ၸုမ်းၵမ်ႉထႅမ်ၽူႈထူပ်းၽေးလွႆၶူး ၵႂႃႇၸွႆႈၵမ်ႉထႅမ်ပၼ် ၶွင်ၵိၼ်ယမ်ႉလႄႈ ၶူဝ်းၼုင်ႈတၢင်းဝႆ ၸွမ်းႁူင်းႁဵၼ်းမူႇဝၢၼ်ႈ လႅၼ်လိၼ်တႆး – ထႆး။
ဝၼ်းတီႈ 8/2/2020 ၸုမ်းၵမ်ႉထႅမ်ၽူႈထူပ်းၽေးလွႆၶူး ၵႂႃႇၸွႆႈၵမ်ႉထႅမ် ပၼ်ပီႈၼွင်ႉၵူၼ်းပၢႆႈၽေးသိုၵ်း ၸွမ်းလႅၼ်လိၼ် တႆး – ထႆး တၢင်းပွတ်းလွႆလမ် ႁူမ်ႈငိုၼ်းတင်းမူတ်း 9 မိုၼ်ႇဝၢတ်ႇပၢႆ ဝႃႈၼႆ။
ၸၢႆးသိူဝ်တႆး ၽူႈတူင်ႉၼိုင် ၼႂ်းၸုမ်းၵမ်ႉထႅမ်ၽူႈထူပ်းၽေးလွႆၶူး လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ ၸုမ်းၵမ်ႉထႅမ်ၽူႈ ထူပ်းၽေးလွႆၶူး လႆႈဢဝ်ၶွင်ၵိၼ်ယမ်ႉ ၵႂႃႇၸွႆႈၵမ်ႉထႅမ် ၵူၼ်းပၢႆႈၽေးသိုၵ်းႁဝ်းလႄႈ လုၵ်ႈႁဵၼ်းတီႈၶႅမ်ႉပၢင်သဝ်းလွႆလမ် တႃႇရူတ်ႉၵႃး 6 လမ်း မႅၼ်ႈငိုၼ်း 9 မိုၼ်ႇပၢႆ။ ပေႃးသွၼ်ႇပႃး ၵႃႈၸရိပ်ႈဢွၵ်ႇၶၢဝ်းတၢင်းသေ တင်းမူတ်းတေတူၵ်းမႅၼ်ႈယူႇ 1 သႅၼ်ဝၢတ်ႇပၢႆ” ဝႃႈၼႆ။
ယူႇတီႈၸုမ်းၵမ်ႉထႅမ်ၽူႈထူပ်းၽေးလွႆၶူး ဢၼ်လႆႈၵႂႃႇၸွႆႈၵမ်ႉထႅမ်ပၼ် တွၼ်ႈတႃႇ ၵူၼ်းပၢႆႈၽေးသိုၵ်းလႄႈ လုၵ်ႈႁဵၼ်း တီႈလွႆလမ်ၼၼ်ႉသမ်ႉ မိူၼ်ၼင်ႇ ၶဝ်ႈသၢၼ်၊ ၼမ်ႉမၼ်း၊ ၵိူဝ်၊ ၽွင်ဝၢၼ်၊ ငႃးပိ၊ ပႃၼဝ်ႈ၊ ပႃဢႅပ်ႇ၊ ၶဝ်ႈသဵၼ်ႈ၊ ၶဝ်ႈသွႆးႁႅင်ႈ၊ ယႃႈယႃ ၼမ်ႉၵိူဝ် ၶိူင်ႈၶွင်ၸႂ်ႉတႃႈယူတ်းယႃ ၸဵမ်ၸိူဝ်းၼႆႉ။
လိူဝ်ၼၼ်ႉ သိူဝ်ႈဢုၼ်ႇ၊ မၢၵ်ႇၼင် (မၢၵ်ႇသွင်းဝၢႆ)၊ မႆႉပေႃႉၶူၼ်ၵႆႇ၊ သိူဝ်ႈၶူဝ်းမိုဝ်းသွင်ဢၼ်လီ၊ ၶႅပ်း တိၼ်လုၵ်ႈဢွၼ်ႇ၊ ၼူမ်း၊ ႁုၼ်ႇၶွင်လဵၼ်ႈ/ တုၵ်ႉၵတႃ၊ ၶဝ်ႈမုၼ်း၊ ၽႃႈဝႆ၊ ၼိူဝ်ႉၵႆႇ၊ ၼိူဝ်ႉမူ ၸဵမ်ၸိူဝ်းၼႆႉ။
တေႃႈလဵဝ် ၵူၼ်းပၢႆႈၽေးသိုၵ်း ဢၼ်ယူႇသဝ်းဝႆႉ ၸွမ်းလႅၼ်လိၼ် တႆး – ထႆးၼၼ်ႉ တင်းမူတ်း မီးဝႆႉ ႁူဝ်ၵူၼ်း 6 ႁဵင်ပၢႆ။ တင်းမူတ်းၶႅမ်ႉပၢင်သဝ်း မီး 6 တီႈ။ မိူၼ်ၼင်ႇ လွႆလမ်၊ လွႆသၢမ်သိပ်း၊ လွႆၵေႃႇဝၼ်း၊ လွႆတႆးလႅင်း၊ ၵုင်းၵျေႃႇလႄႈ လွႆသၼ် ၸူႉ ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ