ၵေႃၵပ်းသၢၼ်ၵူၼ်းၼုမ်ႇ ဝဵင်းၼမ်ႉၶမ်း တေၸႅၵ်ႇၽႃႈတူမ်းသူပ်း တင်းၽိုၼ်လိၵ်ႈပၼ်တၢင်းႁူႉပၢႆးယူႇလီ ပၼ်ၵူၼ်းမိူင်း။
ဝၼ်းတီႈ 5/2/2020 ယၢမ်းၵၢင်ၼႂ် 8 မူင်း ယူႇတီႈ ၵေႃၵပ်းသၢၼ်ၵူၼ်းၼုမ်ႇ ဝဵင်းၼမ်ႉၶမ်းဢွၼ်ႁူဝ်ၼမ်းၼႃႈသေ ဢိၵ်ႇပႃး ႁွင်ႈၵၢၼ်ပၢႆးယူႇလီ ႁူင်းယႃ ၼမ်ႉၶမ်း တေလူင်းပိုၼ်ႉတီႈ ၸႅၵ်ႇၽိုၼ်လိၵ်ႈပၼ်တၢင်းႁူႉပၢႆးယူႇလီလႄႈ ၽႃႈတူမ်းသူပ်း ပၼ် ၵူၼ်းမိူင်း မိူၼ်ၼင်ႇ တီႈၾၢႆႇၼႃႈလၢၼ်ႉၶၢႆပပ်ႉ မူဝ်း ပွၵ်ႉႁူဝ်ၵၢတ်ႇ၊ ၵျွင်းတေႃႇ ၵၢင်ဝဵင်းပွၵ်ႉမူဝ်ၶမ်း လႄႈ ၵျွင်းမင်ႇ ၵလႃႇ ပွၵ်ႉလူင် ၸႄႈဝဵင်းၼမ်ႉၶမ်း။
ၸၢႆးမၢဝ်း ၽူးၵပ်းသၢၼ်/ တိတ်းတေႃႇ ၵေႃၵပ်းသၢၼ်ၵူၼ်းၼုမ်ႇ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈ “ တေႃႈလဵဝ် တၢင်းပဵၼ်ဝႆးရတ်ႊသ်ၶူဝ်ႊရူဝ်ႊၼႃႊၼႆႉ မၼ်းၽႄႈမႃးႁၢဝ်ႈႁႅင်း ႁဝ်းမႃးတူၺ်းၼႂ်း WHO ၶဝ် ပိုၼ်ၽၢဝ်ႇဢွၵ်ႇမႃးၼႆႉ မၼ်း ပႆႇလူတ်းယွမ်းၶႃႈ။ တီႈဝဵင်းႁဝ်းၶႃႈသမ်ႉ တိတ်းၸပ်းမိူင်းၶႄႇ မီးလွင်ႈၶဝ်ႈဢွၵ်ႇၵၼ်၊ ပီႈၼွင်ႉႁႅင်း ၵၢၼ်ယၢၼ်မိူင်းၵေႃႈ ၶဝ်ႈဢွၵ်ႇ ၵႂႃႇမႃးၼမ် မၼ်းသမ်ႉတေလႆႈ လတ်းဝဵင်းမူႇၸေႊ၊ ဝဵင်းၼမ်ႉၶမ်း ႁဝ်းၶႃႈ” ဝႃႈၼႆ။
ၽႃႇတူမ်းသူပ်း ဢၼ်တေၸႅၵ်ႇပၼ် ၵူၼ်းမိူင်း မိူဝ်ႈၽုၵ်ႈဝၼ်းတီႈ 5 ၼႆႉ ယူႇတီႈၵေႃၵပ်းသၢၼ်ၵူၼ်းၼုမ်ႇ ဝဵင်းၼမ်ႉၶမ်း ႁၢင်ႈႁႅၼ်းဝႆႉ 5,000 ဢၼ် ယဝ်ႉၵေႃႈ ပီႈၼွင်ႉမႃးႁူမ်ႈလူႇဝႆႉထႅင်ႈ 800 ဢၼ် ဝႃႈၼႆ။
ၸၢႆးမၢဝ်း လၢတ်ႈဝႃႈ“ ဢၼ်ႁဝ်းၶႃႈ တေၸႅၵ်ႇပၼ်မိူဝ်ႈၽုၵ်ႈၼႆႉ တေၵုမ်ႇထူၼ်ႈၵႂႃႇမူတ်းႁႃႉၼႆၵေႃႈ တေပႆႇ ၵုမ်ႇထူၼ်ႈၶႃႈ။ ၶႂ်ႈဝႃႈပၼ်ၾၢင်ႉ ႁႂ်ႈမီးသတိၵၼ်ႁႅင်းႁႅင်းသေ ပၼ်ၽႃႈတူမ်းသူပ်း။ ၵႂႃႇလႂ် ပႆလႂ် ႁႂ်ႈတူမ်းသူပ်းႁင်း ၽႂ်ႁင်းမၼ်း ယဝ်ႉၵေႃႈ ၸႅၵ်ႇပၼ်ၽိုၼ် လိၵ်ႈပိုၼ်ႉႁူႉပၢႆးယူႇလီပႃးၶႃႈ” ဝႃႈၼႆ။
ၼႂ်းလိၵ်ႈပိုၼ်ၽႄႈၼၼ်ႉ ဢွၵ်ႇဝႆႉဝႃႈ သင်ၸိူဝ်ႉဝႃႈ ပီႈၼွင်ႉၼႂ်းဝဵင်းၼမ်ႉၶမ်း မီးၸႂ်ၸေႇတၼႃႇ ၶႂ်ႈလူႇ၊ ၶႂ်ႈႁူမ်ႈၸွမ်း၊ ၶႂ်ႈၶဝ်ႈပႃးထႅမ်ႁႅင်းၸွမ်းၼႆၵေႃႈ မုင်ႈမွင်းႁပ်ႉႁွင်းဝႆႉယူႇၵူႈၶၢဝ်းယၢမ်းသေ ၶႅၼ်းတေႃႈၵပ်းသိုပ်ႇ ပၼ်သဵၼ်ႈ ၸိုဝ်ႈတီႈ ၸၢႆးတႆးမၢဝ်း 099-66096261, ၸၢႆးယီႊသႅင် 099-65620102 ၸိူဝ်းၼႆႉ။
မိူဝ်ႈဝၼ်းတီႈ 2/2/2020 ၼၼ်ႉၵေႃႈ ယူႇတီႈၸုမ်းပၼ်ႇရူတ်ႉထိပ်ႇ ဝဵင်းၼမ်ႉၶမ်း လႄႈ ႁွင်ႈၵၢၼ်ပၢႆးယူႇလီ ႁူင်းယႃ ၼမ်ႉၶမ်း ႁူမ်ႈၵၼ်သေ ၸႅၵ်ႇပၼ်ၽႃႈတူမ်းသူပ်း တႃႇ 4,000 ဢၼ်လႄႈ ၽိုၼ်လိၵ်ႈပၼ်တင်းႁူႉ ပၢႆးယူႇလီ ပၼ်ၵူၼ်းမိူင်း ၼႂ်းၸႄႈဝဵင်းၼမ်ႉၶမ်း မႃးယဝ်ႉၵမ်းၼိုင်ႈ။
တေႃႈလဵဝ် ၵူၼ်းၸပ်းတၢင်းပဵၼ်ဝႆးရတ်ႊသ်ၶူဝ်ႊရူဝ်ႊၼႃႊတၢင်းလုမ်းၾႃႉ လၢႆလၢႆမိူင်း မီးၵႂႃႇယဝ်ႉ 20,624 ၵေႃႉ၊ တၢႆ 427 ၵေႃႉ ယူႇတီႈသိုဝ်ႇၶၢဝ်ႇ South China Morning Post ဢွၵ်ႇဝႆႉၼင်ႇၼႆ။
