Friday, March 29, 2024

ၾၢႆႇပၢႆးယူႇလီဝႃႈ ၼႂ်းမိူင်းတႆး ၵူၼ်းပဵၼ်ဢၼ်မိူၼ်ၶူဝ်ႊရူဝ်ႊၼႃႊ မီး 6 ၵေႃႉ

Must read

ၵူၼ်းမိူင်းတႆး ၸိူဝ်းၵႂႃႇႁဵတ်းၵၢၼ်ၾင်ႇမိူင်းၶႄႇသေ ပွၵ်ႈႁိူၼ်းၶိုၼ်းၼၼ်ႉ ၾၢႆႇမေႃယႃ ၵူတ်ႇထတ်းလႅပ်ႈတိတ်းၸပ်း ၸိူဝ်ႉမႅင်းဝႆးရတ်ႊသ်ၶူဝ်ႊရူဝ်ႊၼႃႊမီး 6 ၵေႃႉ ၽွင်းလူင်ၾၢႆႇပၢႆးယူႇလီ ၸႄႈမိူင်းတႆးလၢတ်ႈ။

Photo by – Mong Nai News/ ႁူင်းယႃ ၸႄႈဝဵင်းမွၵ်ႇမႆႇ

ဝၼ်းတီႈ 9/2/2020 ယၢမ်းၵၢင်ၶမ်ႈၼၼ်ႉ မေႃယႃ ၸႄႈဝဵင်းမွၵ်ႇမႆႇ ၵူတ်ႇႁၼ် ၵူၼ်းပဵၼ်ဝတ်း ဢႆ 4 ၵေႃႉ ငဝ်းလၢႆးလႅပ်ႈ မိူၼ် ၸိူဝ်ႉမႅင်းဝူႊႁၢၼ်ႊ ပဵၼ်ၵူၼ်းဝၢၼ်ႈလွႆၶႂၼ် ဢိူင်ႇႁူဝ်ၼမ်ႉ ၸႄႈဝဵင်းမွၵ်ႇမႆႇ ၸိုင်ႈတႆးပွတ်းၸၢၼ်း တေႃႈလဵဝ် လႆႈ သူင်ႇယူတ်းယႃဝႆႉ တီႈမွၵ်ႇမႆႇ။

- Subscription -

Dr.ၼိၼ်းဢီႉၽိဝ်ႇ ၽူႈႁပ်ႉပုၼ်ႈၽွၼ်းၾၢႆႇၵူတ်ႇထတ်းယူတ်းယႃၵူၼ်းၸပ်းၸိူဝ်ႉမႅင်းၶူဝ်ႊရူဝ်ႊၼႃႊ ၸႄႈမိူင်းတႆး လၢတ်ႈတီႈၽူႈတွႆႇ ႁွၵ်ႈဝႃႈ“ တေႃႈလဵဝ် ဢၼ်လႆႈၵူတ်ႇထတ်း ထၢင်ႇထိူမ်ဝႆႉ တၢင်းပဵၼ်ၸိူဝ်ႉမႅင်းၼႆႉ ၼႂ်းမိူင်းတႆး တင်း မူတ်းမီး 6 ၵေႃႉ။ ယၢမ်းလဵဝ် ဢဝ်လိူတ်ႈၶဝ်သေ တေသူင်ႇၵႂႃႇ ၵူတ်ႇထတ်း တီႈၵုင်းထဵပ်ႈ(မိူင်းၵွၵ်ႇ) ၸိုင်ႈထႆး တေလုၵ်ႉတီႈ တႃႈၵုင်ႈသေ သူင်ႇၵႂႃႇ တီႈဢေႇသုတ်း တေႁိုင်မွၵ်ႈ 3 ဝၼ်း” ဝႃႈၼႆ။

ၵူၼ်းမိူင်း ဢၼ်ထူပ်းႁၼ် မိူၼ်ငဝ်းလၢႆးတၢင်းပဵၼ်ၸိူဝ်ႉမႅင်းဝႆးရတ်ႊသ်ၶူဝ်ႊရူဝ်ႊၼႃႊၼၼ်ႉ ပဵၼ်ၵူၼ်းၸိူဝ်းၵႂႃႇႁဵတ်း ၵၢၼ်တၢင်းၾင်ႇမိူင်းၶႄႇသေ ပွၵ်ႈမႃးၵၼ် ဝႃႈၼႆ။

တေႃႈလဵဝ် ဢၼ်ထူပ်းႁၼ် ထၢင်ႇထိူမ်ဝႃႈ ၸပ်းၶူဝ်ႊရူဝ်ႊၼႃႊမႃးၼႆႉ ၵူၼ်းမိူင်းၼမ်ႉတူႈ ၵေႃႉၼိုင်ႈ၊ ၵူၼ်းသီႇသႅင်ႇ ၵေႃႉ ၼိုင်ႈလႄႈ ၵူၼ်းမွၵ်ႇမႆႇ 4 ၵေႃႉ ဝႃႈၼႆ။

ၸၢႆးလဵၵ်ႉ ၵူၼ်းမွၵ်ႇမႆႇ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ပဵၼ်ၵူၼ်းတၢင်းဝၢၼ်ႈလွႆၶႂၼ်ၼႆႉၶႃႈ။ လွင်ႈတၢင်းဝႃႈ ပဵၼ်ဢမ်ႇပဵၼ်ဢၼ်ဝႃႈၼၼ်ႉ မေႃယႃၶဝ်ပႆႇလၢတ်ႈၶႃႈ။ မေႃယႃၶဝ် တိုၵ်ႉပႂ်ႉတူၺ်းငဝ်းလၢႆးမၼ်းယူႇ။ မိူဝ်ႈၼႆႉ လႆႈငိၼ်း ဝႃႈ ဢမ်ႇမီးလူမ်းၼၢဝ်ယဝ်ႉ။ ၵူၺ်းၵႃႈ မီးဢႆလႄႈ ၶေႃးၸဵပ်းဝႆႉယူႇ”ဝႃႈၼႆ။

Dr.ၼိၼ်းဢီႉၽိဝ်ႇ လၢတ်ႈဝႃႈ “တီႈမွၵ်ႇမႆႇၼႆႉ ၶဝ်ၵႂႃႇႁဵတ်းၵၢၼ်တင်းထုင်ႉမၢဝ်းသေ ပွၵ်ႈမႃး 2 ၵေႃႉ ၶဝ်သမ်ႉ မႃးယူႇတီႈ ႁိူၼ်း။ ၵူၼ်းႁိူၼ်းၶဝ်သမ်ႉမီး 5 ၵေႃႉ။ ႁူမ်ႈၵၼ်တင်းမူတ်း 7 ၵေႃႉ။ မေႃယႃၶဝ်ပႂ်ႉတူၺ်းဝႆႉယူႇ။ ၼႂ်းၼၼ်ႉ 4 ၵေႃႉၼႆႉ ပဵၼ် ႁၢဝ်ႈႁႅင်းဝႆႉလႄႈ လႆႈယႅၵ်ႈဝႆႉတီႈၼိုင်ႈသေ တိုၵ်ႉဢဝ်ၼမ်ႉမုၵ်ႈၼမ်ႉလၢႆး သူင်ႇၵူတ်ႇထတ်းတီႈမိူင်းထႆးဝႆႉယူႇ”ဝႃႈၼႆ။

မေႃယႃလၢတ်ႈဝႃႈ “ တိုၵ်းသူၼ်းထိုင် ၵူၼ်းမိူင်းပိုၼ်ႉတီႈႁဝ်းၶႃႈ ၵူႈၵေႃႉ သင်ဝႃႈ ထူပ်းႁၼ် ၵူၼ်းမိူင်းႁဝ်း ၸိူဝ်း ၵႂႃႇႁဵတ်း ၵၢၼ် တၢင်းမိူင်းၶႄႇသေ ပွၵ်ႈမႃးၸိုင် ႁႂ်ႈပွင်ႇၶၢဝ်ႇၸႅင်ႈၸူးပၼ် ႁွင်ႈၵၢၼ်ၾၢႆႇပၢႆးယူႇလီသေၵမ်း” ဝႃႈၼႆ။

တေႃႈလဵဝ် ၵူၼ်းမိူင်းၸပ်းတၢင်းပဵၼ်ၸိူဝ်ႉမႅင်းဝႆးရတ်ႊသ်ၶူဝ်ႊရူဝ်ႊၼႃႊ တၢင်းလုမ်ႈၾႃႉၼႆႉ မီးၵႂႃႇ 40,235 ၵေႃႉလႄႈ တၢႆ 909 ၵေႃႉ။ သိုဝ်ႇၶၢဝ်ႇ Dingxiangyuan ဢွၵ်ႇဝႆႉၼင်ႇၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း