ပီႇတူႉၸိတ်ႉ မၢၼ်ႈပၢင်ႇ ဢၼ်တူင်ႉၼိုင်ယူႇဝႆႉတၢင်း ဢိူင်ႇၼမ်ႉပွင်ႈ တွၼ်ႈတၢင်းၸၢၼ်းထုင်ႉ ၸႄႈဝဵင်းလႃႈသဵဝ်ႈၼၼ်ႉ ယိုတ်းဢဝ်တီႈ လိၼ်ၵူၼ်းမိူင်းထႅင်ႈ 370 ဢေႊၶိူဝ်ႊပၢႆ။
ၸုမ်းပီႇတူႉၸိတ်ႉ မၢၼ်ႈပၢင်ႇ ဢၼ်ပူဝ်ႇမူၼ်းဢွၼ်ႁူဝ်ၼႆႉ မိူဝ်ႈပီ 2006 ယိုတ်းဢဝ်တီႈလိၼ်ၵူၼ်းဝၢၼ်ႈထုင်ႉၼႆႉ 1,000 ဢေႊၶိူဝ်ႊပၢႆ။ ႁၢင်ပီ 2019 – ႁူဝ်ပီ 2020 ၼႆႉ မႃးယိုတ်းဢဝ်တီႈလိၼ်ၵူၼ်းဝၢၼ်ႈၵုင်းပဝ်းထႅင်ႈ တႃႇ 370 ဢေႊၶိူဝ်ႊ။
ၸဝ်ႈသူၼ် ဢႃယု 50 ပၢႆ ၵေႃႉၼိုင်ႈ ဢၼ်ၺႃးၸုမ်းပီႇတူႉၸိတ်ႉမၢၼ်ႈပၢင်ႇ ယိုတ်းတီႈလိၼ်ၼၼ်ႉ လၢတ်ႈတီႈၽူႈတွႆႇ ႁွၵ်ႈဝႃႈ “ တီႈလိၼ်ၵဝ်ႇ ဢၼ်ပီႇ တူႉၸိတ်ႉၶဝ် သိမ်းၵႂႃႇၼၼ်ႉ မီးပဵၼ် 1,000 ဢေႊၶိူဝ်ႊပၢႆ။ ၵမ်းၼႆႉ ၶဝ်သမ်ႉမႃးသိမ်း ဢဝ်ထႅင်ႈ 370 ဢေႊၶိူဝ်ႊ။ တီႈ လိၼ်ဢၼ်ၵဝ်ႇၼၼ်ႉ တေပၼ်ႁဝ်းၶႃႈၶိုၼ်းၼႆ ဢမ်ႇပၼ် သမ်ႉမႃးဢဝ်တီႈမႂ်ႇၵႂႃႇထႅင်ႈ ႁဝ်းၶႃႈ ၵူၼ်းမိူင်းတေႁဵတ်း ၵိၼ်ၵၢၼ်သင်ယဝ်ႉ” ဝႃႈၼႆ။
မိူဝ်ႈဝၼ်းတီႈ 13/2/2019 ၼၼ်ႉ ပီႇတူႇၸိတ်ႉမၢၼ်ႈပၢင်ႇ လႄႈ ၾၢႆႇတႅၵ်ႈၼႃႈလိၼ်ၶဝ် မႃးတႅၵ်ႈဢဝ်တီႈလိၼ် လွင်ႈၼႆႉ ၵူၼ်းဝၢၼ်ႈ၊ ၵူၼ်းသူၼ် ဢမ်ႇလႆႈႁူႉသင်ၸွမ်း ထဝ်ႈဝၢၼ်ႈ၊ ထဝ်ႈၼႃးၵေႃႈ ဢမ်ႇ လႆႈႁူႉၸွမ်းသေၵေႃႉ ဝႃႈၼႆ။
“မိူဝ်ႈဝၼ်းတီႈ 28/12/2019 ယၢမ်းၵၢင်ၼႂ် မွၵ်ႈ 9 မူင်းၼၼ်ႉ ၸိုဝ်ႈႁွင်ႉ ပူဝ်ႇလူင်ထုၼ်း မႃးၽႅဝ်ၼႂ်းဝၢၼ်ႈႁဝ်းၶႃႈသေ မႃးလၢတ်ႈဝႃႈ ႁႂ်ႈၵႂႃႇၵၢၼ်ႉၶဝ်ႈၵၢပ်ႇ သူၼ်ၽႂ် သူၼ်မၼ်းၵမ်းလဵဝ်။ ၵမ်းၼႆႉ ႁဝ်းၶႃႈ ၸဝ်ႈသူၼ်ၼႅတ်ႈႁွင်ႉၵၼ်ၵႂႃႇ ဢဝ် ၶဝ်ႈၵၢပ်ႇၵၼ်။ ဝၼ်းလဵဝ် ႁဝ်းၶႃႈ ဢမ်ႇတၼ်းၵၢၼ်ႉ ထိုင်မႃး ဝၼ်းတီႈ 29 ယၢမ်းၵၢင်ၼႂ်ၵေႃႈ ၶဝ်ႁေႃႈၵႃး မႃးထုၺ်သူၼ် ၶဝ်ႈၵၢပ်ႇႁဝ်းၶႃႈၵႂႃႇပႅတ်ႈမူတ်းဢေႃႈ” ၵူၼ်းသူၼ် ဢႃယု 50 ပီပၢႆၼၼ်ႉ လၢတ်ႈၼႄၼင်ႇၼႆ။
ၵဵဝ်ႇၵပ်းလွင်ႈၼႆႉ ၸဝ်ႈသူၼ် ၵူၼ်းဝၢၼ်ႈ ဢွၼ်ၵၼ်တၢင်ႇလၢတ်ႈထိုင်တီႈၽူႈတႅၼ်းသၽႃးၸိူဝ်ႉၸၢတ်ႈလႄႈ ၵေႃ ပွင်ၵၢၼ် ၼမ်ႉပွင်ႈ ႁႂ်ႈၸွႆႈထႅမ်ၵႄႈလိတ်ႈပၼ် လွင်ႈၼႆႉ ဝႃႈၼႆ။
ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၶဵတ်ႇလိူၵ်ႈတင်ႈမၢႆ 3 ၸႄႈတွၼ်ႈလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ပၢၼ်လူင်ပွင်ၸိုင်ႈတေႃႈလဵဝ်ၼႆႉ ၶွတ်ႇၽွတ်ႈၶွမ်ႊမတီႊဝႆႉၵႅမ်ၸွမ်ၸိုင်ႈဢွၼ်ႁူဝ် မီးၽွင်းလူင်ၾၢႆႇၵႅတ်ႇၶႄ၊ ၽွင်းလူင် ၾၢႆႇႁူမ်ႇလူမ်ႈ ၶဝ်ႈပႃးဝႆႉ တႃႇၵူတ်ႇထတ်းတီႈလိၼ်ဢၼ်သိုၵ်းမၢၼ်ႈ ယိုတ်းဝႆႉၸိူဝ်းၼၼ်ႉ ဢဝ်မွပ်ႈပၼ်ၵူၼ်းမိူင်းတင်း ၼမ်ယဝ်ႉ။ တွၼ်ႈတႃႇတေယိုတ်းဢဝ်တီႈလိၼ်မႂ်ႇထႅင်ႈ တေဢမ်ႇလႆႈမီးယဝ်ႉ” ဝႃႈၼႆ။
သိုပ်ႇလၢတ်ႈဝႃႈ “ တေႃႈလဵဝ် ပီႇတူႉၸိတ်ႉဢၼ်ယူႇၾၢႆႇတႂ်ႈတပ်ႉသိုၵ်းမၢၼ်ႈၼၼ်ႉ တီႈလိၼ်ၵဝ်ႇ ၶဝ်သမ်ႉပႆႇပၼ်ၶိုၼ်း သမ်ႉယိုတ်းဢဝ်တီႈလိၼ်မႂ်ႇထႅင်ႈၼႆႉ ႁဵတ်းႁႂ်ႈၵူၼ်းမိူင်း ပဵၼ်ဢၼ်တူၵ်းတၢင်းယၢပ်ႇၽိုတ်ႇ မႆႈၸႂ်ၵၼ်။ ဢမ်ႇထုၵ်ႇလီ ပဵၼ်သေဢိတ်း။ ၵဵဝ်ႇၵပ်းလွင်ႈၼႆႉ ယူႇတီႈႁဝ်းၶႃႈ ပဵၼ်ၽူႈတႅၼ်းသၽႃးသေ တွၼ်ႈတႃႇၵူၼ်းမိူင်း ပေႃးတေလႆႈၶိုၼ်း တီႈလိၼ်ၶွင် ၵူၼ်းမိူင်းဢၼ်လႆႈလူႉသုမ်းဝႆႉၼၼ်ႉ တေၶတ်းၸႂ်ၶိုင်သၢင်ႈပၼ်ၵႂႃႇ” ဝႃႈၼႆ။
မိူဝ်ႈပီ 2006 ၼၼ်ႉ ယူႇတီႈၸုမ်းပီႇတူႉၸိတ်ႉမၢၼ်ႈပၢင်ႇ ယိုတ်းဢဝ်တီႈလိၼ်ၵူၼ်းဝၢၼ်ႈၵႂႃႇ 1,000 ဢေႊၶိူဝ်ႊပၢႆသေ ၽုၵ်ႈတူၼ်ႈယၢင်ရႃႊပႃႊ ၵူၼ်းဝၢၼ်ႈၵႂႃႇတုၵ်းယွၼ်းထိုင်လႃႈသဵဝ်ႈၵေႃႈ ယင်းပႆႇလႆႈၶိုၼ်း သမ်ႉမႃးယိုဝ်းဢဝ် တီႈလိၼ် ၵူၼ်းဝၢၼ်ႈၵုင်းပဝ်းထႅင်ႈ။ ဝၢၼ်ႈၵုင်းပဝ်းၼႆႉ လင်ႁိူၼ်း မီးမွၵ်ႈ 100 လင်။ ၵမ်ႈၼမ်ႁဵတ်းၵၢၼ်ႁႆႈသူၼ်။ သင်ပီႇတူႉၸိတ်ႉ မၢၼ်ႈပၢင်ႇ ၶဝ်ယိုတ်းဢဝ်တီႈလိၼ်ၵႂႃႇမူတ်း ဢမ်ႇမီးတႃႇႁဵတ်းၵၢၼ်ႁႃၵိၼ်လဵင်ႉတွင်ႉလႄႈ ႁဵတ်းႁႂ်ႈႁူပ်ႉတၢင်းယၢပ်ႇ ၽိုတ်ႇ လၢႆလွင်ႈ။
