ငဝ်ႈငုၼ်းပႃႇတီႇမႂ်ႇသုင် ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ၸတ်းႁဵတ်း ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 73 ပီ မီးသင်ၶၸဝ်ႈ၊ ၵူၼ်းမိူင်းလႄႈ ၵူၼ်းသိုၵ်း ၶဝ်ႈႁူမ်ႈ 2,400 ပၢႆ။
ဝၼ်းတီႈ 7/2/2020 ယၢမ်းၵၢင်ၼႂ် 7 မူင်းၶိုင်ႈ တေႃႇထိုင် 9 မူင်းၶိုင်ႈ ယူႇတီႈပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ဢွၼ်ၸတ်းႁဵတ်းပၢင်ၵႅဝ်ႈ ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 73 ပီ တီႈႁူင်းႁဵၼ်းသိုၵ်းငဝ်ႈငုၼ်း SSPP /SSA ဝၢၼ်ႈႁႆး။
ၸွမ်သိုၵ်းလူင် သိူဝ်ထႅၼ်ႈ ၽူႈၼမ်းၼႃႈ SSPP/SSA မွၵ်ႇလၢတ်ႈၶေႃႈၵႂၢမ်းဝႃႈ “ ဝၼ်းၶိူဝ်းတႆးၼႆႉ တႄႇမၵ်းမၼ်ႈၵၼ်မႃး ၼႂ်းဝၼ်းတီႈ 7 လိူၼ်ၾႅပ်ႊၿိဝ်ႊရီႊ 1947 သေ ၵူၼ်းမိူင်းတႆး လႆႈတူၵ်းလူင်းၵၼ် တႃႇဢဝ်လွတ်ႈလႅဝ်းသဝ်းၶေႃ ၵိုၵ်းၵၼ် တင်းမိူင်းမၢၼ်ႈမႃးၼႂ်းဝၼ်းလဵဝ်ၵၼ်ယဝ်ႉ။ တုင်းၸိူဝ်ႉၸၢတ်ႈၸိုင်ႈတႆးလႄႈ ၵႂၢမ်းတၢင်ႇတုင်း ၸိူဝ်းၼၼ်ႉၵေႃႈ လႆႈမၵ်း မၼ်ႈၵၼ်မႃး ၼႂ်းဝၼ်းလဵဝ်ၵၼ်ၼၼ်ႉ”ဝႃႈၼႆ။
ၼႂ်းပၢင်ၵႅဝ်ႈၼၼ်ႉ မီးသင်ၶၸဝ်ႈ၊ ၽူႈယႂ်ႇၵူၼ်းလူင်၊ ၵူၼ်းသိုၵ်း၊ ဢိၵ်ႇတင်းလုၵ်ႈႁဵၼ်းၼေႃႇတႅၼ်းၶိူဝ်းငဝ်ႈငုၼ်း SSPP လႄႈ လုၵ်ႈႁဵၼ်းၸၼ်ႉၸွမ်ဝဵင်းလႃႈသဵဝ်ႈ ၶဝ်ႈႁူမ်ႈ 2,400 ပၢႆ။
လိူဝ်ၼၼ်ႉ ယူႇတီႈပႃႇတီႇႁူဝ်သိူဝ်လႄႈ သိူဝ်ၽိူၵ်ႇၵေႃႈ သူင်ႇၽိုၼ်လိၵ်ႈယိုၼ်ႈထိုင် တႃႇပၢင်ၵႅဝ်ႈဝၼ်းၸိူဝ်ႉၸၢတ်ႈၸိုင်ႈ တႆးၶွပ်ႈၶူပ်ႇ 73 ပီ။ ၽူႈတၢင်တူဝ်ၵူၼ်းမိူင်းလႄႈ သင်ၶၸဝ်ႈ မွၵ်ႇလၢတ်ႈၶေႃႈၵႂၢမ်းၵႂႃႇ။
