သိုၵ်းလူင်ပွင်ၸိုင်ႈမၢၼ်ႈ တင်း သိုၵ်းတႆး RCSS တိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ်ယူႇ ၼႂ်းၸႄႈဝဵင်းမိူင်းၵိုင် ၽႂ်ယင်းပႆႇ ထွႆထွၼ် ဝႃႈၼႆ။

မိူဝ်ႈၼႆႉ ဝၼ်းတီႈ 28/2/2020 ယၢမ်းၵၢင်ၼႂ် သိုၵ်းလူင်ပွင်ၸိုင်ႈမၢၼ်ႈ တင်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈ တႆး RCSS/SSA တိုၵ်ႉသိုပ်ႇပဵၼ်ပၢင်တိုၵ်းၵၼ် ဢိတ်းဢွတ်း ၸွမ်းသၼ်လွႆတွၼ်း ဢိူင်ႇႁၢမ်းငၢႆး ၸႄႈဝဵင်းမိူင်းၵိုင် ၸႄႈ တွၼ်ႈလွႆ လႅမ် ၸိုင်ႈတႆးပွတ်းၸၢၼ်း။

ၸဝ်ႈႁၢၼ် ၶမ်းၸၢမ်ႇ ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈၼႆႉတႄႉၵေႃႈ ပၢင်တိုၵ်းယဵၼ်ဝႆႉယူႇ ၵူၺ်းၵႃႈ ပႆႇထွႆၵၼ်ၶႃႈ။ မိူဝ်ႈၼႆႉ ပၢင်တိုၵ်းဢၼ်ပဵၼ်ယႂ်ႇမၼ်းတႄႉၵေႃႈ ဢမ်ႇမီးၶႃႈ တေပဵၼ်ဢိတ်းဢွတ်းၸွမ်းပိၵ်ႇ ၸွမ်းၶၢင်ႈ မၼ်းၸိူဝ်းၼၼ်ႉၵူၺ်း” ဝႃႈၼႆ။

မိူဝ်ႈဝႃး ဝၼ်းတီႈ 27/2/2020 ၼၼ်ႉ တပ်ႉသိုၵ်းလူင်ပွင်ၸိုင်ႈမၢၼ်ႈ ႁႅင်းသိုၵ်း 400 ပၢႆ ၶိုၼ်ႈလေႃႇယိုဝ်း သိုၵ်းတႆး RCSS ၸွမ်းသၼ်လွႆတွၼ်း ႁၢဝ်ႈႁႅင်း။ ၵဵဝ်ႇၵပ်းလွင်ႈၼႆႉ တင်းသွင်ၾၢႆႇမီးလွင်ႈလူႉသုမ်း မၢတ်ႇၸဵပ်းၸိူင်ႉႁိုဝ် ဢၼ်ဝႃႈၼၼ်ႉ ပႆႇ ႁူႉႁူဝ်ယွႆႈမၼ်း။

ၸဝ်ႈႁၢၼ် ၶမ်းၸၢမ်ႇ လၢတ်ႈဝႃႈ “ လွင်ႈၵူၼ်းတၢႆ မၢတ်ႇၸဵပ်း တင်းသွင်ၾၢႆႇလႄႈ တီႉလႆႈၶိူင်ႈၵွင်ႈၵၢင်ႇ ၸိူဝ်းၼၼ်ႉတႄႉ ၶႃႈႁဝ်းတေပႆႇၸၢင်ႈလၢတ်ႈလႆႈၶႃႈ။ ယွၼ်ႉဝႃႈ တေႃႈလဵဝ် ပၢင်တိုၵ်းပႆႇယဝ်ႉ တိုၵ်ႉၶဵင်ႈၶႅင်ၵၼ်ယူႇ။ ယဝ်ႉၵေႃႈ ပႆႇထွႆထွၼ် ၵၼ်” ဝႃႈၼႆ။

ၵဵဝ်ႇၵပ်းလွင်ႈၼႆႉ ၵူၼ်းပိုၼ်ႉတီႈတၢင်းဢိူင်ႇႁၢမ်းငၢႆးဝႃႈ မိူဝ်ႈၼႆႉ ပၢင်တိုၵ်းၵေႃႈ တိုၵ်ႉသိုပ်ႇပဵၼ်ထႅင်ႈယူႇ၊ သိုၵ်းတႆး ယိုတ်း လႆႈပႃး ၶိူင်ႈၵွင်ႈၵၢင်ႇၾၢႆႇသိုၵ်းမၢၼ်ႈထႅင်ႈလၢႆလၢႆလဝ်းလႄႈ တၢင်းၾၢႆႇသိုၵ်းမၢၼ်ႈၵေႃႈ မီးလွင်ႈလူႉတၢႆၸွမ်း ၸဵမ်ၸိူဝ်း ၼႆႉ။

ၵူၼ်းႁၢမ်းငၢႆး ဢႃယု 40 ပၢႆ လၢတ်ႈတီႈၽူႈတွႆႇႁွၵ်ႈဝႃႈ “ လွင်ႈၼႆႉတႄႉ ႁဝ်းၶႃႈ လႆႈငိၼ်းမႃးႁဵတ်းၼၼ်ၵူၺ်း လွင်ႈဝႃႈ မိူဝ်ႈ ဝႃး တင်းမိူဝ်ႈၼႆႉ လႆႈၶိူင်ႈၵွင်ႈၵၢင်ႇသိုၵ်းမၢၼ်ႈ 8-9 လဝ်း။ သိုၵ်းမၢၼ်ႈၵေႃႈ မီးလွင်ႈလူႉတၢႆ ၸွမ်းၵမ်ႈၽွင်ႈ ႁဝ်းၶႃႈ လႆႈ ငိၼ်းဝႆႉၸိူင်ႉၼႆ”ဝႃႈၼႆ။

မိူဝ်ႈပူၼ်ႉမႃး ဝၼ်းတီႈ 24/2/2020 ၼၼ်ႉ RCSS လႆႈဢွၵ်ႇၶေႃႈပိုၼ်ၽၢဝ်ႇၽိုၼ်ၼိုင်ႈ ၼႂ်းၼၼ်ႉ ပႃးဝႆႉဝႃႈ တေၶတ်းၸႂ် ပွင်သၢင်ႈၵႂႃႇ ၼင်ႇႁိုဝ် တေပဵၼ်မႃး ပၢင်ၵုမ်လူင်လွင်ႈငမ်းယဵၼ်မိူင်းႁူမ်ႈတုမ် လႄႈ တေၸတ်းႁဵတ်းပၢင်ၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈတႆး ဝႃႈၼႆ။

ၸၢႆးလဵၵ်ႉ ၽူႈၼမ်းၼႂ်းၵူႈလွင်ႈလွင်ႈ ပႃႇတီႇႁူဝ်သိူဝ် SNLD လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ပဵၼ်ပၢင်တိုၵ်းၵၼ်ယူႇ တၢင်းမိူင်းၵိုင်ၼၼ်ႉ မၼ်းတေၸၢင်ႈတုမ်ႉတိူဝ်ႉလွင်ႈယုမ်ႇယမ်ၼိူဝ်ၵၼ်။ တေတုမ်ႉတိူဝ်ႉပႃးၶၵ်ႉၵၢၼ်လွင်ႈငမ်းယဵၼ်။ သင်ဝႃႈ တိုၵ်ႉသိုပ်ႇပဵၼ်ၸိူင်ႉၼႆထႅင်ႈယူႇတႄႉ တေၸၢင်ႈတုမ်ႉတိူဝ်ႉပႃး UPDJC ထႅင်ႈ၊ ၾၢႆႇၼိုင်ႈ RCSS ၵေႃႈ သမ်ႉ ပဵၼ်ႁူဝ်ပဝ်ႈ ၸူဝ်ႈၶၢဝ်း PPST ထႅင်ႈလူးၵွၼ်ႇ။ ယွၼ်ႉၼၼ် ၶၵ်ႉၵၢၼ် လွင်ႈငမ်းယဵၼ်ၼႆႉ တေၸၢင်ႈ ၵိုတ်းယင်ႉၵႂႃႇ ထႅင်ႈၵမ်းၼိုင်ႈၵေႃႈ ၸၢင်ႈပဵၼ်လႆႈ” ဝႃႈၼႆ။

မိူဝ်ႈဝႃး ဝၼ်းတီႈ 27/2/2020 ၼၼ်ႉ သိုၵ်းလူင်ပွင်ၸိုင်ႈမၢၼ်ႈ ႁႅင်းသိုၵ်း 4 တပ်ႉၵွင် ပႃႈတႂ်ႈတပ်ႉတိူင်းသိုၵ်း ယမၶ လႃႈ သဵဝ်ႈ လႄႈ ယလၶ ၶူဝ်လမ် ႁႅၼ်းသိုၵ်းလေႃႇယိုဝ်း သိုၵ်းတႆး RCSS ႁၢဝ်ႈႁႅင်း ၸွမ်းသၼ်လွႆတွၼ်း ယၢမ်းၵၢင်ၼႂ် 8 မူင်း ၶိုင်ႈ 12 မူင်းၵၢင်ဝၼ်းၵမ်းၼိုင်ႈ။ ဝၢႆးဝၼ်း ထိုင် တၢမ်းၶမ်ႈထႅင်ႈ ၵမ်းၼိုင်ႈ။ ယဝ်ႉၵေႃႈ ယၢမ်းၵၢင်ၶိုၼ်း တိုၵ်ႉသိုပ်ႇပဵၼ်ၵၼ် ထႅင်ႈ ဢိတ်းဢွတ်း ၸဝ်ႈႁၢၼ် ၶမ်းၸၢမ်ႇ လၢတ်ႈၼႄၼင်ႇၼႆ။