ၵူၼ်းၼုမ်ႇတႆး ၼႂ်းမိူင်းတႆး တင်း ၼႂ်းမိူင်းထႆး ႁူမ်ႈၵၼ် ပၼ်ႇရူတ်ႉထိပ်ႇ ၶိုၼ်ႈလွႆတႆးလႅင်း မၢႆတွင်းဝၼ်းၸိူဝ်ႉၸၢတ်ႈၸိုင်ႈ တႆး ၶွပ်ႈၶူပ်ႇ 73 ပီ။

ဝၼ်းတီႈ 1/2/2020 မႃးၼႆႉ ၵူၼ်းၼုမ်ႇတႆး လၢႆလၢႆၸႄႈဝဵင်း ၼႂ်းမိူင်းတႆး၊ ၼႂ်းၵဵင်းမႆႇ ၸိုင်ႈထႆးလႄႈ ၵူၼ်းထႆး တၢင်းၵဵင်း ႁၢႆး၊ ၵဵင်းၶွင်၊ ပၢင်မၢၵ်ႇၽႃႈ ႁူမ်ႈၵၼ် ဢဵၼ်ႁႅင်း 20 ပၢႆ ပၼ်ႇရူတ်ႉထိပ်ႇ ၵႂႃႇၶဝ်ႈႁူမ်ႈပၢင်ပွႆး ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈ ၶူပ်ႇ 73 ပီ တီႈငဝ်ႈၸိုင်ႈလွႆတႆးလႅင်း။ ယိူင်းဢၢၼ်းပၼ်ႇရူတ်ႉထိပ်ႇ တႃႇပၼ်ႁႅင်းၸႂ် ၽူႈႁၢပ်ႇၵၢၼ်ၸိူဝ်ႉၸၢတ်ႈ တီႈၼိူဝ်လွႆ ဝႃႈၼႆ။

ၸၢႆးဢွၼ်ၶိူဝ်း ၽူႈယၢမ်ႈပၼ်ႇရူတ်ႉထိပ်ႇ ၼႂ်းၸႄႈမိူင်းတႆးပတ်းပိုၼ်ႉလႄႈ ၼႂ်းတိူင်းထုင်ႉလိၼ်ပဵင်း (မိူဝ်ႈပီၵၢႆ 2019) လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈတႄႇပၼ်မႃး ၼႂ်းဝၼ်းတီႈ 1 လိူၼ်ၼႆႉ။ ႁဝ်းၶႃႈ ပၼ်ႇမႃး မီး 2 ၸုမ်း။ ၸုမ်းႁဝ်းၶႃႈၼႆႉ လုၵ်ႉ တၢင်း မႄႈသၢႆသေမႃး တင်းမူတ်းတေမီးၵူၼ်းမွၵ်ႈႁိမ်း 20 ၵေႃႉ။ ပႃးတင်းၵူၼ်းထႆးထႅင်ႈ ယဝ်ႉၵေႃႈ ထႅင်ႈၸုမ်းၼိုင်ႈ သမ်ႉ မႃးတၢင်းႁူဝ်မိူင်း ၶၢမ်ႈမႃးတၢင်ႇလၢၼ်ႇ ၼႃးမူၼ်း တေမီးၶဝ်ယူႇ 4 ၵေႃႉ ႁဝ်းၶႃႈ တေပၼ်ႇၵႂႃႇႁူပ်ႉၵၼ် တီႈၼိူဝ်လွႆ တႆးလႅင်းၶႃႈ” ဝႃႈၼႆ။

ဢၼ်ပၼ်ႇရူတ်ႉထိပ်ႇၶိုၼ်ႈလွႆတႆးလႅင်း တႃႇၶဝ်ႈႁူမ်ႈပၢင်ပွႆးဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 73 ပီၼႆႉ တေဢၢၼ်း ႁွတ်ႈထိုင် ၼိူဝ်လွႆၼႂ်း ဝၼ်းတီႈ 5/2/2020 ဝႃႈၼႆ။

ၸၢႆးဢွၼ်ၶိူဝ်း သိုပ်ႇလၢတ်ႈဝႃႈ “ ယိူင်းဢၢၼ်းတႄႉ တေဢၢၼ်းႁွတ်ႈထိုင် ၼႂ်းဝၼ်းတီႈ 5 ၼႆႉ ၵူၺ်းၵႃႈ တေလႅပ်ႈႁွတ်ႈ ဝၼ်းတီႈ 6 ၵေႃႈ ပဵၼ်လႆႈ ယွၼ်ႉဝႃႈ ႁဝ်းၶႃႈၵေႃႈ ဢမ်ႇလႆႈပၼ်ႇႁိုင်ယဝ်ႉလႄႈ ၶႂ်ႈႁိူဝ်ႉၵၼ်ဝႆႉဢေႃႈ။ ၵွၼ်ႇႁဝ်းတေမႃးၼႆႉ ဢမ်ႇလႆႈၾိုၵ်းဝႆႉ ယဝ်ႉၵေႃႈ သဵၼ်ႈတၢင်းၼႆႉ ႁဝ်းၶႃႈသမ်ႉ ပႆႇယၢမ်ႈပၼ်ႇမႃးသေပွၵ်ႈလႄႈ ၶႂ်ႈႁိူဝ်ႉၵၼ်ဝႆႉၶႃႈဢေႃႈ။ ၵူၺ်း ၵႃႈ တေၶတ်းၸႂ် ပၼ်ႇႁွတ်ႈႁႂ်ႈထိုင်တီႈ ဢၼ်ႁဝ်းၶႃႈ ယိူင်းဢၢၼ်းဝႆႉယူႇၶႃႈ” ဝႃႈၼႆႇ။

ၸၢႆးဢွၼ်ၶိူဝ်းၸၢႆးသႅင်ႁၢၼ် သွင်ပီႈၼွင်ႉၼႆႉ တႄႇပၼ်ႇရူတ်ႉထိပ်ႇ မိူဝ်ႈဝၼ်းတီႈ 13/01/2019 လုၵ်ႉဢဝ် ဝဵင်းၵဵင်းမႆႇ ၸိုင်ႈထႆး ပၼ်ႇၶိုၼ်ႈၵဵင်းႁၢႆး၊ မႄႈသၢႆ။ မိူင်းတႆးပွတ်းဢွၵ်ႇ၊ ပွတ်းၸၢၼ်းလႄႈ ပွတ်းႁွင်ႇ။ ယင်းပၢႆပၼ်ႇလူင်းၵႂႃႇ ၸႄႈမိူင်း ယၢင်းလႅင်၊ ၸႄႈမိူင်းမွၼ်း၊ တိူင်းတႃႈၵုင်ႈ၊ ၼေႇပျီႇတေႃႇ၊ ဝဵင်းလိူဝ်ႇလႄႈ ပူးၵမ်ႇ ၸဵမ်ၸိူဝ်း ၼႆႉ လႆႈၸႂ်ႉၶၢဝ်းယၢမ်း မွၵ်ႈ 5 လိူၼ် ဝႃႈၼႆ။

ပၢင်ပွႆးဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 73 ပီ တီႈငဝ်ႈၸိုင်ႈတႆးလႅင်းပီၼႆႉ တေမီးပီႈၼွင်ႉၶႅၵ်ႇတီႈၸမ်ၵႆ၊ ႁႅင်းၵၢၼ်တႆး ၼႂ်းမိူင်းထႆးလႄႈ ၵူၼ်းမိူင်းတႆး ၸဵမ်ၸိူဝ်းၼႆႉ တေမႃးၶဝ်ႈႁူမ်ႈတင်းၼမ်။ လိူဝ်ၼၼ်ႉၵေႃႈ တီႈတၢင်းၼႃႈလိၼ် သိုၵ်းမၢႆ 1 လွႆၵေႃႇဝၼ်းၵေႃႈ တေၸတ်းႁဵတ်း ၼႂ်းဝၼ်းတီႈ 6-7/2/2020 မိူၼ်ၵၼ် ဝႃႈၼႆ။