ဢိင်ၼိူဝ် ၾိင်ႈႁိတ်ႈႁွႆး ၸၢဝ်းတႆး ၼႂ်းပိုၼ်ႉတီႈ ဝၢၼ်ႈမႂ်ႇမွၵ်ႇၸၢမ်သေ ဢွၼ်ၸတ်းႁဵတ်းမႃး ပၢင်ပွႆးယုၵ်ႉယွင်ႈၸဝ်ႈၶူး မေႃ လိၵ်ႈတႆး ပွၵ်ႈထူၼ်ႈ 44။
ဝၼ်းတီႈ 7-9/2/2020 ယူႇတီႈၵေႃၵမ်ၵၢၼ် ပွင်ပဵၼ်ပၢင်ပွႆးယုၵ်ႉယွင်ႈၸဝ်ႈၶူးမေႃလိၵ်ႈတႆး ဢွၼ်ႁူဝ်သေ ၸတ်းႁဵတ်းပၢင် ပွႆးတီႈဝတ်ႉမွၵ်ႇၸၢမ် ဝၢၼ်ႈမႂ်ႇမွၵ်ႇၸၢမ် ဢိူင်ႇတႃႈတွၼ်း ၸႄႈဝဵင်းမႄႈဢၢႆး ၸႄႈတွၼ်ႈၵဵင်းမႆႇ ၸိုင်ႈထႆး မီးပီႈၼွင်ႉၸၢဝ်း တႆး တီႈၸမ်/ ၵႆ ၶဝ်ႈႁူမ်ႈပၼ်ႁႅင်း တင်းၼမ်။
ထိုင်မႃး ဝၼ်းတီႈ 8/2/2020 ၼႂ်းဝၼ်းလိူၼ်သၢမ်မူၼ်း ယၢမ်းၵၢင်ၶမ်ႈ 7 မူင်းၼၼ်ႉ မီးၽူႈယႂ်ႇၵူၼ်းလူင် ၾၢႆႇထႆး ၶဝ်ႈႁူမ်ႈ ပၼ်ႁႅင်းပိုတ်ႇပၢင်ပွႆး။ ယဝ်ႉၵေႃႈ မီးလုၵ်ႈႁဵၼ်း ၵူႈဝၢၼ်ႈဝၢၼ်ႈ ၵႃႈၼႄ ၾိင်ႈႁိတ်ႈႁွႆးၸၢဝ်းၶိူဝ်းၽႂ်မၼ်းၵႂႃႇ။ လိူဝ်ၼၼ်ႉ တၢင်းၵႃႈ ၼူၵ်ႉတူဝ်း။ ၼွၵ်ႈလိူဝ်ၼၼ်ႉ မိူဝ်ႈဝၼ်းတီႈ 7 ယၢမ်းဝၢႆးဝၼ်းၼၼ်ႉၵေႃႈ ၸတ်းႁဵတ်းပႃးပၢင်ဢုပ်ႇၶႆႈ လွင်ႈၾိင်ႈ ႁိတ်ႈႁွႆးတႆး ၼႂ်းပီ 2020 ၼႆႉ တေသိုပ်ႇႁဵတ်းၸိူင်ႉႁိုဝ် ၸိူဝ်းၼႆႉ။
ၼွၵ်ႈလိူဝ်ၼၼ်ႉ မိူဝ်ႈဝၼ်းတီႈ 9 ယၢမ်းၵၢင်ၼႂ် 9 မူင်းၼၼ်ႉ ယူႇတီႈၵေႃၵမ်ၵၢၼ် ပွင်ပဵၼ် ပၢင်ပွႆးယုၵ်ႉယွင်ႈၸဝ်ႈၶူး မေႃ လိၵ်ႈတႆး ဢုပ်ႇဢူဝ်းလွင်ႈဝၼ်းပၢင်ပွႆး ပိူင်ယုၵ်းယၢင်ႇဝႆႉၸူဝ်ႈၶၢဝ်း လွင်ႈမၵ်းမၼ်ႈဝၼ်း ပၢင်ပွႆးယုၵ်ႉယွင်ႈၸဝ်ႈၶူးမေႃ လိၵ်ႈတႆးၵႂႃႇဝႃႈ ၵူႈပီ တေဢွၼ်ၵၼ်ၸတ်းႁဵတ်း ၼႂ်းဝၼ်းတီႈ 12 လိူၼ်ၾႅပ်ႊၿိဝ်ႊရီႊၵႂႃႇ။
ၵေႃၵမ်ၵၢၼ် ပွင်ပဵၼ်ပၢင်ပွႆးယုၵ်ႉယွင်ႈၸဝ်ႈၶူးမေႃလိၵ်ႈတႆး ပွၵ်ႈထူၼ်ႈ 44 ၼႆႉ ယူႇတီႈသၢမ်ၸႄႈဝဵင်း မိူၼ်ၼင်ႇ မႄႈ ဢၢႆး၊ မိူင်းၾၢင်လႄႈ ၶျၢႆးပရႃႇၵၢၼ်း ႁူမ်ႈၵၼ်သေ ၶွတ်ႇၽွတ်ႈဝႆႉ။
ပီႈၼွင်ႉတႆး ၶဝ်ႈမႃးပၵ်းတင်ႈတီႈယူႇတၼ်းသဝ်း ၼႂ်းမိူင်းထႆး တီႈဝၢၼ်ႈမႂ်ႇမွၵ်ႇၸၢမ် မိူဝ်ႈၽွင်းပီ 1962 ။ ထိုင်မႃးမိူဝ်ႈ 19 လိူၼ်ၵျႅၼ်ႊၼိဝ်ႊရီႊ 1973 ၸဝ်ႈမုၼ်ယႂ်ႇၶုၼ်ႁေႃၶမ်းထႆး (တူၼ်ႈတီႈ 9) မႃးယဵမ်ႈသူႇၸႂ်း ပီႈၼွင်ႉတႆး တီႈဝၢၼ်ႈမႂ်ႇမွၵ်ႇ ၸၢမ်၊ မႃးပၼ်တၢင်းၶႆႈၸႂ်လႄႈ ပၼ်တိုဝ်ႉတၢင်း ၸတ်းပၢင်ပွႆးယုၵ်ႉယွင်ႈ ၸဝ်ႈၶူးမေႃလိၵ်ႈတႆး။ တင်ႈတႄႇပၢၼ် ၼၼ်ႉမႃး ၸတ်းမႃးၵူႈသိုပ်ႇပီသေ ထိုင်ပီ 2020 ၼႆႉ ၶွပ်ႈထူၼ်ႈ 44 ပီ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ