ပီႇတူႉၸိတ်ႉ ဝၢၼ်ႈပၢင်ႇ ႁွင်ႉပၢင်ၵုမ်ၵူၼ်းမိူင်းလၢႆးၶႃႈ ဢုပ်ႇၵုမ် တႃႇၶုတ်းထၢၼ်ႇႁိၼ်။

ဝၼ်းတီႈ 15/2/2020 ယၢမ်းၵၢင်ၼႂ် 9 မူင်း သိုၵ်းပီႇတူႉၸိတ်ႉဝၢၼ်ႈပၢင်ႇ ဢၼ်ပဵၼ်ၶူးတေႃးၼ ဢွၼ်ႁူဝ်ၼၼ်ႉ ႁွင်ႉၵူၼ်း ဝၢၼ်ႈ ၸတ်းႁဵတ်းပၢင်ၵုမ်တီႈၵျွင်းၼွင်ယႃႈသႆး ၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်းသေ ဢုပ်ႇ လွင်ႈတႃႇတေၶုတ်းထၢၼ်ႇႁိၼ် ဢၼ်မီးၼႂ်းၵႄႈဝၢၼ်ႈပၢင်ႇတင်း ဝၢၼ်ႈၼွင်ယႃႈသႆး ၵူၼ်းဝၢၼ်ႈသူင်ႇၶၢဝ်ႇၸူးၽူႈတွႆႇ ႁွၵ်ႈၼင်ႇၼႆ။

ၽူႈၸၢႆး ဢႃယု မွၵ်ႈ 50 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းပၢင်ၵုမ်ၼၼ်ႉ တူဝ်ၶူးတေႃးၼ လၢတ်ႈဝႃႈ တေ ၶုတ်းထၢၼ်ႇႁိၼ် ဢၼ်မီးၼႂ်းၵႄႈဝၢၼ်ႈၼွင်ယႃႈသႆးလႄႈ ဝၢၼ်ႈပၢင်ႇ။ လွင်ႈတႃႇတေၶုတ်းထၢၼ်ႇႁိၼ်ၼႆႉ ၸဝ်ႈသြႃႇလူင် ၶဝ်ၸဝ်ႈၵေႃႈ လႆႈၸႂ်ပၼ်ၶႂၢင်ႉယဝ်ႉ” ဝႃႈၼႆ။

ၵဵဝ်ႇၵပ်းလွင်ႈၼႆႉ ၵူၼ်းဝၢၼ်ႈတင်းသွင်ဝၢၼ်ႈလၢတ်ႈဝႃႈ ဢမ်ႇၽွမ်ႉ၊ ဢမ်ႇၽွမ်ႉ လွင်ႈတေမႃးၶုတ်းထၢၼ်ႇႁိၼ်လႃးလႃး ဝႃႈၼႆ။

ၽူႈၸၢႆးၼၼ်ႉ သိုပ်ႇလၢတ်ႈဝႃႈ “ တီႈတႄႉမၼ်း လွင်ႈၼႆႉၸဝ်ႈသြႃႇလူင်ၶဝ်ဢမ်ႇလႆႈပၼ်ၶႂၢင်ႉၶႃႈ။ ၶူးတေႃးၼၼႆႉ ၵႆႉလႄႇ လဵၼ်ႈၵႂၢမ်း ဝႃႈ ပေႃးဢုပ်ႇၵူၼ်းဝၢၼ်ႈပၢင်ႇသမ်ႉဝႃႈ ၵူၼ်းဝၢၼ်ႈၼွင်ယႃႈသႆး ၽွမ်ႉယဝ်ႉ။ ပေႃးဢုပ်ႇ ၵူၼ်းဝၢၼ်ႈၼွင်ယႃႈ သႆးသမ်ႉဝႃႈ ၵူၼ်းဝၢၼ်ႈပၢင်ႇၽွမ်ႉယဝ်ႉၼႆၶႃႈဢေႃႈ။ တီႈတႄႉမၼ်းၵူၼ်းဝၢၼ်ႈဢမ်ႇၽွမ်ႉၶႃႈ” ဝႃႈၼႆ။

ၸၢႆးၵျေႃႇၸေႇယ ၽူႈတႅၼ်းသၽႃး ၸႄႈမိူင်းၶဵတ်ႇလိူၵ်ႈတင်ႈမၢႆ 1 ၸႄႈဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ “ လွင်ႈၼႆႉ ႁဝ်းၶႃႈ ပႆႇလႆႈငိၼ်းတီႈၵူၼ်းဝၢၼ်ႈၶဝ် တၢင်ႇလၢတ်ႈမႃးၶႃႈ။ မိူဝ်ႈပိူၼ်ႈမႃးသူၼ်းတုမ်ႁဝ်းၼၼ်ႉ ပိူၼ်ႈလၢတ်ႈသင်လၢႆလၢႆ ၼႆ ၵူၼ်းဝၢၼ်ႈႁဝ်း လူဝ်ႇၸူႉတုမ်ၵၼ်သေ ဢုပ်ႇၵၼ် တင်းသင်ၶၸဝ်ႈ။ ပေႃးၶဝ်ဢုပ်ႇၵၼ်သေၽႂ်ၵေႃႈဝႃႈ ဢမ်ႇလႆႈၸႂ် ၼႆၸိုင် ပေႃးၶဝ်ၽွမ်ႉၵၼ်ဝႃႈ ႁဝ်းၶႃႈဢမ်ႇလႆႈၸႂ်လွင်ႈတေၶုတ်းထၢၼ်ႇႁိၼ်ၼႆႉ ၼႆၵေႃႈယဝ်ႉယဝ်ႉ” ဝႃႈၼႆ။

လိူဝ်ၼၼ်ႉ ၵူၼ်းဝၢၼ်ႈလၢတ်ႈဝႃႈ မိူဝ်ႈဝၼ်းတီႈ 14/2/2020 ၼႆႉၵေႃႈ မီးၵူၼ်းၵေႃႉၼိုင်ႈ ၸိုဝ်ႈႁွင်ႉ ၸရေးပၼ်ႇတိယၢဝ်း ၼႆၼၼ်ႉ မိူဝ်းထူပ်းၸဝ်ႈ သြႃႇလူင်ၼႂ်းၼႃႈတီႈၼၼ်ႉသေ လၢတ်ႈဝႃႈ ယွၼ်ႉလူဝ်ႇပူၵ်းပွင်ၵျွင်း မုၼ်ၸဝ်ႈ – ႁူင်းႁဵၼ်းၸိူဝ်း ၼႆႉလႄႈ တေႁွင်ႉၶွမ်ႊမၼီႊမႃးၶုတ်းထၢၼ်ႇႁိၼ်ဝႃႈၼႆ။

“ၶူးတေႃးၼ ယၢမ်ႈလၢတ်ႈဝႃႈ ပေႃးႁဝ်းၶႂ်ႈၶုတ်းထၢၼ်ႇႁိၼ်တႄႉတႄႉၼႆႉ ၵႂႃႇႁူမ်ႈၵၼ်တင်းမၢၼ်ႈသေ မႃးၶုတ်းမၼ်း တိုၼ်းလႆႈၼႆလူးၵွၼ်ႇ။ ပၢႆလၢတ်ႈပႃးထႅင်ႈဝႃႈ ၼႂ်းၶၢဝ်းယၢမ်း 3 ဝၼ်း ပၼ်ၶုတ်း ဢမ်ႇပၼ်ၶုတ်း ႁႂ်ႈလႆႈၶေႃႈတွပ်ႇၶိုၼ်းၼႆ။ ပေႃးဢမ်ႇပၼ်ၶုတ်းၵေႃႈ တေၵႂႃႇႁဵတ်းတပ်ႉတီႈၼၼ်ႈၼႆၵေႃႈဝႃႈ” ၵူၼ်းဝၢၼ်ႈလၢတ်ႈၼႄၼင်ႇၼႆ။

ၵဵဝ်ႇၵပ်းလွင်ႈၼႆႉ မိူဝ်ႈဝၼ်းတီႈ 16/2/2020 ယၢမ်းၵၢင်ၶမ်ႈ မွၵ်ႈ 8 မူင်းၼၼ်ႉ ၵူၼ်းဝၢၼ်ႈ လႆႈၸတ်းႁဵတ်းပၢင်ၵုမ်ၵၼ်သေ လႆႈၸႂ်ၵၼ်ဝႃႈ တေဢွၼ်ၵၼ်သၢၼ်ၶတ်း လွင်ႈတေၶုတ်းထၢၼ်ႇႁိၼ်ၼႆႉ ဝႃႈၼႆ။

မေႃႇထၢၼ်ႇႁိၼ်ဢၼ်ၶဝ်တေၶုတ်းၼႆႉ ၸမ်ဝၢၼ်ႈပၢင်ႇ မွၵ်ႈလၵ်းပၢႆ။ ၸမ်ဝၢၼ်ႈၼွင်ယႃႈသႆး မွၵ်ႈသွင်လၵ်း ၸမ်မႄႈ ၼမ်ႉတွင်း ဢၼ်ၵူၼ်းဝၢၼ်ႈ ဢိူင်ႇဝၢၼ်ႈႁႅင်ႈ ဝၢၼ်ႈလိူဝ်ႇ၊ တၢတ်ႇမွၵ်ႇၶဝ်ၸႂ်ႉတိုဝ်း။ ၸႂ်ႉသွႆတႃႇၽုၵ်ႇသွမ်ႈႁဵတ်းၼႃး။

ၵဵဝ်ႇၵပ်းလွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇတူၺ်းတၢင်းဝၢၼ်ႈပၢင်ႇၵေႃႈ ၵပ်းသိုပ်ႇတိတ်းတေႃႇဢမ်ႇပႆႇ လႆႈ။

ၶူးတေႃးၼၼႆႉ ၵွၼ်းၸုမ်းပီႇတူႉၸိတ်ႉ ပၵ်းဝၢၼ်ႈပၢင်ႇ၊ ဢၼ်ပဵၼ်တႂ်ႈတပ်ႉၸုမ်း 758 ဢၼ်ၸဝ်ႈမိူင်းၸိုၼ်ႈဢွၼ်ႁူဝ်။