ၸၢဝ်းၶႄႇ ၵေႃႉၼိုင်ႈ မႃးလူႉတၢႆ ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။
ဝၼ်းတီႈ 6/2/2020 ယူႇတီႈၸုမ်းၸွႆႈထႅမ် ၵရုၼႃႇ မူႇၸေႊ လႆႈဢဝ်ၽွင်တဝ်ႈလုပ်ႇ ၸၢဝ်းၶႄႇ ဢၼ်မႃးလူႉတၢႆ တီႈဝဵင်း မူႇၸေႊၼၼ်ႉသေ မွပ်ႈပၼ် တၢင်းၸဝ်ႈၼႃႈတီႈၾင်ႇမိူင်းၶႄႇၵႂႃႇယဝ်ႉ ဝႃႈၼႆ။
ဢူးတွင်းထုၼ်း ၽူႈၸွႆႈထႅမ် ၼႂ်းၸုမ်းၵရုၼႃႇ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ တေပဵၼ်ၵူၼ်းဢၼ်ၵဵဝ်ႇၶွင်ႈၸွမ်းသေ ၸုမ်းၸုမ်းၸွမ်းလႅၼ်လိၼ်ၼႆႉၶႃႈ။ ႁူင်းယႃ လႆႈၵူတ်ႇထတ်းတူၺ်းသေ ႁူႉတႄႉ ၵူၼ်းတၢႆၼၼ်ႉ ပဵၼ်တၢင်းပဵၼ် မၢၵ်ႇႁူဝ် ၸႂ်လႄႈ ပွတ်ႇၵႂ်ႈ။ ပဵၼ်တၢင်းပဵၼ် ပွတ်ႇ TB ”ဝႃႈၼႆ။
ၸၢဝ်းၶႄႇ ၵေႃႉဢၼ်မႃးတၢႆတၢင်းမူႇၸေႊၼႆႉ ပဵၼ်ၵူၼ်းၸႄႈဝဵင်းလႂ် ယူႇတီႈလႂ် ဢၼ်ဝႃႈၼၼ်ႉ ပႆႇႁူႉ ဝႃႈၼႆ။
ၸၢဝ်းၶႄႇ ၵေႃႉဢၼ်မႃးတၢႆတီႈမူႇၸေႊၼႆႉ လႆႈလူႉတၢႆၵႂႃႇမိူဝ်ႈဝၼ်းတီႈ 4/2/2020 ၼၼ်ႉ ထိုင်မႃး ဝၼ်းတီႈ 6/2/2020 ၸင်ႇဢဝ်ၽွင်တဝ်ႈလုပ်ႇ သူင်ႇပၼ်တၢင်းမိူင်းၶႄႇ ဝႃႈၼႆ။
ၼွၵ်ႈလိူဝ်သေၼၼ်ႉ တၢင်းလူင်ပွင်ၸိုင်ႈမိူင်းၶႄႇၵေႃႈ ပိုၼ်ၽၢဝ်ႇ ဢွၵ်ႇဝႆႉဝႃႈ ၵူၼ်းမိူင်းၶႄႇ 5 ၵေႃႉ ပဵၼ်တၢင်းပဵၼ် ၶူဝ်ႊ ရူဝ်ႊၼႃႊသေ ၶဝ်ႈၵႂႃႇတၢင်းလႅၼ်လိၼ် တႆး – ၶႄႇ တၢင်းမူႇၸေႊ ဝႃႈၼႆ။
ၵူၼ်းၸၢဝ်းၶႄႇ 5 ၵေႃႉၼၼ်ႉ လုၵ်ႉတၢင်းမိူင်းဝူႊႁၢၼ်ႉသေ မႃးတၢင်း မိူင်းမၢဝ်း၊ လုၵ်ႉမိူင်းမၢဝ်း ၶဝ်ႈမႃးတၢင်း မူႇၸေႊ။ ၾၢႆႇလူင်ပွင်ၸိုင်ႈၶႄႇ ပွင်ႇၶၢဝ်ႇဝႆႉတီႈၽူႈမီးပုၼ်ႈၽွၼ်း တၢင်းၾင်ႇမူႇၸေႊဝႃႈ သင်ဝႃႈ ထူပ်းႁၼ် ၵူၼ်းၶႄႇ 5 ၵေႃႉ ၼၼ်ႉၸိုင် ႁႂ်ႈပွင်ႇၶၢဝ်ႇၸူး ၾင်ႇမိူင်းၶႄႇ ဝႃႈၼႆ။
တေႃႈလဵဝ်ၼႆႉ ၵူၼ်းၸပ်းတၢင်းပဵၼ်ၸိူဝ်ႉမႅင်း ၶူဝ်ႊရူဝ်ႊၼႃႊ တၢင်းလုမ်ႈၾႃႉ လၢႆလၢႆမိူင်းၼႆႉ မီးၵႂႃႇ 31,525 ၵေႃႉ၊ တၢႆ 638 ၵေႃႉ လႄႈ ႁၢႆၶႅၼ်း 1,568 ၵေႃႉ ယူႇတီႈၶၢဝ်ႇ South China Morning Post ဢွၵ်ႇဝႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ