ၾႆးမႆႈႁူင်းၸၢၵ်ႈ ႁဵတ်းဢိတ်ႇၸေႈ ဢၼ်မီးတီႈမၢၼ်ႈတိုင်းလူင် ၸႄႈဝဵင်းမူႇၸေႊၼၼ်ႉ လႆႈလူႉသုမ်း ဢမ်ႇယွမ်း 50 သႅၼ်ပျႃး။
ဝၼ်းတီႈ 16/2/2020 ယၢမ်းၵၢင်ၼႂ် ၾႆးမႆႈႁူင်းၸၢၵ်ႈဢိတ်ႇၸေႈ ဢၼ်မီးတီႈ မၢၼ်ႈတိုင်းလူင် ႁိမ်းၾင်ႇၼမ်ႉမၢဝ်း ၸႄႈ ဝဵင်းမူႇၸေႊ ၸိုင်ႈတႆးပွတ်းႁွင်ႇ ယွၼ်ႉၾႆးၾႃႉသျွတ်ႉ ဝႃႈၼႆ။
ၵူၼ်းႁဵတ်းၵၢၼ်တီႈႁူင်းၸၢၵ်ႈၸေႈ လၢတ်ႈတီႈၽူႈတွႆႇႁွၵ်ႈဝႃႈ“ လႅပ်ႈတေပဵၼ်သၢႆၾႆးၾႃႉသျွတ်ႉသေမႆႈ။ သၢႆၾႆး တင်းၶူဝ်းၶွင်ဝႆႉၸမ်ၵၼ်ၼႃႇ။ လႅပ်ႈတႄႇမႆႈမွၵ်ႈၵၢင်ၼႂ် 5 မူင်း။ မွၵ်ႈ 7 မူင်းၶိုင်ႈ ယွၼ်ႉလႆႈငိၼ်းသဵင်တႅၵ်ႇလႄႈ ၵူၼ်းႁဵတ်း ၵၢၼ်လုၵ်ႉမႃးတူၺ်း ပေႃးလႆႈႁၼ် ၾႆးမႆႈႁႅင်းၼႃႇယဝ်ႉ” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈပလိၵ်ႈၾၢႆႇၶႄၾႆးၶဝ် လႆႈဢဝ် ရူတ်ႉၵႃးၶႄၾႆး 9 လမ်း မႃးၸွႆႈၶႄၾႆးၵႂႃႇ။ ဢၼ်လႆႈမႆႈၵႂႃႇၼႆႉ ပဵၼ်ၶူဝ်းၶွင်ဢၼ်ၸႂ်ႉတီႈႁဵတ်းၸေႈလႄႈ ၸေႈလူႉသုမ်း ဢမ်ႇယွမ်း 50 သႅၼ်။
ၸဝ်ႈၼႃႈတီႈၾၢႆႇၶႄၾႆးလၢတ်ႈဝႃႈ “ ဢမ်ႇဝႃႈႁူင်းၸၢၵ်ႈ၊ ႁိူၼ်းယေး၊ ဝတ်ႉၵျွင်း၊ ႁူင်းၸၢၵ်ႈ ဢၼ်ၸႂ်ႉၾႆးၾႃႉလႄႈသင်၊ ၾႆးသႅင်လႅတ်ႇလႄႈသင်။ သင်ဝႃႈ သၢႆၾႆးၵဝ်ႇယဝ်ႉၸိုင် ႁႂ်ႈဢွၼ်ၵၼ်ပိၼ်ႇလႅၵ်ႈပၼ် သၢႆမႂ်ႇ။ ယွၼ်ႉဝႃႈ ပေႃးပဵၼ်သၢႆၾႆး ၵဝ်ႇၸိုင် သၢႆၾႆးတေမႆႈႁႅင်း၊ သၢႆၾႆးၸၢင်ႈပွင်ႇသေ ၸၢင်ႈပဵၼ်ၾႆးသျွတ်ႉ။ တေႃႇသၢႆၾႆးဢဝ်ႁင်းၵူၺ်းၵႂႃႇ တႂ်ႈတႂ်ႈၼိူဝ်ၼိူဝ် ၼၼ်ႉၵေႃႈ မီးၽေးၼမ်” ဝႃႈၼႆ။
မိူဝ်ႈပူၼ်ႉမႃး ပီ 2019 လိူၼ်မေႊ ဝၼ်းတီႈ 16 ၼၼ်ႉ တီႈႁူင်းၸၢၵ်ႈဢိၵ်ႇၸေႈ မၢၼ်ႈၼွင်မူဝ် ၸႄႈဝဵင်းမူႇၸေႊၵေႃႈ ၺႃး ၾႆးမႆႈသေ လႆႈလူႉသုမ်းဢမ်ႇယွမ်း 200 သႅၼ်ပျႃး ဝႃႈၼႆ။
မိူဝ်ႈဝၼ်းတီႈ 13 လိူၼ်ၾႅပ်ႊၿိဝ်ႊရီႊ ယၢမ်းၵၢင်ၶမ်ႈမွၵ်ႈ 9 မူင်းၶိုင်ႈၼၼ်ႉၵေႃႈ သၢႆၾႆးသျွတ်ႉလႄႈ ၾႆးမႆႈႁိူၼ်းသဝ်း ပလိၵ်ႈ 2 လင် တီႈဝဵင်းပၢင်လူင်။ ၵူၺ်းၵႃႈဢမ်ႇတၼ်းလၢမ်းႁွတ်ႈထိုင် ႁူင်းၶင်ၵူၼ်းၼင်ႇၵဝ်ႇ။ ၶူဝ်းၶွင်ၼႂ်းႁိူၼ်းသဝ်း ပလိၵ်ႈ တႄႉ ဢမ်ႇတၼ်းလႆႈသင်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ