ပလိၵ်ႈမိူင်းသၢတ်ႇ တီႉလႆႈ ယႃႈမဝ်းၵမ် ၶၼ်ငိုၼ်း 20,000 သႅၼ်ပၢႆလႄႈ ၶိူင်ႈၵွင်ႈၵၢင်ႇ တီႈမိူင်းတုမ်း။
ဝၼ်းတီႈ 26/2/2020 ယၢမ်းဝၢႆးဝၼ်း မွၵ်ႈ 4 မူင်းၶိုင်ႈၼၼ်ႉ ပလိၵ်ႈလႄႈ တင်းတပ်ႉသိုၵ်း ႁူမ်ႈၵၼ် ၵူတ်ႇထတ်း တီႈၼႂ်း သူၼ်ၵူၺ်ႈ ႁိမ်းဝၢၼ်ႈပႃႁူဝ်း (ပါဟိုး – အာခါကျေးရွာ) ဢိူင်ႇမိူင်းတုမ်း ၸႄႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း တီႉ လႆႈယႃႈ မဝ်းၵမ်လႄႈ ၶိူင်ႇၵွင်ႈၵၢင်ႇ။
ႁွင်ႈၵၢၼ် ပိုၼ်ၽၢဝ်ႇၾၢႆႇ တပ်ႉသိုၵ်းမၢၼ်ႈ ဢွၵ်ႇဝႆႉဝႃႈ “ ယႃႈမဝ်းၵမ် ဢၼ်တီႉလႆႈသမ်ႉ ယႃႈမႃႉ 1,400,000 မဵတ်ႉ (မႅၼ်ႈ ငိုၼ်းမၢၼ်ႈယူႇ မွၵ်ႈ 21,000 သႅၼ်ပျႃး)၊ ၽွင်ယႃႈၾိၼ်ႇၽိူၵ်ႇ ၼမ်ႉၼၵ်း 86.50 ၵီႊလူဝ်ႊၵရမ်ႊ ဢိၵ်ႇထႅင်ႈၶိူင်ႈတူမ်ႈႁုင် ယႃႈမဝ်းၵမ်။ ထိုင်မႃး ယၢမ်းႁူဝ်ၶမ်ႈ မွၵ်ႈ 6 မူင်းပၢႆသမ်ႉ သိုပ်ႇသွၵ်ႈႁၼ်ထႅင်ႈ ၶိူင်ႈၵွင်ႈၵၢင်ႇ ဢၼ်ၾင်ဝႆႉ” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈပလိၵ်ႈၸႄႈဝဵင်းမိူင်းသၢတ်ႇ လႆႈပိုတ်ႇလိူင်ႈၸွႆႈတြႃးဝႆႉ ၸိုဝ်ႈႁွင်ႉ ဢႃးၶေႃႇလႄႈ မီႇသူး တီႈႁူင်း ပလိၵ်ႈ ၸွမ်းၼင်ႇ ပၵ်းပိူင်မၢႆမီႈ ဝၢၼ်ႈမိူင်းမီး ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ