Friday, March 29, 2024

ၽူႈထၢင်ႇထိူမ်ဝႃႈ ၺႃးၸပ်းမႅင်း ၶူဝ်ႊဝိတ်ႊ -19 မီးတီႈမူႇၸေႊ ၵေႃႉၼိုင်ႈ

Must read

ၾၢႆႇပၢႆးယူႇလီပိုၼ်ၽၢဝ်ႇဝႃႈ တီႈႁူင်းယႃ မူႇၸေႊ ပၵ်းတႃပႂ်ႉတူၺ်းဝႆႉၵူၼ်းပဵၼ်ၵေႃႉၼိုင်ႈ မီးၼႂ်းၸၼ်ႉထၢင်ႇထိူမ် ဝႃႈၸပ်းတၢင်းပဵၼ်ၸိူဝ်ႉမႅင်း ၶူဝ်ႊဝိတ်ႊ -19 ဝႃႈၼႆ။

Photo by – ထုင်ႉႁူၺ်ႈလီ/ ႁူင်းယႃလူင် မူႇၸေႊ

ဝၼ်းတီႈ 25/2/2020 ၼၼ်ႉၾၢႆႇပၢႆးယူႇလီတီႈလၢၼ်ႇၶၢမ်ႈလႅၼ်လိၼ် မၢၼ်ႈဝဵင်း (ၽၵ်းတူဝဵင်းမူႇၸေႊလႄႈ မိူင်းၶႄႇ ) ၵူတ်ႇထတ်းႁၼ်ၽူႈၸၢႆးၵေႃႉၼိုင်ႈ ဢႃယု 23 ပီ မၼ်းၸၢႆးဢၢၼ်းတေၶၢမ်ႈၵႂႃႇ ႁဵတ်းၵၢၼ်တၢင်း မိူင်းမၢဝ်းၼၼ်ႉ မီးလူမ်းမႆႈၶိုၼ်ႈထိုင် 100 ၻီႊၵရီႊ လႄႈ ယၢမ်းလဵဝ်လႆႈဢဝ်တူဝ်မၼ်းၸၢႆး သူင်ႇဝႆႉတီႈ ႁူင်းယႃ မူႇၸေႊယဝ်ႉဝႃႈၼႆ။

- Subscription -

ၵဵဝ်ႇၵပ်းလွင်ႈၼႆႉ ယူႇတီႈႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇဢွၵ်ႇဝႃႈ “ တေႃႈလဵဝ် ၽူႈၸၢႆးၵေႃႉၼၼ်ႉ လႆႈသူင်ႇယူတ်းယႃတူဝ်ဝႆႉ ႁင်းၶေႃတီႈ ႁူင်းယႃမူႇၸေႊ။ သူင်ႇလိူတ်ႈမၼ်း ၵႂႃႇၵူတ်ႇဝႆႉတီႈ တႃႈၵုင်ႈ ယဝ်ႉ” ဝႃႈၼႆ။

ၽူႈၸၢႆး ဢႃယု 23 ပီၼႆႉ မၼ်းၸၢႆးၵႂႃႇႁဵတ်းၵၢၼ် မေးရူတ်ႉၵႃး တီႈမိူင်းမၢဝ်း ၸိုင်ႈမိူင်းၶႄႇမွၵ်ႈ 15 ဝၼ်း သေၸင်ႇ ႁႃပွၵ်ႈမႃးမူႇၸေႊၶိုၼ်းမိူဝ်ႈ ဝၼ်းတီႈ 24/2/2020 ၼႆႉၵူၺ်း။

Photo by – ထုင်ႉႁူၺ်ႈလီ/ ႁူင်းယႃလူင် မူႇၸေႊ

ၼႂ်းၶေႃႈပိုၼ်ၽၢဝ်လူင်ပွင်ၸိုင်ႈၼၼ်ႉတႄႉပႃးဝႆႉဝႃႈ ၾၢႆႇပၢႆးယူႇလီလႆႈထၢင်ႇထိူမ်ဝႆႉလၢႆလၢႆၵူၺ်း။ ဢမ်ႇႁၼ်မၼ်းၸၢႆး ပဵၼ် ထူၺ်ႈၸႂ်ၵပ်ႉ ၼင်ႇၾၢင်ႁၢင်ႈတၢင်းပဵၼ် ၶူဝ်ႊဝိတ်ႊ -19 ၼၼ်ႉၼင်ႇၵဝ်ႇ – ဝႃႈၼႆ။

ၵူၺ်းၵႃႈ ၵဵဝ်ႇလူၺ်ႈလွင်ႈ ၼႆႉယူႇတီႈၾၢႆႇပၢႆးယူႇလီ ဢမ်ႇပိုၼ်ၽၢဝ်ႇၸူးၵူၼ်းပိုၼ်ႉတီႈ တႅၵ်ႇလႅင်းလႄႈ ၵူၼ်းမိူင်းၵမ်ႈၼမ် ယင်းဢမ်ႇလႆႈႁူႉ ။

ၸၢႆးၵွမ်း ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ- “ တီႈႁူင်းယႃမူႇၸေႊႁဝ်းၶႃႈၼႆႉ ႁဝ်းၶႃႈတွင်ႈထၢမ် ၽူႈမီးပုၼ်ႈၽွၼ်း လႄႈမေႃယႃၶဝ် လၢတ်ႈဝႃႈဢမ်ႇမီး၊ ဢမ်ႇႁူႉ ၼႆတႃႇသေႇတေႃႇထိုင်ဝၼ်းမိူဝ်ႈၼႆႉ။ ၵွပ်ႈၼႆႁဝ်းၶႃႈ ဢမ်ႇလႆႈႁူႉ ၶႃႈလွင်ႈ ၼႆႉ။ ၾၢႆႇၼိုင်ႈၵေႃႈ ၵဵဝ်ႇၵပ်းလွင်ႈပၼ်တၢင်းႁူႉ ၵဵဝ်ႇၵပ်းၶူဝ်ႊရူဝ်ႊၼႃႊၼႆႉ ယင်းတိုၵ်ႉဢေႇၼႃႇ။ ၵွပ်ႈၼႆ ၽႃႈတူမ်းသူပ်း ၵေႃႈ ဢမ်ႇႁၼ်ၽႂ်သႂ်ႇတိုဝ်း သေၵေႃႉၶႃႈ ” ဝႃႈၼႆ။

တီႈႁူင်း ယႃမူႇၸေႊၼၼ်ႉ ၼႂ်းႁူဝ်လိူၼ်ၼႆႉၵူၺ်း ၸၢဝ်းၶႄႇ ၵေႃႉၼိုင်ႈ ပဵၼ်တၢင်းပဵၼ် မၢၵ်ႇႁူဝ်ၸႂ်၊ ပွတ်ႇ TB သေလူႉ တၢႆၵႂႃႇ။

တီႈၵဵတ်ႉလၢၼ်ႇ ၶဝ်ႈဢွၵ်ႇ လႅၼ်လိၼ်တႆး – ၶႄႇ တီႈမူႇၸေႊ ၸိုင်ႈတႆးပွတ်းႁွင်ႇၼႆႉ ၼိုင်ႈဝၼ်းၵူၼ်းၶဝ်ႈဢွၵ်ႇ ဢမ်ႇ ယွမ်း ၼိုင်ႈမိုၼ်ႇၵေႃႉ ဝႃႈၼႆ။

ဝၼ်းမိူဝ်ႈၼႆႉ 26/2/2020 ၵူၼ်းၸပ်းတၢင်းပဵၼ်ၶူဝ်ႊရူဝ်ႊၼႃႊ တၢင်းလုမ်ႈၾႃႉၼႆႉ မီးၵႂႃႇ 81,005 ၵေႃႉ၊ လူႉတၢႆ 2,763 ၵေႃႉလႄႈ ၶႅၼ်း ၶိုၼ်း 30,002 ၵေႃႉ သိုဝ်ႇၶၢဝ်ႇ South China Morning Post ဢွၵ်ႇဝႆႉၼင်ႇၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း