ၸႄႈဝဵင်းတႃႈၶီႈလဵၵ်း လႅၼ်လိၼ်တႆး – ထႆးၼၼ်ႉ ပလိၵ်ႈမၢၼ်ႈၵူတ်ႇထတ်းတီႉလႆႈ ၵူၼ်းၸၢဝ်းထႆးၵေႃႉၼိုင်ႈ ယူႇသဝ်း ၼႂ်းဝဵင်းတႃႈၶီႈလဵၵ်းလူၺ်ႈဢမ်ႇပဵၼ်တၢင်းၵၢၼ်တီႉလႆႈပႃးၶိူင်ႈၵွင်ႈၵၢင်ႇတင်းၼမ်။

ဝၼ်းတီႈ 16/2/2020 ယၢမ်းႁူဝ်ၶမ်ႈ မွၵ်ႈ 6 မူင်းၶိုင်ႈၼၼ်ႉ ပလိၵ်ႈတႃႈၶီႈလဵၵ်း ၶဝ်ႈၵူတ်ႇထတ်း ႁိူၼ်းၶၢတ်ႈ လင်ၼိုင်ႈ တီႈ ပွၵ်ႉသၼ်သၢႆး (ၵ) ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်းသေ တီႉလႆႈ ၵူၼ်းၸၢဝ်းထႆးၵေႃႉၼိုင်ႈ လၵ်ႉလွမ်ယူႇ သဝ်းဝႆႉ တီႉလႆႈပႃးၶိူင်ႈၵွင်ႈၵၢင်ႇၸွမ်း ဝႃႈၼႆ။

ပလိၵ်ႈ ၸႄႈဝဵင်းတႃႈၶီႈလဵၵ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ႁဝ်းၶႃႈတီႉလႆႈ ၵူၼ်းထႆးၵေႃႉၼိုင်ႈ ယူႇသဝ်းဝႆႉဢမ်ႇပဵၼ်တၢင်းၵၢၼ်။ ယဝ်ႉၵေႃႈ တီႉလႆႈပႃးထႅင်ႈ ၶိူင်ႈၵွင်ႈၵၢင်ႇ။ မၼ်းတၢင်ႇၸိုဝ်ႈမၼ်းဝႆႉဝႃႈ ၸၢႆးလႃႉ(ႁွင်ႉ) ၸၢႆးသၢမ်သေ ယူႇသဝ်းမႃး” ဝႃႈၼႆ။

ၶိူင်ႈၵွင်ႈၵၢင်ႇ ဢၼ်တီႉလႆႈၼၼ်ႉ ပဵၼ်ၵွင်ႈပွတ်း 1 လဝ်း၊ မၢၵ်ႇၵွင်ႈ 16 လုၵ်ႈ၊ မႅၵ်ႉၵွင်ႈ 1 ဢၼ်။

ၵဵဝ်ႇၵပ်းလွင်ႈၼႆႉ ယူႇတီႈပလိၵ်ႈၶဝ် လႆႈၸွႆးတြႃးပိုတ်ႇလိူင်ႈဝႆႉတီႈႁူင်းပလိၵ်ႈၸႄႈဝဵင်းတႃႈၶီႈလဵၵ်း ၸွမ်းၼင်ႇ ပၵ်းပိူင် မၢႆမီႈ ဝၢၼ်ႈမိူင်းမီး ဝႆႉယဝ်ႉ ပလိၵ်ႈလၢတ်ႈၼႄၽူႈတွႆႇႁွၵ်ႈၼင်ႇၼႆ။

ယၢမ်းလဵဝ် ပဵၼ်ၶၢဝ်းယၢမ်းၶူင်းၵၢၼ်ၸဝ်ႈသိူဝ်လူင် 90 ဝၼ်း တႃႇၽဵဝ်ႈမူၺ်ႉလွင်ႈၵေႃႇၵၢၼ်ႁၢႆႉၼႂ်းၸႄႈဝဵင်းတႃႈၶီႈလဵၵ်း။ ယိူင်းဢၢၼ်းႁႂ်ႈမၢႆမီႈသုမ်ႇငမ်းလႆႈၵူႈတီႈ။ ၵူၺ်းၵႃႈ ဝၼ်းတႄႇၶူင်းၵၢၼ်ဝၼ်းတီႈ 13/2/2020 ၼၼ်ႉၵူၺ်း ၵူၼ်းၸၢႆးၵေႃႉ ၼိုင်ႈ ၺႃးယိုဝ်းတီႈၵၢင်ဝဵင်းတႃႈၶီႈလဵၵ်း။