ငဝ်ႈငုၼ်းဝၢၼ်းႁႆး SSPP တေၸတ်းႁဵတ်းဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 73 ပီ ႁွင်ႉမွၵ်ႇၵူၼ်းဝၢၼ်ႈ ၵူၼ်းမိူင်း ၶဝ်ႈႁူမ်ႈၼပ်ႉႁဵင်။
ဝၼ်းတီႈ 7/2/2020 ပဵၼ်ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 73 ပီလႄႈ ယူႇတီႈငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး/ တပ်ႉ သိုၵ်းၸိုင်ႈတႆး SSPP/SSA တေဢွၼ်ႁူဝ်သေ ၸတ်းႁဵတ်းပၢင်ၵႅဝ်ႈ/ ပၢင်ပွႆး တီႈငဝ်ႈငုၼ်းဝၢၼ်ႈႁႆး ၵူၼ်းဝၢၼ်ႈၵူၼ်းမိူင်း ၼႂ်းထုင်ႉသီႇပေႃႉ၊ မိူင်းၵိုင်၊ ၵေးသီး၊ မိူင်းသူႈ၊ တၢင်ႉယၢၼ်း ၸိူဝ်းၼႆႉ တေၶဝ်ႈႁူမ်ႈၼပ်ႉႁဵင် ဝႃႈၼႆ။
ၸဝ်ႈႁၢၼ် တၢၼ်းဢွင်ႇ ၽူႈၶၢၼ်ပၢၵ်ႇ SSPP လၢတ်ႈတီႈၽူႈတွႆႇႁွၵ်ႈဝႃႈ “ ပီၼႆႉ တီႈငဝ်ႈငုၼ်းဝၢၼ်ႈႁႆး ၸတ်းႁဵတ်း ဝၼ်း ၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 73 ပီယူႇၶႃႈ။ ၵူၺ်းၵႃႈ ႁဝ်းၶႃႈ ဢမ်ႇၸတ်းယႂ်ႇၸတ်းလူင်။ တေၸတ်းႁဵတ်းမၢႆတွင်း ၼႂ်း ဝၼ်းယႂ်ႇလူင် မိူဝ်ႈၽုၵ်ႈၼႆႉၶႃႈ။ ႁဝ်းၶႃႈတေၸတ်းႁဵတ်းဝၼ်းလဵဝ် ၼႂ်းဝၼ်းတီႈ 7 ယၢမ်းၵၢင်ဝၼ်း” ဝႃႈၼႆ။
ပၢင်ၵႅဝ်ႈ ဝၼ်းၸိူဝ်ႉၸၢတ်ႈၸိုင်ႉတႆး ၶွပ်ႈတဵမ် 73 ပီ တီႈငဝ်ႈငုၼ်းဝၢၼ်ႈႁႆးၼႆႉ ဢၢၼ်းဝႆႉ ၽူႈၶဝ်ႈႁူမ်ႈပၢင်ၵႅဝ်ႈ မွၵ်ႈ 3 ႁဵင်ၵေႃႉ။
ၸဝ်ႈႁၢၼ် တၢၼ်းဢွင်ႇ သိုပ်ႇလၢတ်ႈဝႃႈ “ ပီၼႆႉတႄႉ ယွၼ်ႉႁဝ်းၶႃႈဢမ်ႇၸတ်းယႂ်ႇလႄႈ ႁဝ်းၶႃႈ တေမွၵ်ႇထိုင် ပေႃႈမႄႈ ၵူၼ်းမိူင်းႁဝ်းၼႂ်းပိုၼ်ႉတီႈႁိမ်းႁွမ်းႁဝ်းၼႆႉၵူၺ်း ဢၢၼ်းဝႆႉ ႁူဝ်ၵူၼ်းမွၵ်ႈ 2,500 ထိုင် 3,000 ၵေႃႉၼႆႉ”ဝႃႈၼႆ။
ၶပ်ႉမၢႆ ပၢင်ၵႅဝ်ႈ ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 73 ပီ တီႈငဝ်ႈငုၼ်းဝၢၼ်ႈႁႆးၼႆႉ ဢွၼ်တၢင်းသုတ်း တေဢွၼ်တၢင်ႇ တုင်းၸိူဝ်ႉၸၢတ်ႈ တၵ်ႉယမ်တုင်းၸိူဝ်ႉၸၢတ်ႈ၊ မွၵ်ႇပၢင်းသင်ၶၸဝ်ႈ မွၵ်ႇလၢတ်ႈၶေႃႈ/ ပၼ်ဢေႃးဝႃႇတ၊ ၸွမ်သိုၵ်း လူင် သိူဝ်ထႅၼ်ႈ မွၵ်ႇလၢတ်ႈၶေႃႈၵႂၢမ်းၶႆႈၼႄပိုၼ်း လွင်ႈပဵၼ်မႃး ၾႅပ်ႊၿိဝ်ႊရီႊ 7 ဝၼ်း။ ယဝ်ႉၵေႃႈ တေမီးၽူႈၵႅဝ်ႈပၢင်လူ ဢၢၼ်ႇၼႄ ၽိုၼ်လိၵ်ႈယိုၼ်ႈထိုင်မႃး ၸိူဝ်းၼႆႉ။
ၽိုၼ်လိၵ်ႈဢၼ်ယိုၼ်ႈထိုင်မႃး ၼႂ်းဝၼ်းၸိူဝ်ႉၸၢတ်ႈၸိုင်ႈတႆးၶွပ်ႈတဵမ် 73 ပီ တီႈငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး (ဝၢၼ်ႈ ႁႆး) ၼၼ်ႉ ပႃႇတီႇႁူဝ်သိူဝ်၊ ပႃႇတီႇသိူဝ်ၽိူၵ်ႇလႄႈ တၢင်တူဝ် ၵူၼ်းမိူင်းမွၵ်ႇ လၢတ်ႈၶေႃႈၵႂၢမ်း ၸဵမ်ၸိူဝ်းၼႆႉ။
