ပႃႇတီႇႁူဝ်သိူဝ် ၸႄႈဝဵင်းမူႇၸေႊ ၸတ်းႁဵတ်းပၢင်လိူၵ်ႈတင်ႈ ႁူဝ်ပဝ်ႈလႄႈ ၽူႈပွင်ၵၢၼ်မႂ်ႇ တႃႇပီ 2020။
ဝၼ်းတီႈ 29/2/2020 ယၢမ်းဝၢႆးဝၼ်း 1 မူင်းၶိုင်ႈ ပႃႇတီႇႁူဝ်သိူဝ် SNLD ၸႄႈဝဵင်းမူႇၸေႊ ၸတ်းႁဵတ်းပၢင်လိူၵ်ႈတင်ႈ ၸုမ်း ပွင်ၵၢၼ်မႂ်ႇ ၸႄႈဝဵင်း တီႈႁူင်းႁေႃ တၢၵ်ႇၼၢႆးၽွင် ပွၵ်ႉတူဝ်ႇယွတ်ႈ ဝဵင်းမူႇၸေႊ ၸိုင်ႈတႆးပွတ်းႁွင်ႇ။ ပီ 2020 ၼႆႉ လႆႈ ယုၵ်ႉဢဝ် လုင်းၸၢႆးလႃႉၽေႇ (ႁွင်ႉ) လုင်းသိူဝ်ယွမ် သိုပ်ႇပဵၼ်ႁူဝ်ပဝ်ႈ ၸႄႈဝဵင်းၵႂႃႇထႅင်ႈ ဝႃႈၼႆ။
ၸၢႆးႁိၼ်လဵၵ်း ၽူႈၶဝ်ႈႁူမ်ႈပၢင်ၵုမ် လိူၵ်ႈတင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ပၢင်လိူၵ်ႈတင်ႈ ၼိုင်ႈပီၼိုင်ႈပွၵ်ႈ ၸွမ်းၼင်ႇ ပိူင်ၶွတ်ႇၽွတ်ႈ ပႃႇတီႇႁူဝ်သိူဝ်မီးၼၼ်ႉ ပၢင်လိူၵ်ႈတင်ႈ ႁူဝ်ပဝ်ႈလႄႈ ၽူႈပွင်ၵၢၼ်ၼႆႉ ဢမ်ႇၸႂ်ႈ ပဵၼ်တီႈမူႇၸေႊၼႆႉ ဢၼ်လဵဝ်ၵူၺ်း ၸတ်းႁဵတ်းၵူႈတီႈတီႈၶႃႈယဝ်ႉ။ ၵူၺ်းၵႃႈ ဝၼ်းလႄႈ လိူၼ်မၼ်းတႄႉ တီႈၼိုင်ႈလႄႈ တီႈၼိုင်ႈ တေဢမ်ႇ မိူၼ်ၵၼ်” ဝႃႈၼႆ။
ပၢင်လိူၵ်ႈတင်ႈ ႁူဝ်ပဝ်ႈလႄႈ ၽူႈပွင်ၵၢၼ်မႂ်ႇ ၼႂ်းပီ 2020 ၼႆႉ ယုၵ်ႉဢဝ် လုင်းၸၢႆးလႃႉၽေႇ ပဵၼ်ႁူဝ်ပဝ်ႈ။ ၵႅမ်ႁူဝ်ပဝ်ႈ သမ်ႉ ၸၢႆးႁၢၼ်ၸၢႆး၊ ၽူႈၼမ်းၼႂ်းသမ်ႉ ၸၢႆးလၢၼ်ႉႁိူင်း၊ ၵႅမ်ၽူႈၼမ်းၼႂ်း ပဵၼ်ၸၢႆးၶိူဝ်းမၢဝ်း။ ပီၼႆႉ ၽူႈပွင်ၵၢၼ် တင်း မူတ်း မီး 25 ၵေႃႉ ဝႃႈၼႆ။
ပီၼႆႉ ၽူႈမီးသုၼ်ႇတွတ်ႈၶႅပ်းၵၢင်ၸႂ် တင်းမူတ်း မီး 50 ၵေႃႉ။ တင်းမူတ်း ဢၼ်မႃးတွတ်ႈပၼ်ၶႅပ်းၵၢင်ၸႂ်သမ်ႉ 47 ၵေႃႉ ဝႃႈၼႆ။
ၸၢႆးႁိၼ်လဵၵ်း လၢတ်ႈဝႃႈ “ ပီၼႆႉ မီးလွင်ႈလၢၵ်ႇလၢႆးဢၼ်ၼိုင်ႈၶႃႈ ၵူႈပီပူၼ်ႉမႃးၼၼ်ႉ ၸုမ်းပွင်ၵၢၼ်ၵူၺ်း မီးသုၼ်ႇ တွတ်ႈၶႅပ်း၊ ပီၼႆႉ ပႃးမႃးၽူႈပွင်ၵၢၼ် ၼႃႈဝၢၼ်ႈတႃသူၼ် ၵူႈပွၵ်ႉယွမ်ႇ မႃးတွတ်ႈပၼ် ၼိုင်ႈပွၵ်ႉလႂ် 3 ၵေႃႉ။ တင်းမူတ်း 9 ပွၵ်ႉ၊ မိူၼ်ၼင်ႇ ပွၵ်ႉၼိူဝ်၊ ၸၢၼ်း၊ ႁွင်ႇ၊ ၵၢတ်ႇ၊ ၵွင်းၼွင်၊ ၶရိတ်ယၢၼ်ႇ၊ ၸွၼ်ၸူဝ်ႇ၊ ၵွင်းမူးတူင်ႈလႄႈ တူဝ်ႇယွတ်ႈ ၸိူဝ်း ၼႆႉ” ဝႃႈၼႆ။
ၽူႈပွင်ၵၢၼ် ပႃႇတီႇႁူဝ်သိူဝ် ၸႄႈဝဵင်းမူႇၸေႊ မိူဝ်ႈပီ 2019 ၼၼ်ႉ ႁူဝ်ပဝ်ႈပဵၼ် လုင်းၸၢႆးလႃႉၽေႇ (ႁွင်ႉ) လုင်းသိူဝ်ယွမ်၊ ၵႅမ်ႁူဝ်ပဝ်ႈ ၸၢႆးလၢဝ်သႂ်၊ ၽူႈၼမ်းၼႂ်း ၸၢႆးမိၼ်ႉတဵင်းလႄႈ ၵႅမ်ၽူႈၼမ်းၼႂ်းသမ်ႉ ၼၢင်းတဵင်းၵျီႇ ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ