SSPP ႁၢင်ႈႁႅၼ်းတူဝ်ႈတၼ်း တႃႇတေလူင်းလၢႆးမိုဝ်း NCA သင်ၸိူဝ်ႉဝႃႈ လုၵ်ႈၸုမ်း FPNCC တင်းမူတ်းလူင်း ဝႃႈၼႆ။
ဝၼ်းတီႈ 18/2/2020 ယူႇတီႈပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ဢွၵ်ႇလိၵ်ႈပိုၼ်ၽၢဝ်ႇၽိုၼ်ၼိုင်ႈ ဝၢႆးလင်ပၢင်ၵုမ် ၶွမ်ႊမတီႊငဝ်ႈငုၼ်းၸေးၸုမ်ႇ ႁူဝ်ႁုပ်ႈပီ 2019။ ၶေႃႈပိုၼ်ၽၢဝ်ႇ တင်းမူတ်းမီး 6 ၶေႃႈ။ ၼႂ်းၶေႃႈထီႉ 3 ၼၼ်ႉ ပႃးဝႆႉဝႃႈ ၼင်ႇႁိုဝ် ပႃႇတီႇ မႂ်ႇသုင်ၸိုင်ႈတႆးလႄႈ လုၵ်ႈၸုမ်း FPNCC တင်းသဵင်ႈ တေၶဝ်ႈႁူမ်ႈပႃးလႆႈၼႂ်းၶၵ်ႉၵၢၼ် NCA၊ ၶၵ်ႉၵၢၼ်ငမ်းယဵၼ်၊ ၵၢၼ် မိူင်းၼၼ်ႉ SSPP တေငူပ်ႉငီႉဢုပ်ႇဢူဝ်းတင်း လူင်ပွင်ၸိုင်ႈ၊ တပ်ႉသိုၵ်းမၢၼ်ႈသေ တေ ႁူမ်ႈၶိုင်ပွင်ႁဵတ်းသၢင်ႈၸွမ်း ၸုမ်း ယိပ်းၵွင်ႈၵၢင်ႇလုၵ်ႉၽိုၼ်ႉၽဝမိူၼ်ၵၼ်၊ ၸုမ်းပႃႇတီႇပၢႆးမိူင်းလႄႈ ၸုမ်းတူင်ႇဝူင်းၵူၼ်း ၸိူဝ်းၼႆႉ။
ၸဝ်ႈႁၢၼ် တၢၼ်းဢွင်ႇ ၽူႈၶၢၼ်ပၢၵ်ႇ SSPP လၢတ်ႈတီႈၽူႈတွႆႇႁွၵ်ႈဝႃႈ “ ယိူင်းဢၢၼ်းတႃႇတေလူင်းလၢႆးမိုဝ်း NCA ၼႆႉ ႁဝ်းၶႃႈႁၢင်ႈႁႅၼ်းတူဝ်ႈတၼ်းဝႆႉယဝ်ႉ။ ပိူင်လူင်မၼ်း FPNCC ၊ သင်ဝႃႈၵူႈမူႇၵူႈၸုမ်း ၼႂ်း FPNCC လူင်းယဝ်ႉၼႆၸိုင် ႁဝ်း ၶႃႈတႄႉ တိုၼ်းတူဝ်ႈတၼ်းတႃႇတေလူင်းယူႇ” ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇၼၼ်ႉ ပႃးဝႆႉဝႃႈ“ ငိူၼ်ႈငဝ်ႈပၼ်ႁႃ ဢၼ်ပဵၼ်ပၢင် တိုၵ်း ယူႇၼႂ်းမိူင်းၼႆႉ မၼ်းပဵၼ်ပၼ်ႁႃၵၢၼ်ပၢႆး မိူင်းယဝ်ႉ။ ပၼ်ႁႃၵၢၼ်ပၢႆးမိူင်းၼၼ်ႉ တေလႆႈဢဝ်လွၵ်းလၢႆးဢုပ်ႇဢူဝ်း ၵၢၼ်မိူင်း ဢၼ်ဢမ်ႇၸႂ်ႈလၢႆးပိုတ်းယိုဝ်းတိုၵ်း တေႃးၵၼ်သေၵႄႈၶႆၵႂႃႇ SSPP/SSA မီးတၢင်းယုမ်ႇယမ်ၼင်ႇၼႆ။ ဢိင်ၼိူဝ် ၶေႃႈယုမ်ႇယမ်ၼႆႉသေ ပၢင်ဢုပ်ႇဢူဝ်းၵၢၼ် မိူင်းၵူႈပၢင်ပၢင်ၼၼ်ႉ SSPP လႆႈၶဝ်ႈပႃးတူင်ႉၼိုင်မႃးၸွမ်းဝႆႉယူႇ” ဝႃႈၼႆ။
ၸဝ်ႈႁၢၼ် တၢၼ်းဢွင်ႇ လၢတ်ႈဝႃႈ “ ဢိင်ၼိူဝ်ၵၢၼ်လူင်းလၢႆးမိုဝ်း NCA ၼႆႉ ယူႇတီႈမုၵ်ႉၸုမ်းႁဝ်းၶႃႈတိုၼ်းၶဝ်ႈပႃးမႃး တႄႇၸဵမ်မိူဝ်ႈတႅမ်ႈ NCA ငဝ်ႈတေႃႇပၢႆယဝ်ႉ။ ၵူၺ်းၵႃႈ ဢိင်ၼိူဝ်ငဝ်းလၢႆးမၼ်း ပေႃးဝႃႈ ၵူႈမူႇၵူႈၸုမ်း ဢမ်ႇပႆႇလူင်းၵေႃႈ ယူႇတီႈမုၵ်ႉၸုမ်းႁဝ်းၶႃႈ ၸုမ်းလဵဝ်ၵေႃႈ တေပႆႇၸၢင်ႈလူင်း” ဝႃႈၼႆ။
ယူႇတီႈပႃႇတီႇမႂ်ႇသုင်ၸိုင်ႈတႆး ၸတ်းႁဵတ်းပၢင်ၵုမ်လူင် ၶွမ်ႊမတီႊ ငဝ်ႈငုၼ်းၼႆႉ တႄႇဢဝ် ဝၼ်းတီႈ 4-18/2/2020 တီႈ ငဝ်ႈငုၼ်းဝၢၼ်ႈႁႆး ၼႂ်းပၢင်ၵုမ်လူင်ၼၼ်ႉ မီးၽူႈၶဝ်ႈႁူမ်ႈတင်းမူတ်း 48 ၵေႃႉ။ ဢုပ်ႇဢူဝ်းတႅပ်းတတ်း ဢွၵ်ႇၶေႃႈပိုၼ် ၽၢဝ်ႇ 6 ၶေႃႈ။ ပႃးလွင်ႈ ငဝ်းလၢႆးၵၢၼ်ဝၢၼ်ႈၵၢၼ်မိူင်း ဢၼ် ပဵၼ်မႃးလႄႈ ဢၼ်ၸၢင်ႈပဵၼ်ၵႂႃႇတၢင်းၼႃႈ၊ ၶၵ်ႉၵၢၼ် လွင်ႈငမ်းယဵၼ်၊ ၽဝ လွင်ႈယူႇလွင်ႈၵိၼ် လႄႈ ၵၢၼ်ပူၵ်းပွင်၊ ပၢႆးပၺ်ႇၺႃႇ၊ ပၢႆးယူႇလီ၊ ပၢႆးမၢၵ်ႈမီးၵူၼ်းဝၢၼ်ႈၵူၼ်းမိူင်း၊ ၵၢၼ်တိုၵ်းတေႃးၽဵဝ်ႈမူၺ်ႉယႃႈမဝ်းၵမ် ဢိၵ်ႇလွင်ႈတေႃႇၼႃႈ ႁူပ်ႉထူပ်းဢုပ်ႇဢူဝ်းၵႄႈလိတ်ႈပၼ်ႁႃၵၢၼ်မိူင်း ၸိူဝ်းၼႆႉ။
