ၽၵ်းတူ လႅၼ်လိၼ်တႆး – ၶႄႇ 2 တီႈ တၢင်းပွတ်းဢိူင်ႇ 19 မၢၼ်ႈ ၸႄႈဝဵင်းမူႇၸေႊ ဢိုတ်းဝႆႉၸူဝ်ႈၶၢဝ်း ယွၼ်ႉတၢင်းပဵၼ် ဝႆးရတ်ႊသ်ၶူဝ်ႊရူဝ်ႊၼႃႊ ဢၼ်လိူင်ႇၽႄႈဝႆး ၼႂ်းမိူင်းၶႄႇၼၼ်ႉ ဝႃႈၼႆ။

တႄႇဢဝ် ဝၼ်းတီႈ 3/2/2020 ယၢမ်းဝၢႆးဝၼ်း မွၵ်ႈ 3 မူင်းၶိုင်ႈပၢႆၼၼ်ႉ ၽၵ်းတူ လႅၼ်လိၼ်တႆး – ၶႄႇ ဢၼ်ပိုတ်ႇပၼ် ၵူၼ်းမိူင်း ၶၢမ်ႈၵႂႃႇမႃးတင်းသွင်မိူင်း တၢင်းၼႂ်းဢိူင်ႇ 19 မၢၼ်ႈ ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇၼၼ်ႉ လႆႈဢိုတ်း ဝႆႉ ၸူဝ်ႈၶၢဝ်း။

ၸၢႆးထုၼ်း ၵူၼ်းၼႂ်းဢိူင်ႇ 19 မၢၼ်ႈ လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ် တီႈၼွင်မူၼ်း – ပဵင်းဢူႊ တင်း ႁူဝ်လွၼ်ႊ – မၢၼ်ႈသၢႆႊ တႄႉ ဢမ်ႇပၼ်ၵူၼ်းၶဝ်ႈဢွၵ်ႇၵႂႃႇမႃးယဝ်ႉ။ မိူၼ်ၼင်ႇ တႃႊၸၢင်ႉ – ႁူဝ်ႁၢတ်ႇ၊ ၼွင်မႃႉ – ၸေႊတွင်ႈလႄႈ ၵဝ်ႈ ၵူတ်ႉ – ၵွင်း သွင်သမ်ႉ ပၼ်ၵူၼ်းၶဝ်ႈဢွၵ်ႇၵႂႃႇမႃးယူႇ။ ၵူၺ်းၵႃႈ ရူတ်ႉၵႃးတႄႉ ဢမ်ႇပၼ်ၵႂႃႇမႃး” ဝႃႈၼႆ။

မိူၼ်ၼင်ႇ တီႈၽၵ်းတူ မၢၼ်ႈႁဵဝ်း – ဢဵမ်ႇၸဵမ်ႈ၊ ၶႃးလႅင်ႊ – ၵွင်းသွင်၊ ၼွင်ၽၢႆ – ၵွင်းၼွင်၊ တိုင်းၶႃ – ၸေႈသႅင်လႄႈ မၢၼ်ႈ ႁွင်း – ၸေႈသႅင် ၸိူဝ်းၼႆႉတႄႉ ၶဝ်ႈဢွၵ်ႇၵႂႃႇမႃး မိူၼ်ၵဝ်ႇယူႇ။

ၵဵဝ်ႇလူၺ်ႈလွင်ႈ ၽၵ်းတူ လႅၼ်လိၼ်တႆး – ၶႄႇ တီႈၼႂ်းဢိူင်ႇ 19 မၢၼ်ႈ ဢၼ်လႆႈဢိုတ်းဝႆႉၸူဝ်ႈၶၢဝ်း တီႈၼွင်မူၼ်း – ပဵင်းဢူႊ တင်း ႁူဝ်လွၼ်ႊ – မၢၼ်ႈသၢႆးၼၼ်ႉ ယူႇတီႈလူင်ပွင်ၸိုင်ႈမိူင်းၶႄႇ သင်ႇဢိုတ်း ဝႃႈၼႆ။

“ၽၵ်းတူ 2 တီႈဢၼ်ဢိုတ်းၵႂႃႇၼၼ်ႉ ယူႇတီႈ လူင်ပွင်ၸိုင်ႈတၢင်းမိူင်းၶႄႇ ၸီႉသင်ႇႁႂ်ႈဢိုတ်း တၢင်းမိူင်းတႆးႁဝ်းၶႃႈတႄႉ ဢမ်ႇသင်ႇႁႂ်ႈဢိုတ်းၶႃႈ။ ယွၼ်ႉတၢင်းပဵၼ်ၸိူဝ်ႉမႅင်းၼၼ်ႉၶႃႈယူဝ်ႉ။ ႁဝ်းၶႃႈ လႆႈငိၼ်း ၽူႈယႂ်ႇၵူၼ်းလူင် တၢင်းဢိူင်ႇ 19 မၢၼ်ႈဝႃႈတႄႉ ဝၼ်းတီႈ 9 လိူၼ်ၼႆႉ တေပိုတ်ႇပၼ်ၵူၼ်းၵႂႃႇမႃးၶိုၼ်းယူႇၼႆ” ၵူၼ်းမိူင်းပိုၼ်ႉတီႈမၢၼ်ႈႁဵဝ်း လၢတ်ႈၼႄ ၼင်ႇၼႆ။

ၸၢႆးဢွင်ႇ ၵူၼ်းၼႂ်းဢိူင်ႇ 19 မၢၼ်ႈ လၢတ်ႈတီႈၽူႈတွႆႇႁွၵ်ႈဝႃႈ “တီႈၽၵ်းတူၵျိၼ်ႊသၢၼ်း ၵျေႃႉ (သၢမ်ၸဵင်ႇၶမ်း) ၵေႃႈ လႆႈငိၼ်းဝႃႈ တၢင်းၾင်ႇမိူင်းၶႄႇ သင်ႇဢိုတ်း ဝႆႉၸူဝ်ႈၶၢဝ်းမိူၼ်ၵၼ် ၸဵမ်မိူဝ်ႈဝႃး ဝၼ်းတီႈ 4/2/2020 ၼႆဝႃႇ၊ လွင်ႈၼႆႉ ႁဝ်းၶႃႈ ပႆႇယိုၼ် ယၼ် ဢိုတ်းတႄႉ ဢမ်ႇဢိုတ်းတႄႉ ဢၼ်ဝႃႈၼၼ်ႉ တိုၵ်ႉထၢမ်ဝႆႉ ပီႈၼွင်ႉႁဝ်း တၢင်းပၢင်ႇသၢႆးယူႇ” ဝႃႈၼႆ။

ၽၵ်းတူ လႅၼ်လိၼ် တႆး – ၶႄႇ ၼႂ်းဢိူင်ႇ 19 မၢၼ်ႈၼႆႉ မိူၼ်ၼင်ႇ တႃႊၸၢင်ႉ – ႁူဝ်ႁၢတ်ႇ၊ ၼွင်မႃႉ – ၸေႊတွင်ႈ၊ ၼွင်မူၼ်း – ပဵင်းဢူႊ၊ ႁူဝ်လွၼ်ႊ – မၢၼ်ႈသၢႆး၊ မၢၼ်ႈႁဵဝ်း – ဢဵမ်ႇၸဵမ်ႈ၊ ၵဝ်ႈၵူတ်ႉ – ၵွင်းသွင်၊ ၶႃးလႅင်ႊ – ၵွင်းသွင်၊ ၼွင်ၽၢႆ – ၵွင်းၼွင်၊ တိုင်းၶႃ – ၸေႈသႅင်၊ မၢၼ်ႈႁွင်း – ၸေႈသႅင် ၸိူဝ်းၼႆႉ။

တေႃႈလဵဝ် ၽၵ်းတူလူင် လႅၼ်လိၼ် တႆး – ၶႄႇ မိူၼ်ၼင်ႇ ၽၵ်းတူ ၸၢင်ႉၽိူၵ်ႇ၊ ၽၵ်းတူႁေႃၶမ်းလူင်လႄႈ မၢၼ်ႈပဵင်း ၸိူဝ်းၼႆႉတႄႉ ပိုတ်ႇဝႆႉ မိူၼ်ၵဝ်ႇၵူၺ်း ဝႃႈၼႆ။

ယၢမ်းလဵဝ်ၼႆႉ ၵူၼ်းၸပ်းတၢင်းပဵၼ်ဝႆးရတ်ႊသ်ၶူဝ်ႊရူဝ်ႊၼႃႊ တၢင်းလုမ်ႈၾႃႉ လၢႆလၢႆမိူင်းတင်းမူတ်းမီး 24,540 ၵေႃႉ၊ တၢႆ 492 ၵေႃႉလႄႈ ၵူၼ်းၶႅၼ်းၸိုၼ်ႈ မႃးၶိုၼ်းသမ်ႉ မီးၵႂႃႇ 911 ၵေႃႉ ႁွင်ႈၵၢၼ်ၶၢဝ်ႇ South China Morning Post ဢွၵ်ႇဝႆႉ ၼင်ႇၼႆ။