မုၵ်ႉၸုမ်းသင်ၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ ၸိုင်ႈထႆး ၸတ်းႁဵတ်း ပၢင်လိူၵ်ႈတင်ႈ ႁူဝ်ၼႃႈ ၸုပ်ႈ 16 ၸဝ်ႈၶူး ပိုၼ်းၼုမ်ႇ ပၼ်တိတ လႃႈသဵဝ်ႈ ထုၵ်ႇလိူၵ်ႈပဵၼ်ႁူဝ်ၼႃႈ။

ဝၼ်းတီႈ 22/2/2020 ယၢမ်းၵၢင်ၼႂ် 9 မူင်းထိုင် 3 မူင်းဝၢႆးဝၼ်း ယူႇတီႈ မုၵ်ႉၸုမ်းသင်ၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ ၸိုင်ႈထႆး ၸတ်းႁဵတ်းပၢင်လိူၵ်ႈတင်ႈ ႁူဝ်ၼႃႈ ၸုပ်ႈ 16 တႃႇၼႂ်းပီ 2020-2021 တီႈဝတ်ႉမႂ်ႇတႆး သႃထုပရႃႇတိတ်ႇ ၵိဝ်ႇ 44/1 ယၼ်းၼႃးဝႃး မိူင်းၵွၵ်ႇ ၸိုင်ႈထႆး။

ၸဝ်ႈၶူး ဢိတ်သရိယ ဢွၼ်ၶိုၼ်းသႂ် ႁူဝ်ၼႃႈၵဝ်ႇ မုၵ်ႉၸုမ်းသင်ၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ ၸိုင်ႈထႆး ၸုပ်ႈ 15 လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈယဝ်ႉၶႃႈ ၸတ်းႁဵတ်းပၢင်ၵုမ် လိူၵ်ႈတင်ႈႁူဝ်ၼႃႈ တႃႇပီ 2020 -2021 ၼႆႉ ၸဝ်ႈၶူးဢၼ် လႆႈႁပ်ႉပဵၼ်ႁူဝ်ၼႃႈၵႂႃႇ ၼႂ်းၸုပ်ႈ 16 ၼႆႉ ပဵၼ် ၸဝ်ႈၶူး ပိုၼ်းၼုမ်ႇ ပၼ်တိတ လႃႈသဵဝ်ႈ” ဝႃႈၼႆ။

ပၢင်လိူၵ်ႈတင်ႈ ႁူဝ်ၼႃႈမႂ်ႇ ၸုပ်ႈ 16 ၼႆႉ ယၢမ်းၵၢင်ၼႂ် 9 မူင်း ထိုင်ဝၢႆးဝၼ်း 1 မူင်းၶိုင်ႈ ပၼ်သဵင်တွတ်ႈၶႅပ်းၵၢင်ၸႂ်။ သင်ၶၸဝ်ႈ ဢၼ်လိူၵ်ႈဝႆႉ ႁူဝ်ၼႃႈၶဵဝ် 2 တူၼ်သမ်ႉ မိူၼ်ၼင်ႇ ၸဝ်ႈၶူး ပိုၼ်းၼုမ်ႇ ပၼ်တိတ ႁဵၼ်းဝႆႉပၢႆးဝူၼ်ႉၶပ်ႉ ပီသၢမ်လႄႈ ၸဝ်ႈၶူးမွၼ်းတႆး မုၼိၼ်တ ႁဵၼ်းဝႆႉပၢႆးပုတ်ႉ ပီသွင်။

ၼႂ်းၸဝ်ႈၶူး 2 တူၼ် ဢၼ်လႆႈၶဝ်ႈၶေႉၶဵင်ႇၵၼ်ၼၼ်ႉ ၸဝ်ႈၶူး ပိုၼ်းၼုမ်ႇ ပၼ်တိတ လႆႈၶႅပ်းၵၢင်ၸႂ် 106 ၶႅပ်း၊ ၸဝ်ႈၶူး မွၼ်းတႆး မုၼိၼ်တ လႆႈၶႅပ်းၵၢင်ၸႂ် 20 ၶႅပ်း။ ၸဝ်ႈၶူး ပိုၼ်းၼုမ်ႇ ပၼ်တိတ လႆႈႁပ်ႉပဵၼ် ႁူဝ်ၼႃႈ မုၵ်ႉၸုမ်းသင်ၶတႆး လုၵ်ႉႁဵၼ်းၸၼ်ႉၸွမ် မိူင်းၵွၵ်ႇ ၸိုင်ႈထႆး ၸုပ်ႈ 16 တႃႇၶၢဝ်းတၢင်း 1 ပီ တႄႇ ဢဝ် 2020 – 2021 ဝႃႈၼႆ။

ၸဝ်ႈၶူး ဢိတ်သရိယ ဢွၼ်ၶိုၼ်းသႂ် ႁူဝ်ၼႃႈၵဝ်ႇ ၸုပ်ႈ 15 မွၵ်ႇလၢတ်ႈၶေႃႈၵႂၢမ်း တီႈဢၼ်လႆႈႁဵတ်းသၢင်ႈမႃး ၵၢၼ်ပဵၼ်ႁူဝ်ၼႃႈ ၼမ်ႉတွၼ်း ၽွၼ်းလီ ၽွၼ်းၸႃႉ လႄႈ လၢတ်ႈၼႄလွင်ႈတူဝ်ထူပ်းတင်းၼမ်။ ဝၢႆးၼၼ်ႉၵႅမ်ႁူဝ်ၼႃႈ ၼိုင်ႈ ၸဝ်ႈၶူးဝႃႇယႃႇမ တၢင်ႇလၢတ်ႈၼႄ လွင်ႈတူင်ႉၼိုင် ၸုမ်းပွင်ၵၢၼ် ၸုပ်ႈ 15 ဢၼ်လႆႈႁဵတ်းသၢင်ႈမႃး ၼႂ်းပီ 2019 တေႃႇထိုင် ပီ2020။

ၼွၵ်ႈလိူဝ်ၼၼ်ႉ ၽူႈပွင်ၵၢၼ်မႄးပပ်ႉပၵ်းပိူင်ၸုမ်း တၢင်ႇလၢတ်ႈၼႄ ပပ်ႉပၵ်းပိူင်ဢၼ်လႆႈမႄးယဝ်ႉ။ ၼင်ႇႁိုဝ် သင်ၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ ၸိုင်ႈထႆး ပေႃးတေၶိုၼ်းယႂ်ႇ မႂ်ႇသုင် မၼ်ႈၵိုမ်းယိုၼ်းယၢဝ်းၵႂႃႇၶၢဝ်းႁိုင်လႆႈၼၼ်ႉ ၽူႈပွင် ၵၢၼ်မႄးပပ်ႉပၵ်းပိူင် ၸင်ႇလႆမႄးထတ်းထွၼ်ထႅမ်တင်ႈတႄႇ ဝၼ်းတီႈ 18/02/2020 ထိုင် 20/02/2020 ၼႂ်းၽဵတ်ႉပုၵ်ႉ မုၵ်ႉၸုမ်းသင်ၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ ၸိုင်ႈထႆး ပိုၼ်ၽႄႈဢွၵ်ႇဝႆႉ။