ၵူၼ်းၼုမ်ႇ လႃႈသဵဝ်ႈ ၵေႃႉၼိုင်ႈ ၺႃးၾၼ်း

ၵူၼ်းၼုမ်ႇ ၽူႈၸၢႆး ဢႃယု 16 ပီ ၺႃးၾၼ်း မၢတ်ႇၸဵပ်း လႄႈထုၵ်ႇႁၢမ်သူင်ႇယူတ်းယႃတူဝ်တီႈႁူင်းယႃ လႃႈသဵဝ်ႈ။

ဝၼ်းတီႈ 11/2/2020 ယၢမ်းဝၢႆးဝၼ်း 4 မူင်းၼၼ်ႉ ၵူၼ်းၼုမ်ႇ ၽူႈၸၢႆး ဢႃယု 16 ပီ ထုၵ်ႇၵူၼ်းၶဝ်ႈၾၼ်း တီႈၼႂ်းႁိူၼ်း ဢၼ်မီးၾၢႆႇလင်ႁူင်းႁဵၼ်းၸၼ်ႉသုင် မၢႆ 6 ပွၵ်ႉ 5 ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

ၵူဝ်ႇဢွင်ႇၵျေႃႇဢူး ၸုမ်းၸွႆႈထႅမ် ၵူၼ်းၼုမ်ႇတူင်ႇဝူင်းၵူၼ်း လႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ မၼ်းၸၢႆးၺႃးၾၼ်း တီႈႁိူၼ်းမၼ်း။ ၵူၼ်းမႃးၾၼ်းၼၼ်ႉ ဢဝ်မႆႉပေႃႉသႂ်ႇသေ ယဝ်ႉၵေႃႈ ဢဝ်လႅဝ်းၾၼ်းသႂ်ႇ မၼ်းၸၢႆးလႆႈ တိူဝ်ႉမၢတ်ႇၸဵပ်း တီႈၶႅၼ်ၾၢႆႇသၢႆႉ။ တေႃႈလဵဝ်ၼႆႉ လႆႈႁၢမ်သူင်ႇႁူင်းယႃဝႆႉယဝ်ႉ” ဝႃႈၼႆ။

ၵဵဝ်ႇၵပ်းလွင်ႈၼႆႉ ယူတီႈၽူႈမီးပုၼ်ႈၽွၼ်း တိုၵ်ႉၵူတ်ႇထတ်းသွၵ်ႈႁႃ တူဝ်ၵူၼ်းၾၼ်းၼၼ်ႉယူႇ ဝႃႈၼႆ။

ၵူဝ်ႇဢွင်ႇၵျေႃႇဢူး သိုပ်ႇလၢတ်ႈဝႃႈ “ လွင်ႈထုၵ်ႇၺႃးၾၼ်းၼၼ်ႉ မိူၼ်ၶဝ် ယၢမ်ႈၽိတ်းမေႃးၵၼ်ဝႆႉ။ ယူႇတီႈပလိၵ်ႈ တိုၵ်ႉ ၵူတ်ႇသွၵ်ႈႁႃ တူဝ်ၵူၼ်းမႃးၾၼ်းယူႇ။ ၵူၼ်းဢၼ်မႃးၾၼ်းၼၼ်ႉတႄႉ ပႆႇတီႉၺွပ်းလႆႈ”ဝႃႈၼႆ။

ၼႂ်းၸႄႈဝဵင်းလႃႈသဵဝ်ႈၼႆႉ ၵႆႉမီးလွင်ႈၵၢၼ်ၾၼ်းၵၼ် မႃးလႄႈ ၵူၼ်းမိူင်းဢွၼ်ၵၼ်မႆႈၸႂ် လွင်ႈႁူမ်ႇလူမ်ႈ ဝႃႈၼႆ။

ၸၢႆးၵျေႃႇလႃႉ ၵူၼ်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ် ယၢမ်းႁူဝ်ၶမ်ႈၼႆႉ မီးလွင်ႈၵၢၼ်ၾၼ်းၵၼ်တိၵ်း တိၵ်းလႄႈ လႆႈၵူဝ်ၶႃႈဢေႃႈ။ ၵူၼ်းယွင်ႇၵေႃႈၼမ် ၵႂႃႇၵႂႃႇမႃးမႃး ပေႃးလႆႈၾၢင်ႉယူႇတႃႇသေႇၶႃႈ” ဝႃႈၼႆ။

လိူဝ်ၼၼ်ႉ ၼႂ်းၸႄႈဝဵင်းလႃႈသဵဝ်ႈၼႆႉ ၵႆႉမီးလွင်ႈၾၼ်းၵၼ်၊ ၸူၼ်ၵၼ်၊ လၵ်ႉၵၼ် ၸိူဝ်းၼႆႉ ယူႇတီႈၽူႈမီးပုၼ်ႈၽွၼ်း (ပ လိၵ်ႈ) ၶဝ် ဢမ်ႇတီႉၺွပ်းလႆႈ တူဝ်ၵူၼ်းႁၢႆႉလႄႈ ဢမ်ႇမီးလွင်ႈၵႄႈလိတ်ႈပၼ်ႁႃ လႆႈဝႃႈပၵ်းပိူင်မၢႆမီႈဢမ်ႇသုမ်ႇငမ်း သေ ဢိတ်းယဝ်ႉ ၸၢႆးၵျေႃႇလႃႉ လၢတ်ႈၼႄၼင်ႇၼႆ။