ရူတ်ႉၵႃးလမ်းၼိုင်ႈ ပဵၼ်ၽေးဢုပၢတ်ႈ ပိၼ်ႈၶႂမ်ႈ ၵူၼ်းမႃးၸွမ်းၼႂ်းၵႃး လႆႈလူႉတၢႆ 4 ၵေႃႉ မၢတ်ႇၸဵပ်း 6 ၵေႃႉ။
ဝၼ်းတီႈ 15/2/2020 ယၢမ်းဝၢႆးဝၼ်း ၵႃးႁၢႆႊလႅတ်ႊ လမ်းၼိုင်ႈ ပိၼ်ႈၶႂမ်ႈ ၼႂ်းၵႄႈသဵၼ်ႈတၢင်း မိူင်းၼွင် – မိူင်းၼၢင်း ၼႂ်း ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ ၼၢင်းယိင်း 4 ၵေႃႉ လႆႈလူႉတၢႆ။ မီးၵူၼ်းမၢတ်ႇၸဵပ်းၸွမ်း 6 ၵေႃႉ ယူႇတီႈၸုမ်းၼမ်ႉၶူင်း ၶႅၵ်ႇလီပၢင်ၸႃႉတႆး ဝဵင်းမိူင်းၼွင် လႆႈတေႃႉသူင်ႇယူတ်းယႃတီႈႁူင်းယႃ လွႆလႅမ်။
ၽူႈတူင်ႉၼိုင် ၼႂ်းၸုမ်းၼမ်ႉၶူင်း ၶႅၵ်ႇလီပၢင်ၸႃႉတႆး ဝဵင်းမိူင်းၼွင် လၢတ်ႈတီႈၽူႈတွႆႇႁွၵ်ႈဝႃႈ “ ပီႈၼွင်ႉလွႆႁဝ်းတၢင်းပွတ်း မိူင်းၼၢင်းၼၼ်ႉ ၶဝ်ၵႂႃႇဢၢပ်ႇၼမ်ႉဢုၼ်ႇတၢင်းၶူဝ်လမ်သေ ၶိုၼ်းပွၵ်ႈမႃး ၵူၼ်းႁေႃႈၵႃးသမ်ႉ တေမဝ်မၢင်ဢိတ်း ၼိုင်ႈ သေ လႆႈဢဝ်ပဵၼ်ၽေးဢုပၢတ်ႈ ပိၼ်ႈၶႂမ်ႈၵႂႃႇ ၼႂ်းၵႄႈမိူင်းၼွင် – မိူင်းၼၢင်းၶႃႈ” ဝႃႈၼႆ။
ၵူၼ်းမႃးၸွမ်းၼႂ်းၵႃး ဢၼ်လႆႈလူႉတၢႆၵႂႃႇ 4 ၵေႃႉၼၼ်ႉ ပဵၼ်ၼၢင်းယိင်းမူတ်း။ ၵူၼ်းထဝ်ႈ 2 ၵေႃႉလႄႈ လုၵ်ႈဢွၼ်ႇယိင်း ဢႃယု 10 ၶူပ်ႇၵေႃႉၼိုင်ႈ၊ 11 ၶူပ်ႇၵေႃႉၼိုင်ႈ။ ၵူၼ်းဢၼ်လႆႈမၢတ်ႇၸဵပ်းၸွမ်း 6 ၵေႃႉတႄႉ လႆႈႁၢမ်သူင်ႇယူတ်းယႃ တီႈ ႁူင်းယႃလွႆလႅမ်။
ထိုင်မႃး ဝၼ်းတီႈ 16/2/2020 ၼၼ်ႉ ယူႇတီႈ ၸုမ်းၼမ်ႉၶူင်း ၶႅၵ်ႇလီပၢင်ၸႃႉတႆး ဝဵင်းမိူင်းၼွင် လႆႈဢဝ်ၶၢပ်ႈတူဝ်တၢႆ ၵူၼ်း 4 ၵေႃႉၼၼ်ႉ ပူၼ်ႉၶၢပ်ႈတူဝ်ၵႂႃႇ ဝႃႈၼႆ။
