ၽူႈၸၢႆး ဢႃယု 20 ပီ ၵေႃႉၼိုင်ႈ ယူႇမိူင်းၽူင်း ၸႄႈဝဵင်းတႃႈၶီႈလဵၵ်း ၺႃးပလိၵ်ႈၵူတ်ႇထတ်းတီႉလႆႈ ယႃႈမဝ်းၵမ်တႃႇ ၶၼ် ငိုၼ်း 90 သႅၼ်ပျႃး ႁူမ်ႈပႃးၶိူင်ႈၵွင်ႈၵၢင်ႇ။
ဝၼ်းတီႈ 17/2/2020 ယၢမ်းဝၢႆးဝၼ်း မွၵ်ႈ 4 မူင်းၼၼ်ႉ ၸၢႆးသႅင်ဝုၼ်း ဢႃယု 20 ပီ ၺႃးပလိၵ်ႈၵူတ်ႇထတ်းတီႉၺွပ်း တီႈ ပွၵ်ႉသၼ်သၢႆး(ၶ) ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း။ ၵူတ်ႇထတ်းႁၼ်မႅၼ်ႈ တီႉလႆႈ ယႃႈမဝ်းၵမ် (ၵတ်ႉတ မိၼ်း) ၼမ်ႉၼၵ်း 900 ၵရမ်ႇ (ၵႃႈၶၼ်ငိုၼ်းမၢၼ်ႈမႅၼ်ႈယူႇ 90 သႅၼ်ပျႃး)။
ႁွင်ႈၵၢၼ်ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် ဢွၵ်ႇဝႆႉဝႃႈ “လႆႈၵူတ်ႇထတ်း ၼႂ်းၵႃး ၸၢႆးသႅင်ဝုၼ်းၼၼ်ႉ တီႉလႆႈယႃႈမဝ်း ၵမ် (ၵတ်ႉတမိၼ်း) လႄႈ ၾူၼ်း 2 လုၵ်ႈ” ဝႃႈၼႆ။
ဝၼ်းၼၼ်ႉ ယၢမ်းႁူဝ်ၶမ်ႈမွၵ်ႈ 5 မူင်းၶိုင်ႈ ပလိၵ်ႈၵႂႃႇၵူတ်ႇထတ်းထိုင်တီႈႁိူၼ်း ၸၢႆးသႅင်ဝုၼ်း တီႈဢိူင်ႇမိူင်းၽူင်း (ၵ) ၼၼ်ႉထႅင်ႈသေ တီႉလႆႈၵွင်ႈ M 16 ၼိုင်ႈလဝ်းလႄႈ မၢၵ်ႇၵွင်ႈ၊ မႅၵ်ႉၵွင်ႈ ၸိူဝ်းၼႆႉထႅင်ႈ ဝႃႈၼႆ။
တေႃႈလဵဝ် ယူႇတီႈပလိၵ်ႈၶဝ် လႆႈပိုတ်ႇလိူင်ႈၸွႆးတြႃးဝႆႉတီႈႁူင်းပလိၵ်ႈၸႄႈဝဵင်းတႃႈၶီႈလဵၵ်း ၸွမ်းၼင်ႇပၵ်းပိူင်မၢႆမီႈဝၢၼ်ႈ မိူင်းမီးၼၼ်ႉ ဝႃႈၼႆ။
