ၽူႈၸၢႆးၵေႃႉၼိုင်ႈ ၵႂႃႇႁဵတ်းၵၢၼ်တၢင်းမိူင်းၶႄႇသေ ပွၵ်ႈမႃး လိၼ်ၸႃႇတိၶိုၼ်း၊ ၾၢႆႇမေႃယႃ ထူပ်းႁၼ် ၸပ်းမီးတၢင်းပဵၼ် ဢၼ်ငဝ်းလၢႆးမိူၼ်တၢင်းပဵၼ်ၶႄႇ ဝူႊႁၢၼ်ၸိူဝ်ႉမႅင်းဝႆးရတ်ႊသ်ၶူဝ်ႊရူဝ်ႊၼႃႊ ဝႃႈၼႆ။
မိူဝ်ႈဝၼ်းတီႈ 1/2/2020 ၼၼ်ႉ ၽူႈၸၢႆး ဢႃယု 40 ပၢႆ ပဵၼ်ၵူၼ်းဝၢၼ်ႈပၢင်ဝူဝ်း ၸႄႈဝဵင်းၼမ်ႉတူႈ ၸိုင်ႈတႆး ပွတ်းႁွင်ႇ ၵႂႃႇ ႁဵတ်းၵၢၼ်တၢင်းမိူင်းၶႄႇသေ ပွၵ်ႈမႃး ဢမ်ႇယူႇလီ မီးလူမ်းၼၢဝ်မႆႈႁႅင်းသေ တေႃႈလဵဝ် ယူႇတီႈႁူင်းယႃၼမ်ႉတူႈ လႆႈႁပ်ႉ ယူတ်းယႃဝႆႉ။
လုင်းၸၢႆးပႃႉၺုၼ်ႇ ၽူႈတူင်ႉၼိုင် တူင်ႉဝူင်းၵူၼ်း ၸႄႈဝဵင်းၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ “ မၼ်းၸၢႆးၵႂႃႇႁဵတ်း ၵၢၼ် မိူင်းၶႄႇသေ ပွၵ်ႈမႃး။ မၼ်းၸၢႆးဢမ်ႇယူႇလီ ပဵၼ်ၶႆႈၼၢဝ်။ လွင်ႈတၢင်းပဵၼ်ဝႆးရတ်ႊသ်ၶူဝ်ႊရူဝ်ႊၼႃႊၼၼ်ႉ ပဵၼ်ႁိုဝ် ဢမ်ႇ ပဵၼ်ႁိုဝ် ဢၼ်ဝႃႈၼၼ်ႉ ပႆႇႁူႉ။ တီႈႁဝ်းၶႃႈၼႆႉ ယွၼ်ႉဢမ်ႇမီးၶိူင်ႈၸၢၵ်ႈတႃႇၵူတ်ႇထတ်း။ တေႃႈလဵဝ် မေႃယႃၶဝ် တိုၵ်ႉပႂ်ႉ တူၺ်းငဝ်းလၢႆးမၼ်းၸၢႆးယူႇ”ဝႃႈၼႆ။
ယၢမ်းလဵဝ်ၼႆႉ ၽူႈၸၢႆးၵေႃႉၼၼ်ႉ ယူႇတီႈမေႃယႃၶဝ် လႆႈယူတ်းယႃပႂ်ႉတူၺ်းဝႆႉႁင်းၶေႃၶေႃ ဝႃႈၼႆ။
မိူဝ်ႈဝၼ်းတီႈ 1 ၼၼ်ႉၵူၺ်းၼင်ႇၵဝ်ႇ မီးမုင်ႉႁေႃႁိူၼ်း လင်ၼိုင်ႈ လုၵ်ႉတၢင်းမိူင်းၶႄႇ ပွၵ်ႈမႃးမိူင်းတႆး ၶဝ်ႈမႃးတၢင်း ၸႄႈ ဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်းသေ ၵူတ်ႇထတ်းထူပ်းႁၼ် လုၵ်ႈဢွၼ်ႇ ဢႃယု 2 ၶူပ်ႇၵေႃႉၼိုင်ႈ မီးလူမ်းမႆႈၶိုၼ်ႈ သုင်၊ ဢႆ ပွတ်ႇၵႂ်ႈ ၸိူဝ်းၼႆႉ မိူၼ်ဢွၵ်ႇၾၢင်ႇႁၢင်ႈၵူၼ်းပဵၼ်ဝႆးရတ်ႊသ်ၶူဝ်ႊရူဝ်ႊၼႃႊၼႆလႄႈ တေႃႈလဵဝ် မေႃယႃၶဝ် လႆႈ ယူတ်းယႃဝႆႉ ႁင်း ၶေႃသေ ပႂ်ႉတူၺ်းငဝ်းလၢႆးယူႇ သိုဝ်ႇၶၢဝ်ႇ Tachileik News Agency ဢွၵ်ႇဝႆႉ။
တေႃႈလဵဝ် ၵူၼ်းၸပ်းတၢင်းပဵၼ်ၸိူဝ်ႉမႅင်းဝႆးရတ်ႊသ်ၶူဝ်ႊရူဝ်ႊၼႃႊ တၢင်းလုမ်ႈၾႃႉ လၢႆလၢႆမိူင်းၼႆႉ မီးၵႂႃႇ 24,536 ၵေႃႉ၊ တၢႆ 492 ၵေႃႉ ယူတ်းယႃႁၢႆၶိုၼ်းသမ်ႉ မီး 911 ၵေႃႉ သိုဝ်ႉၶၢဝ်ႇ South China Morning Post ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ