ဢိင်ၼိူဝ်လွင်ႈတၢင်းပဵၼ်ၸိူဝ်ႉမႅင်းၶူဝ်ႊရူဝ်ႊၼႃႊၼႆႉသေ တီႈပၢင်ၵၢတ်ႇမၢၵ်ႇမႆႉ 105 လၵ်းၼႆႉ ၵူၼ်းမိူင်းၾင်ႇမိူင်းၶႄႇ ဢမ်ႇၶဝ်ႈမႃးသိုဝ်ႉလႄႈ မီးလွင်ႈတုမ်ႉယွၼ်ႈလူႉ သုမ်း ႁူဝ်ပၢၵ်ႇလႂ် မွၵ်ႈ 70 % ၽူႈမီးပုၼ်ႈၽွၼ်းလၢတ်ႈ။
ဢူးၶိၼ်ႇမွင်ႇ ၵႅမ်ႁူဝ်ပဝ်ႈ ပၢင်ၵၢတ်ႇၶၢႆမၢၵ်ႇမႆႉ 105 လၵ်း လၢတ်ႈတီႈၽူႈတွႆႇႁွၵ်ႈဝႃႈ “ ၵၢၼ်သိုဝ်ႉၶၢႆ တီႈလႅၼ်လိၼ်တႄႉ ဢမ်ႇဢိုတ်းၶႃႈ။ ၵူၺ်းၵႃႈ ပူၼ်ႉမႃးၼၼ်ႉ ၵူၼ်းတၢင်းမိူင်းၶႄႇၶဝ် ၶဝ်ႈမႃးသိုဝ်ႉတၢင်းၼႆႉ ဢမ်ႇမီး သုမ်းႁူဝ်ပၢၵ်ႇလႂ် 70 % ဢေႃႈ။ တေႃႈလဵဝ်တႄႉ မီးမႃး ၵမ်ႈၽွင်ႈယဝ်ႉ။ ၵွပ်ႈၼၼ် ဝူင်ႈတေမႃးၼႆႉ လႅပ်ႈမီးၵူၼ်းမိူင်းၶႄႇ ၶဝ်ႈမႃးသိုဝ်ႉတင်းၼမ် ယဝ်ႉ။ တေႃႇဝၼ်းၼႆႉ တေမီးၵူၼ်းမိူင်းၶႄႇမႃးသိုဝ်ႉ မွၵ်ႈ 100 ပၢႆၼႆႉယူႇ” ဝႃႈၼႆ။
မိူဝ်ႈပူၼ်ႉမႃးလၢႆဝၼ်းၼႆႉ ၵူၼ်းမိူင်းၶႄႇ ၶဝ်ႈမႃးသိုဝ်ႉမၢၵ်ႇမႆႉ တီႈပၢင်ၵၢတ်ႇ 105 လၵ်းၼႆႉ ၼိုင်ႈဝၼ်း မီး 30-40 ၵေႃႉ ၵႃႈၼႆႉၵူၺ်း ဝႃႈၼႆ။
ဢူးၶိၼ်ႇမွင်ႇ သိုပ်ႇလၢတ်ႈဝႃႈ “မိူဝ်ႈပူၼ်ႉမႃး လၢႆဝၼ်းၼႆႉ ၵူၼ်းမိူင်းၶႄႇ မႃးသိုဝ်ႉမၢၵ်ႇမႆႉ မီးမွၵ်ႈ 30-40 ၵေႃႉ။ မိူဝ်ႈဝႃး တင်းမိူဝ်ႈၼႆႉတႄႉ မီးမွၵ်ႈ 70 ပၢႆယဝ်ႉ။ ပေႃးလင်ဝၼ်းတီႈ 10 ၵႂႃႇၼႆႉ လႅပ်ႈတေမႃးၼမ်ၵၼ်ယူႇ။ ၼိုင်ႈဝၼ်းလႂ် ၵႃးတေႃႉ တႅင် ၼႂ်းမိူင်းႁဝ်း ၶဝ်ႈမႃးတီႈပၢင်ၵၢတ်ႇၼႆႉ တေမီးမွၵ်ႈ 20 လမ်းပၢႆ တေႃႇဝၼ်း ၵႃႈၼႆႉၵူၺ်း။ ယွၼ်ႉဝႃႈ ၸဝ်ႈသူၼ်၊ ၵူၼ်း ၵႃႉၶဝ် ဢမ်ႇႁတ်းတေႃႉဢဝ်မႃးၶၢႆၵၼ် ၵူဝ်သုမ်းၼၼ်ႉၶႃႈယဝ်ႉ။ ပေႃးဝႃႈ ၵၢၼ်သိုဝ်ႉၶၢႆ လီမႃးမိူၼ်ၵဝ်ႇယဝ်ႉတႄႉ လႅပ်ႈ တေတေႃႉၵၼ် ၶိုၼ်ႈမႃးၼမ်ၶိုၼ်းယဝ်ႉ” ဝႃႈၼႆ။
တေႃႈလဵဝ် ၵူၼ်းၸပ်းတၢင်းပဵၼ်ၸိူဝ်ႉမႅင်း ၶူဝ်ႊရူဝ်ႊၼႃႊ တၢင်းလုမ်ႈၾႃႉ လၢႆလၢႆမိူင်းၼႆႉ မီးၵႂႃႇ 28,339 ၵေႃႉ၊ တၢႆ 565 ၵေႃႉလႄႈ ယူတ်းယႃႁၢႆလီၶိုၼ်း 1,208 ၵေႃႉ သိုဝ်ႇၶၢဝ်ႇ South China Morning Post ဢွၵ်ႇဝႆႉ။
