵႃႈႁိုဝ်ၵေႃႈယဝ်ႉ ၸဝ်ႈၵႃး/ ၵူၼ်းႁေႃႈၵႃး တိုၼ်းဢမ်ႇလူဝ်ႇၼႅတ်ႈ ႁေႃႈလွႆးလွႆး/ ၵႂႃႇလွႆးလွႆး ပေႃးပဵၼ်မႃး ဢဝ်ဢမ်ႇ လႆႈၼၼ်ႉယဝ်ႉ”ဝႃႈၼႆ။

ဢွင်ႈတီႈ ဢၼ်ၵႃးပိၼ်ႈၶႂမ်ႈၼႆႉ မိူဝ်ႈၵူႈပွၵ်ႈၵေႃႈ ၵႆႉပိၼ်ႈ၊ ၵႆႉပဵၼ်လႄႈ ႁႂ်ႈဢွၼ်ၵၼ် ဝႆႉသတိ ၵႂႃႇမႃးၵၼ်သေၵမ်း ၵူၼ်း မိူင်းလၢႆးၶႃႈ လၢတ်ႈၼႄၼင်ႇၼႆ။

“သဵၼ်ႈတၢင်းၼႆႉ မၢၼ်ႈၶဝ် တိုၵ်ႉၶႂၢၵ်ႈမႂ်ႇၵူၺ်းလႄႈ တေႃႈလဵဝ် ပဵၼ်သဵၼ်ႈတၢင်းမႂ်ႇ ၾုၼ်ႇမုၵ်ႉၼမ်။ ယွၼ်ႉၼၼ်လႄႈ ယႃႇ ပေႁေႃႈဝႆးၵၼ် ႁႂ်ႈဢွၼ်ၵၼ်ဝႆႉသတိ ၵႂႃႇမႃးလီလီ။ ဢွင်ႈတီႈၼၼ်ႉ ၵႆႉပဵၼ်ၵၼ်ၼႃႇ လွင်ႈၵႃးပိၼ်ႈၶႂမ်ႈၼၼ်ႉ” ဝႃႈၼႆ။