ၵူၼ်းမိူင်းၼမ်ႉတူႈ တေဢွၼ်ၵၼ် ၸတ်းႁဵတ်း ပၢင်ပွႆးဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 73 ပီ ယိင်ႈယႂ်ႇ။
ဝၼ်းတီႈ 7/2/2020 ၼႆႉ ပဵၼ်ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 73 ပီ ယူႇတီႈ ၵေႃလိၵ်ႈလၢႆးလႄႈ ၾိင်ႈငႄႈတႆး ၸႄႈ ဝဵင်းၼမ်ႉတူႈ ဢွၼ်ႁူဝ်သေ ႁူမ်ႈပႃး ၵူၼ်းမိူင်း လႄႈ ၾၢႆႇလူင်ပွင်ၸိုင်ႈ ၸႄႈဝဵင်း တေႁူမ်ႈၵၼ်ၸတ်းႁဵတ်း ပၢင်ပွႆးတီႈ ဝၢင်းမၢၵ်ႇၼင်ၵၢင်ဝဵင်း ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။
လုင်းၸၢႆးပႃႉၺုၼ်ႇ ႁူဝ်ပဝ်ႈၵေႃပွင်ပဵၼ်ပၢင်ပွႆး ဝၼ်းၸိူဝ်ႉၸၢတ်ႈၸိုင်ႈတႆး ၸႄႈဝဵင်းၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ “ ဝၼ်းၸိူဝ်ႉၸၢတ်ႈၸိုင်ႈတႆး တီႈၼမ်ႉတူႈႁဝ်းၶႃႈၼႆႉ ၸတ်းႁဵတ်းမႃးၵူႈပီၶႃႈယဝ်ႉ။ လွင်ႈႁူမ်ႇလူမ်ႈတႄႉ တေႃႈလဵဝ် ပၢင် တိုၵ်းၵေႃႈ ႁၢင်ႇၵႂႃႇႁိုင်ယဝ်ႉ” ဝႃႈၼႆ။
ၶပ်ႉမၢႆ ပၢင်ပွႆး ၼႂ်းဝၼ်းတီႈ 7 တေထိုင်ၼႆႉ တေတၵ်ႉယမ်တုင်းၸိူဝ်ႉၸၢတ်ႈ၊ ႁႆႇၵွင်မွင်းပိုတ်ႇပၢင်၊ လူႇဢၢၼ်ႇလိၵ်ႈၸွမ် ၸိုင်ႈသူင်ႇၸူးလႄႈ ၸွမ်ၽွင်းလူင် ၸႄႈမိူင်းတႆး သူင်ႇၸူး ၸိူဝ်းၼႆႉ။ ယဝ်ႉၵေႃႈ သပ်းလႅင်းၼႄ လွင်ႈပဵၼ်မႃး ဝၼ်းၸိူဝ်ႉ ၸၢတ်ႈၸိုင်ႈတႆး။ လိူဝ်ၼၼ်ႉ ၼႄတၢင်းၵႃႈ ၾိင်ႈငႄႈႁိတ်ႈႁွႆးၵႂႃႇ ဝႃႈၼႆ။
လုင်းၸၢႆးပႃႉၺုၼ်ႉ လၢတ်ႈဝႃႈ “ ပီၼႆႉ မွၵ်ႇထိုင်ၵူႈဢိူင်ႇ ၵူႈပွၵ်ႉ ႁႂ်ႈဢွၼ်ၵၼ် ယိပ်းပၢႆႉလႄႈ တုင်းၸိူဝ်ႉၸၢတ်ႈ (ၸွမ် ပိဝ်) မႃးၶဝ်ႈႁူမ်ႈပၢင်။ လၢမ်းၶၢတ်ႈဝႆႉ ႁူဝ်ၵူၼ်းမွၵ်ႈ 2,000 ၵေႃႉၼႆႉ။ ပၢင်ပွႆးႁဝ်းၶႃႈတႄႉ တေပဵၼ်ဝၼ်းလဵဝ် ဝၼ်းတီႈ 7 ယၢမ်းၵၢင်ဝၼ်းၼၼ်ႉၵူၺ်း” ဝႃႈၼႆ။
ၼွၵ်ႈလိူဝ်ၼၼ်ႉ တၢင်းလႅၼ်လိၼ်တႆး – ထႆး တီႈလွႆၵေႃႇဝၼ်းလႄႈ လွႆတႆးလႅင်းၵေႃႈ တေၸတ်းႁဵတ်းမိူၼ်ၵၼ်။ တၢင်း လႅၼ်လိၼ်တႆး – ၶႄႇ မူႇၸေႊ၊ ၼမ်ႉၶမ်းတႄႉ တေဢမ်ႇၸတ်းႁဵတ်းယဝ်ႉ ပီၼႆႉ ယွၼ်ႉတၢင်းပဵၼ်ဝႆးရတ်ႊသ်ၶူဝ်ႊရူဝ်ႊ ၼႃႊ ဢၼ်လိူင်ႈၽႄႈဝႆး တၢင်းမိူင်းၶႄႇၼၼ်ႉ။ ၼႂ်းမိူင်းတႆး လၢႆလၢႆဝဵင်းတႄႉၵေႃႈ တေၸတ်းႁဵတ်းၵႂႃႇယူႇ ဝႃႈၼႆ။