ၾၢႆႇယူႇလီလႃႈသဵဝ်ႈ ပႂ်ႉတူၺ်းၵူၼ်းပဵၼ် 2 ၵေႃႉ ထၢင်ႇထိူမ် “ ၶူဝ်ႊဝိတ်ႉ – 19 ”

ထူပ်းႁၼ် ၵူၼ်းပဵၼ်ထႅင်ႈ 2 ၵေႃႉ တီႈလႃႈသဵဝ်ႈ မိူၼ်ၵူၼ်းၸပ်းၸိူဝ်ႉမႅင်းၶူဝ်ႊရူဝ်ႊၼႃႊ တိုၵ်ႉပႂ်ႉထွမ်ႇၶေႃႈတွပ်ႇယူႇ ဝႃႈ ၼႆ။

မိူဝ်ႈဝၼ်းတီႈ 16/2/2020 ယၢမ်းၵၢင်ၶမ်ႈ 8 မူင်း ယူႇတီႈႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇဢွၵ်ႇဝႃႈ ထူပ်း ႁၼ် မိူၼ်ၵူၼ်းၸပ်းတၢင်းပဵၼ်ၸိူဝ်ႉမႅင်းဝႆးရတ်ႊသ်ၶူဝ်ႊရူဝ်ႊၼႃႊထႅင်ႈၵေႃႉၼိုင်ႈ တီႈႁူင်းယႃလူင်လႃႈသဵဝ်ႈ ၸႄႈဝဵင်း လႃႈသဵဝ်ႈ ၸိုင်ႈတႆးပွတ်းႁွင်ႇ။ ယၢမ်းလဵဝ် တိုၵ်ႉသူင်ႇလိူတ်ႈၵႂႃႇၵူတ်ႇထတ်းဝႆႉယူႇ ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ “ တေႃႈလဵဝ် တီႈႁူင်းယႃလႃႈသဵဝ်ႈၼႆႉ ထူပ်းႁၼ် မိူၼ်ၵူၼ်းပဵၼ်ၸိူဝ်ႉ မႅင်းဝႆး ရတ်ႊသ်ၶူဝ်ႊရူဝ်ႊၼႃႊထႅင်ႈ 2 ၵေႃႉ။ တိုၵ်ႉလုမ်းလႃးပႂ်ႉတူၺ်းၶဝ်ဝႆႉလီလီယူႇ” ဝႃႈၼႆ။

လိူဝ်ၼၼ်ႉ ပိုၼ်ၽၢဝ်ႇပႃးထႅင်ႈဝႃႈ ၵူၼ်းမိူင်း ဢၼ်ထၢင်ႇထိူမ် ထူပ်းႁၼ် မိူၼ်ၵူၼ်းၸပ်းၸိူဝ်ႉမႅင်းဝႆးရတ်ႊသ် တီႈၸႄႈ ဝဵင်းမိူင်းၶၢၵ်ႇၵေႃႉၼိုင်ႈၼၼ်ႉ လႆႈဢဝ်လိူတ်ႈၵႂႃႇၵူတ်ႇထတ်းတူၺ်းသေ ႁူႉဝႃႈ ဢမ်ႇၸႂ်ႈၵူၼ်းၸပ်းတၢင်းပဵၼ်ၸိူဝ်ႉမႅင်း ၶူဝ်ႊရူဝ်ႊၼႃႊ” ဝႃႈၼႆ။

ၼွၵ်ႈလိူဝ်ၼၼ်ႉၵူၼ်းပဵၼ် ဢၼ်ထၢင်ႇထိူမ် ၶူဝ်ႊရူဝ်ႊၼႃႊ(ၶူဝ်ႊဝိတ်ႉ 19) ၸိူဝ်းမီး တီႈႁူင်းယႃၸႄႈဝဵင်းၼမ်ႉတူႈ၊ ႁူင်း ယႃၸဝ်ႈ ၸၢမ်ႇထုၼ်းတူၼ်ႈတီးလႄႈ ႁူင်းယႃ တီႈမွၵ်ႇမႆႇ ၸိူဝ်းၼၼ်ႉၵေႃႈ လႆႈႁူႉဝႃႈ ဢမ်ႇၸႂ်ႈပဵၼ်ၵူၼ်းၸပ်းၸိူဝ်ႉမႅင်း ဝႆးရတ်ႊသ်ၶူဝ်ႊရူဝ်ႊၼႃႊသေၵေႃႉ ဝႃႈၼႆ။

ႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇမိူဝ်ႈဝၼ်းတီႈ 16/2/2020 ၼၼ်ႉထႅင်ႈဝႃႈ တေႃႈလဵဝ် ၼႂ်းမိူင်းႁူမ်ႈတုမ် ၼႆႉ ဢၼ်ထၢင်ႇထိူမ် ထူပ်းႁၼ် မိူၼ်ၵူၼ်းၸပ်းတၢင်းပဵၼ်ၸိူဝ်ႉမႅင်းဝႆးရတ်ႊသ်ၶူဝ်ႊရူဝ်ႊၼႃႊၼႆႉ မီးဝႆႉ 38 ၵေႃႉ။ ၼႂ်း 38 ၵေႃႉၼၼ်ႉ လႆႈၵူတ်ႇထတ်းယဝ်ႉသေ ႁူႉၶေႃႈတွပ်ႇမႃးဝႃႈ တႃႇ 28 ၵေႃႉတႄႉ ဢမ်ႇၸႂ်ႈၵူၼ်း ၸပ်းတၢင်းပဵၼ်ၶူဝ်ႊရူဝ်ႊ ၼႃႊ။ ၵိုတ်းထႅင်ႈ ၸိူဝ်းၼၼ်ႉတႄႉ ၶေႃႈတွပ်ႇပႆႇဢွၵ်ႇ ဝႃႈၼႆ။

ဝၼ်းမိူဝ်ႈၼႆႉ 18/2/2020 ၵူၼ်းၸပ်းတၢင်းပဵၼ်ၸိူဝ်ႉမႅင်းၶူဝ်ႊရူဝ်ႊၼႃႊ တၢင်းလုမ်ႈၾႃႉ လၢႆလၢႆမိူင်းၼႆႉ မီး 73,433 ၵေႃႉ၊ တၢႆ 1,873 ၵေႃႉ။ ၶႅၼ်းၶိုၼ်း 12,677 ၵေႃႉ သိုဝ်ႇၶၢဝ်ႇ South China Morning Post ဢွၵ်ႇဝႆႉ။