ပီႈၼွင်ႉၶူဝ်လမ် ႁူပ်ႉထူပ်းပၼ်ႁႃ ၼမ်ႉၵိၼ်ၼမ်ႉၸႂ်ႉႁႅင်ႈလႅင်ႉယဝ်ႉ။

တိုၵ်ႉပဵၼ်ၼႂ်းလုၵ်ႈလိူၼ်ၾႅပ်ႊၿိဝ်ႊရီႊၵူၺ်း ပီႈၼွင်ႉဝဵင်းၶူဝ်လမ် ၸႄႈဝဵင်းၼမ်ႉၸၢင် ၸႄႈတွၼ်ႈလွႆလႅမ် ၸိုင်ႈတႆးပွတ်း ၸၢၼ်း ႁူပ်ႉပၼ်ႁႃ လွင်ႈၼမ်ႉၵိၼ်ၼမ်ႉၸႂ်ႉၼႂ်းၼမ်ႉမေႃႇႁႅင်ႈလႅင်ႉ ထိုင်တီႈလႆႈၵႂႃႇဢဝ်တၢင်ႇတီႈမႃးၸႂ်ႉတႃႇၼႃႈႁိူၼ်း။

ၸၢႆးဢွၼ်ႇ ၵူၼ်းၶူဝ်လမ် လၢတ်ႈတီႈၽူႈတွႆႇႁွၵ်ႈဝႃႈ “ပီၼႆႉ ၼႂ်းၶူဝ်လမ်ႁဝ်းၶႃႈ ၼမ်ႉၵိၼ်ၼမ်ႉၸႂ်ႉႁႅင်ႈၼႃႇၶႃႈ။ ၼမ်ႉမေႃႇ ၼႂ်းႁိူၼ်းႁဝ်းၶႃႈၼႆႉ မိူဝ်ႈလၢႆပီပူၼ်ႉမႃးၼႆႉ ဢမ်ႇယၢမ်ႈႁႅင်ႈၸိူင်ႉၼႆသေပွၵ်ႈၶႃႈ။ ပေႃးၶၢဝ်းႁႅင်ႈမႃးၼႆႉ ၼမ်ႉမေႃႇတီႈႁိူၼ်း ႁဝ်းၶႃႈ တဵၵ်းၸႂ်ႉၵိၼ် ဢၢပ်ႇ ပဵင်းပေႃးယူႇၵူႈပီ။ ပီၼႆႉတႄႉ ၼမ်ႉမေႃႇႁိူၼ်းႁဝ်းၼႆႉ ႁႅင်ႈမႃး မီးၶၢဝ်းတၢင်း 1 ဝူင်ႈယဝ်ႉ လႆႈၵႂႃႇ တဵၵ်းတၢင်းၼွၵ်ႈသေ မႃးၸႂ်ႉဢဝ်ၵူၺ်းၶႃႈ” ဝႃႈၼႆ။

ၼမ်ႉၵိၼ်ၼမ်ႉၸႂ်ႉႁႅင်ႈၼႆႉ တႄႇပဵၼ်မႃး ၼႂ်းလိူၼ်သၢမ် လွင်ႈၼႆႉၵူၺ်း ဝႃႈၼႆ။

ၸၢႆးဢွၼ်ႇ လၢတ်ႈဝႃႈ “ တေႃႈလဵဝ် တိုၵ်ႉပဵၼ်လိူၼ်သၢမ်လွင်ႈၵူၺ်း တႃႇတေထိုင် ၶၢဝ်းႁႅင်ႈၼႆႉ တိုၵ်ႉၵိုတ်းထႅင်ႈပဵၼ်လၢႆ လိူၼ်၊ တေပဵၼ် ၸိူင်ႉႁိုဝ်ၵႂႃႇထႅင်ႈတႄႉ ဢမ်ႇႁူႉၶႃႈ။ ၵူၺ်းၵႃႈ တၢင်ႇဝၢၼ်ႈတၢင်ႇဝဵင်းတႄႉ ၸွင်ႇမိူၼ်တီႈႁဝ်းၶႃႈၵေႃႈဢမ်ႇ ႁူႉယဝ်ႉ တီႈႁဝ်း ၶႃႈၼႆႉ ၶႂ်ႈဝႃႈ ၵိၼ်းၸႂ်ဝႆႉၶႃႈဢေႃႈၼႆႉ ၼမ်ႉၵိၼ်ၼမ်ႉၸႂ်ႉတွၼ်ႈတႃႇပီၼႆႉတႄႉၼမ်ႉၼွင်ၽႃၵေႃႈ ပေႃး ႁႅင်ႈၼမ်ၼႃႇယဝ်ႉ” ဝႃႈၼႆ။

တီႈႁိမ်းႁွမ်းၶူဝ်လမ်ၼႆႉ ဢမ်ႇမီးလွင်ႈၶုတ်းထၢၼ်ႇႁိၼ် ၶုတ်းၶမ်းသေတႃႉ ၵူၼ်းမိူင်းၶူဝ်လမ် ဢွၼ်ၵၼ်ပွမ်ႈမႆႉ ၸွမ်း တၢပ်ႈလွႆ သၢပ်ႇဝဵင်းၶူဝ်လမ်ၵၼ် တင်းၼမ်လႄႈ ပႃႇမႆႉမူၺ်ႉ၊ လိၼ်ဢမ်ႇမီးႁႅင်းၵဵပ်းၼမ်ႉလႄႈ ၼမ်ႉၸင်ႇႁႅင်ႈဝႆး ၸၢႆး ၵျေႃႇ ၵူၼ်းၶူဝ်လမ်ၵေႃႈလၢတ်ႈၼင်ႇၼႆ။

“တေႃႈလဵဝ်ၼႆႉ ပိူၼ်ႈမႃး ႁဵတ်းသူၼ်သေ ဢဝ်ဝႆႉတီႈလိၼ်ႁိမ်းသၢပ်ႇဝဵင်း ၼမ်တႄႉတႄႉ၊ ၸွမ်းႁိမ်းႁွမ်းလၢပ်ႈလိပ်ႈၶူဝ် လမ်ႁဝ်းၶႃႈၼႆႉ ၶႂ်ႈပၢင်ႇၵႂႃႇမူတ်းယဝ်ႉၶႃႈ။ မႆႉၼႆႉတႅပ်းၵႂႃႇယဝ်ႉ ဢမ်ႇၽုၵ်ႇၵၼ်ၶိုၼ်း။ ထႅင်ႈၾၢႆႇၼိုင်ႈၵေႃႈ ဢွၼ်ၵၼ် ဢဝ်တီႈလိၼ်ဝႆႉ တႃႇတၢင်ႇယွၼ်းဝႂ်တီႈလိၼ်ၵေႃႈပႃးယဝ်ႉ” ၵူၼ်းၶူဝ်လမ်လၢတ်ႈၼႄၼင်ႇၼႆ။

တေႃႈလဵဝ် ၵူၼ်းၶူဝ်လမ် ႁူပ်ႉပၼ်ႁႃလွင်ႈၼမ်ႉႁႅင်ႈၼႆႉ ၶႂ်ႈဝႃႈ ႁူဝ်ပၢၵ်ႇၸဵတ်းသိပ်း။

ပီႈၼွင်ႉၶူဝ်လမ် ဢွၼ်ၵၼ်တုၵ်းယွၼ်း ႁႂ်ႈၽူႈမီးပုၼ်ႈၽွၼ်း လူင်းတူၺ်းၸွႆႈပၼ် လွင်ႈပၼ်ႁႃၼႆႉသေၵမ်း ဝႃႈၼႆ။