တူဝ်တႅၼ်းလူင်ပွင်ၸိုင်ႈမၢၼ်ႈ တင်း တပ်ႉသိုၵ်းမၢၼ်ႈၼေႇပျီႇတေႃႇ တေၵႂႃႇၶဝ်ႈႁူမ်ႈ ဝၼ်းၸိူဝ်ႉၸၢတ်ႈ ၸိုင်ႈတႆး ၶွပ်ႈ 73 ပီ ဢၼ်ၶွင်ႇသီႇဢဝ်ၶိုၼ်းၸိုင်ႈတႆး RCSS/SSA ဢွၼ်ၸတ်းႁဵတ်း တီႈငဝ်ႈၸိုင်ႈ လွႆတႆးလႅင်း။

ဝၼ်းတီႈ 7/2/2020 ၼႆႉ ပဵၼ်ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 73 ပီသေ ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉ သိုၵ်းၸိုင်ႈတႆး RCSS/SSA ဢွၼ်ႁူဝ်ၸတ်းႁဵတ်းပၢင်ပွႆး တီႈငဝ်ႈၸိုင်ႈလွႆတႆးလႅင်း၊ ယူႇတီႈတူဝ်တႅၼ်းၾၢႆႇလူင်ပွင် ၸိုင်ႈ မၢၼ်ႈလႄႈ တပ်ႉသိုၵ်းမၢၼ်ႈ (တပ်ႉမတေႃႇ) တေၶဝ်ႈႁူမ်ႈၸွမ်း ဝႃႈၼႆ။

ၸဝ်ႈသိုၵ်း ၸၢႆးမိူင်း ၽူႈၶၢၼ်ပၢၵ်ႇ RCSS/SSA လၢတ်ႈတီႈၽူႈတွႆႇႁွၵ်ႈဝႃႈ “ တၢင်းၾၢႆႇလူင်ပွင်ၸိုင်ႈတႄႉ တေမႃး 6 ၵေႃႉ၊ ယဝ်ႉၵေႃႈ ၾၢႆႇတၢင်းတပ်ႉမတေႃႇၶဝ် တေမႃး 5 ၵေႃႉ တင်းမူတ်း တေပဵၼ် 11 ၵေႃႉ။ ၶဝ်တေလုၵ်ႉတၢင်း တႃႈၶီႈလဵၵ်း – မႄႈသၢႆမႃး တေမႃးႁွတ်ႈၽႅဝ် မိူဝ်ႈၼႆႉ ဝၼ်းတီႈ 6 ” ဝႃႈၼႆ။

တူဝ်တႅၼ်းၾၢႆႇလူင်ပွင်ၸိုင်ႈမၢၼ်ႈ လႄႈ တပ်ႉသိုၵ်း(တပ်ႉမတေႃႇ) ဢၼ်ၵႂႃႇၶဝ်ႈႁူမ်ႈ တီႈပၢင်ပွႆးဝၼ်းၸိူဝ်ႉၸၢတ်ႈငဝ်ႈ ၸိုင်ႈ လွႆတႆးလႅင်း ၾၢႆႇလူင်ပွင်ၸိုင်ႈမၢၼ်ႈ ဢူးထုၼ်းထုၼ်းဢူး ၵႅမ်ႁူဝ်ပဝ်ႈ NRPC ဢွၼ်ႁူဝ် လိူဝ်ၼၼ်ႉ တေပႃး ၸဝ်ႈသိုၵ်းလူင် လႃႉဢူး ၽွင်းလူင်ၾၢႆႇၵႅတ်ႇၶႄလႄႈ ႁူမ်ႇလူမ်ႈလႅၼ်လိၼ်၊ ဢူးမူဝ်းၸေႃႇဢူး၊ ဢူးၼၢႆႇငၢၼ်ႇလိၼ်း၊ ဢူးၵျေႃႇလိၼ်းဢူး လႄႈ ဢူးမဵဝ်းလုၼ်ႇ ၾၢႆႇၵမ်ႉၸွႆႈၵၢၼ်လုမ်း ၸိူဝ်းၼႆႉ။

ၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈ( တပ်ႉမတေႃႇ) သမ်ႉ ၸွမ်သိုၵ်းဢေးဝိၼ်း ဢွၼ်ႁူဝ် မီးၵႅမ်ၽူႈၵွၼ်းတိူင်းသိုၵ်းသၢမ် ၸဵင်ႇၵဵင်းတုင်၊ ၵႅမ်ၽူႈၵွၼ်းတိူင်းသိုၵ်း ယလၶ ၶူဝ်လမ် ၸွမ်းထႅင်ႈ 2 ၵေႃႉ ဝႃႈၼႆ။

ၸဝ်ႈသိုၵ်း ၸၢႆးမိူင်း လၢတ်ႈဝႃႈ “ လုမ်းၽွင်းတၢင်ၼွၵ်ႈမိူင်းၶဝ်တႄႉ ဢၼ်လႆႈႁူႉဝႆႉတႄႉ တၢင်းမိူင်းၶႄႇတႄႉ တေဢမ်ႇမႃး ၶဝ်ႈႁူမ်ႈ၊ တၢင်းမိူင်းသဝိတ်ႉသိူဝ်ႊလႅၼ်ႊလႄႈ ၼႄႊထိူဝ်ႊလႅၼ်ႇ ၸိူဝ်းၼႆႉ တေမႃးယူႇ” ဝႃႈၼႆ။

လိူဝ်ၼၼ်ႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ဢၼ်လူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉတူဝ်ႈမိူင်း NCA တင်းမူတ်း ဝႃႈၼႆ။

ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 72 ပီ ပူၼ်ႉမႃးၼၼ်ႉ ယူႇတီႈတူဝ်တႅၼ်းလူင်ပွင်ၸိုင်ႈမၢၼ်ႈၵေႃႈ ၵႂႃႇၶဝ်ႈႁူမ်ႈ ပၼ် ႁႅင်း။

ငဝ်ႈၸိုင်ႈၶွင်ႇသီႇဢဝ်ၶိုၼ်းၸိုင်ႈတႆး RCSS/SSA ၸတ်းႁဵတ်းပၢင်ပွႆးဝၼ်းၸိူဝ်ႉၸၢတ်ႈၸိုင်ႈတႆးမႃးၵူႈပီ၊ ပီၵၢႆ မီးၶႅၵ်ႇၶိုၵ်ႉ တွၼ်းၼွၵ်ႈမိူင်းၼႂ်းမိူင်း ၽွင်းတၢင်လၢႆလၢႆမိူင်းၶဝ်ႈႁူမ်ႈတင်းၼမ်။ ပီၼႆႉၵေႃႈ လႆႈႁူႉဝႃႈ တေမႃးၶဝ်ႈႁူမ်ႈၼမ်ယူႇ ဝႃႈၼႆ။

ဝၼ်းတီႈ 7 ၾႅပ်ႊၿိဝ်ႊရီႊၼႆႉ ပဵၼ်ဝၼ်းတႄႇသၼ်ႇထေႇမိူင်းႁူမ်ႈတုမ်။ ပေႃးဢမ်ႇမီးဝၼ်းတီႈ 7 ၾႅပ်ႊၿိဝ်ႊရီႊ၊ ဝၼ်းမိူင်း ႁူမ်ႈတုမ် 12 ၾႅပ်ႊၿိဝ်ႊရီႊၵေႃႈ တေဢမ်ႇပဵၼ်မႃးဝၼ်းလိၵ်ႈႁူမ်ႈမၢႆပၢင်လူင်လႆႈ။ ဝၼ်းတီႈ 7 ၾႅပ်ႊၿိဝ်ႊရီႊၼၼ်ႉ ၶွင်ႇ သီႊၸိုင်ႈတႆး မၵ်းမၼ်ႈ ပဵၼ်ဝၼ်းၸိူဝ်ႉၸၢတ်ႈ၊ ဝၼ်းဢၼ်မၵ်းမၼ်ႈ ၵႂၢမ်းတၢင်ႇတုင်း/ ၸွမ်ပိဝ် ၸိူဝ်ႉၸၢတ်ႈၵိုတ်းၵပ်း ၸပ်းၵၼ်မႃးတေႃႇထိုင်ဝၼ်းမိူဝ်ႈၼႆ။