မုၵ်ႉၸုမ်းသင်ၶတႆး လုၵ်ႈႁဵၼ်း ၸၼ်ႉၸွမ် မိူင်းၵွၵ်ႇ ၸိုင်ႈထႆး ၸတ်းႁဵတ်း မၢႆတွင်းဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 73 ပီ တီႈဝတ်ႉမႂ်ႇတႆး မိူင်းၵွၵ်ႇ ပဵၼ်ပွၵ်ႈၵမ်းႁႅၵ်ႈ။
ဝၼ်းတီႈ 7/2/2020 ယၢမ်းၵၢင်ၼႂ် 9 မူင်းထိုင် 4 မူင်းဝၢႆးဝၼ်း ယူႇတီႈ မုၵ်ႉၸုမ်းသင်ၶတႆး လုၵ်ႈႁဵၼ်း ၸၼ်ႉၸွမ် မိူင်းၵွၵ်ႇ ၸိုင်ႈထႆး ဢွၼ်ႁူဝ်ၸတ်းႁဵတ်း ပၢင်ၶေႉၶဵင်ႇႁိမ်ၼမ်ႉၵႂၢမ်း၊ ပၢင်မွၵ်ႇလၢတ်ႈၶေႃႈၵႂၢမ်းလႄႈ ပၢင်ဢုပ်ႇ/ တၢၼ်ႈၶႆႈ တႃႇမၢႆ တွင်း ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 73 ပီ တီႈဝတ်ႉမႂ်ႇတႆး မိူင်းၵွၵ်ႇ ၸိုင်ႈထႆး။
ၸဝ်ႈၶူး ဢိတ်ႉသရိယ ႁူဝ်ပဝ်ႈ လုၵ်ႈႁဵၼ်းသင်ၶတႆး ၸၼ်ႉၸွမ်မိူင်းၵွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ယိူင်းဢၢၼ်း ဢၼ် လႆႈၸတ်းႁဵတ်းၼႆႉ မီး 3 ၶေႃႈ။ မိူၼ်ၼင်ႇ တႃႇၽိူမ်ႉထႅမ်ၼမ်ႉၵတ်ႉၵၢၼ်လၢတ်ႈဢင်းၵိတ်း ၼႂ်းမုၵ်ႉၸုမ်းသင်ၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ ၸိုင်ႈထႆး၊ တႃႇသၢင်ႈလွင်ႈမိုတ်ႈၵိုဝ်းၸမ်ၸႂ် ၵၼ်တင်း လုၵ်ႈႁဵၼ်းတႆး ၵူႈၸၼ်ႉၸွမ် ဢၼ်မီးၼႂ်းမိူင်းၵွၵ်ႇ ၸိုင်ႈထႆးၼႆႉလႄႈ တႃႇႁႂ်ႈပဵၼ်တီႈမၢႆတွင်း ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 73 ပီ” ဝႃႈၼႆ။
ၼႂ်းပၢင်ႁူပ်ႉထူပ်းဢုပ်ႇဢူဝ်းၵၼ် တီႈဝတ်ႉမႂ်ႇတႆး မိူင်းၵွၵ်ႇၼႆႉ မီးသင်ၶလႄႈ တၵ်ႉၵႃႇသတ်ႉထႃး ၶဝ်ႈႁူမ်ႈ 50 ပၢႆ။
ၼႂ်းၶပ်ႉမၢႆသမ်ႉ တွၼ်ႈၵၢင်ၼႂ် 9 မူင်း ထိုင် 10 မူင်းၶိုင်ႈ ပဵၼ်ၶၵ်ႉတွၼ်ႈ ပၢင်ၶေႉၶဵင်ႇႁိမ်ၼမ်ႉၵႂၢမ်းလႄႈ ပၢင်ၶေႉၶဵင်ႇ မွၵ်ႇ လၢတ်ႈၶေႃႈၵႂၢမ်း။ တွၼ်ႈဝၢႆးဝၼ်း 12 မူင်းၶိုင်ႈ ထိုင် 4 မူင်းသမ်ႉ ပဵၼ်ၶၵ်ႉတွၼ်ႈ ပၢင်ဢုပ်ႇၶႆႈ။ ၼႂ်းၼၼ်ႉ မီးသင်ၶၸဝ်ႈ 2 တူၼ်လႄႈ ၸုမ်းလုၵ်ႈႁဵၼ်းၼၢင်းယိင်းတႆး ၸၼ်ႉၸွမ် မႁႃႇပၸႃႇပတိၵေႃးတမီႇ မႃးဢုပ်ႇၶႆႈၵႂႃႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ