ၸွမ်းၼင်ႇ ၾိင်ႈႁိတ်ႈႁွႆးမီးဝႆႉၼၼ်ႉသေ ပွႆးလိူၼ်သီႇမူၼ်း တီႈမိူင်းၵိုင်ပီၼႆႉၵေႃႈ တေၸတ်းႁဵတ်းၵႂႃႇမိူၼ်ၵဝ်ႇယူႇ ဝႃႈၼႆ။

ပေႃးထိုင်မႃး လိူၼ်သီႇမႂ်ႇ 8 ၶမ်ႈ တေႃႇထိုင် လိူၼ်သီႇမူၼ်းၸိုင် ယူႇတီႈသင်ၶၸဝ်ႈ မိူင်းၵိုင် တေဢွၼ်ႁူဝ်ၸတ်းႁဵတ်းပၢင် ပွႆးလိူၼ်သီႇမူၼ်း တီႈထၢတ်ႈမူၺ်ႇတေႃႇမိူင်းၵိုင် ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။

ၸဝ်ႈၶူး သေႃးတေႇယ မိူင်းၵိုင် လုၵ်ႈႁဵၼ်းၸၼ်ႉၸွမ်မႁႃၸုလႃးလူင်းၵွၼ်း Ph.D မိူင်းၵွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ပွႆးလိူၼ်သီႇမူၼ်းတီႈမိူင်းၵိုင်ႁဝ်းၶႃႈပီၼႆႉ သင်ၶၸဝ်ႈမိူင်းၵိုင် တေဢွၼ်ၸတ်းႁဵတ်းၵႂႃႇယူႇၶႃႈ။ ဢၼ်မီးၶၢဝ်ႇလိုဝ်းဝႆႉဝႃႈ တေဢမ်ႇၸတ်း ႁဵတ်းယဝ်ႉ ဢၼ်ဝႃႈၼၼ်ႉ ဢမ်ႇၸႂ်ႈၶႃႈ”ဝႃႈၼႆ။

ယွၼ်ႉတၢင်းပဵၼ် ၸိူဝ်ႉမႅင်းဝႆးရတ်ႊသ်ၶူဝ်ႊရူဝ်ႊၼႃႊ (ၶူဝ်ႊဝိတ်ႉ 19) ဢၼ်ပဵၼ်တီႈဝူႊႁၢၼ်ႊၼၼ်ႉ ၽႄႈဝႆးၸပ်းငၢႆႈသေ ၾၢႆႇပၢႆးယူႇလီတႄႉ ပိုၼ်ၽၢဝ်ႇဝႆႉဝႃႈ ယႃႇႁႂ်ႈၵႂႃႇတီႈၵူၼ်းၵိုၼ်း၊ ႁႂ်ႈပူၵ်ႉသူပ်းပူၵ်ႉပၢၵ်ႇ။ ၵွပ်ႈၼၼ်လႄႈ ဝၼ်းတီႈ 7/2/2020 ဝၼ်းၸိူဝ်ႉၸၢတ်ႈၸိုင်ႈတႆး ပူၼ်ႉမႃးၼႆႉ လၢႆလၢႆဝဵင်းၸွမ်းလႅၼ်လိၼ်ဢမ်ႇၸတ်းႁဵတ်းပွႆး။

ၸဝ်ႈၶူး သေႃးတေႇယ သိုပ်ႇလၢတ်ႈဝႃႈ “ ဢၼ်ၵူၼ်းမိူင်းၵိုင် ႁဝ်းၶဝ် လိုဝ်းၵၼ်ၸွမ်းၼႂ်းၵၢတ်ႇၼႂ်းသႃးဝႃႈ ယွၼ်ႉတၢင်း ပဵၼ်ၸိူဝ်ႉမႅင်းဝႆးရတ်ႊသ်ၶူဝ်ႊရူဝ်ႊၼႃႊတၢင်းမိူင်းၶႄႇၼၼ်ႉသေ တေဢမ်ႇၸတ်းႁဵတ်းပွႆးယဝ်ႉၼႆၼၼ်ႉ ဢမ်ႇၸႂ်ႈၶႃႈ တေ ၸတ်းႁဵတ်း မိူၼ်ပၵ်းၵဝ်ႇ ပိူင်ၵဝ်ႇ မိူၼ်ၵူႈပီပီၵႂႃႇယူႇ”ဝႃႈၼႆ။

ပွႆးလိူၼ်သီႇမိူင်းၵိုင်ၼႆႉ ၸတ်းႁဵတ်းမႃး ၵူႈပီပီ မီးပီႈၼွင်ႉတၵ်ႉၵႃႇသတ်ႉထႃး တီႈၸမ်ၵႆ ဢွၼ်ၵၼ်မႃးသိုဝ်ႉၶၢႆ ၶဝ်ႈႁူမ်ႈလူႇ တၢၼ်း ၵိုၼ်းၶွၼ်ႈ။

ဝၼ်းလိူၼ်သီႇမူၼ်းၼႆႉ ၼႂ်းပိုၼ်းပုတ်ႉထသႃသၼႃၵေႃႈပဵၼ်ဝၼ်း ဢၼ်လမ်ႇလွင်ႈၼၼ်ႉဝၼ်းၼိုင်ႈ။ ပဵၼ်ဝၼ်း ဢၼ် ပုတ်ႉထၽြႃးပဵၼ်ၸဝ်ႈၵူဝ်းတမၶိုၼ်းသူႇ (ၶိုၼ်းပွၵ်ႈဝၢၼ်ႈ ၵဝ်ႇမိူင်းလင်)လႄႈၽူတ်ႇ(ၶျွတ်ႈ) ဢဝ်ပေႃႈမႄႈ ၸိူဝ်ႉၶိူဝ်းၶမ်း ၸဝ်ႈ လႆႈမီးတႃႁၼ်ထမ်း။