ၵူၼ်းၼုမ်ႇၼမ်ႉမႃႉ ဢႃယု 18 ပီ ၺႃးယိုဝ်းတၢႆ ႁိမ်းသူၼ်တႅင် မၼ်းၸၢႆး ၾၢႆႇၸၢၼ်းထုင်ႉၼမ်ႉမႃႉ။
ဝၼ်းတီႈ 2/2/2020 ယၢမ်းၵၢင်ၼႂ် မွၵ်ႈ 10 မူင်းၶိုင်ႈၼၼ်ႉ ၵူၼ်းဝၢၼ်ႈထူပ်းႁၼ်တူဝ်တၢႆ ၸၢႆးဢွင်ႇလူႇ ဢႃယု 18 ပီ တီႈႁိမ်း သူၼ်တႅင်မၼ်းၸၢႆး ၾၢႆႇၸၢၼ်းထုင်ႉၼမ်ႉမႃႉ ၼႂ်းဢိူင်ႇၼမ်ႉမႃႉ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။
ၸၢႆးထုၼ်း ၵူၼ်းၼမ်ႉမႃႉ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ပဵၼ်ၵူၼ်းၼုမ်ႇထုင်ႉၼမ်ႉမႃႉ ဝၢၼ်ႈလူင်ၶႃႈ။ မၼ်း ၸၢႆးၵႂႃႇပႂ်ႉသူၼ်တႅင် ၸဵမ်မိူဝ်ႈဝၼ်းတီႈ 31 လိူၼ်ၵျႅၼ်ႊၼိဝ်ႊရီႊၼၼ်ႉၶႃႈ။ ယူႇတီႈပီႈၼွင်ႉၸိူဝ်ႉၶိူဝ်းမၼ်းၸၢႆး မႆႈၸႂ် ႁဵတ်းသင်လႄႈ ဢမ်ႇပွၵ်ႈႁိူၼ်းၼႆသေ ဢွၼ်ၵၼ်ၸွမ်းသွၵ်ႈႁႃတူဝ်မၼ်းၸၢႆး မိူဝ်ႈဝၼ်းတီႈ 1 လိူၼ်ၾႅပ်ႊၿိဝ်ႊၼႆႉ ထိုင်မႃး ဝၼ်းတီႈ 2 ၸင်ႇထူပ်းႁၼ်တူဝ်တၢႆမၼ်းၸၢႆးၶႃႈ”ဝႃႈၼႆ။
တူဝ်တၢႆ ၸၢႆးဢွင်ႇလူႇၼႆႉ မီးႁွႆးမၢၵ်ႇၵွင်ႈ ၸွမ်းၵွၵ်းႁူဝ်လႄႈ ၸွမ်းတူဝ်။ ဝၼ်းတီႈ 2/2/2020 ၼၼ်ႉၵူၺ်း ယူႇတီႈၸိူဝ်ႉၶိူဝ်း ပီႈၼွင်ႉ မၼ်းၸၢႆးလႄႈ ၵူၼ်းဝၢၼ်ႈလႆႈဢွၼ်ၵၼ်လုမ်းလႃးၾင်ၶၢပ်ႈတူဝ်မၼ်း တီႈဢၼ်မၼ်းၸၢႆးလူႉတၢႆၵႂႃႇၼၼ်ႉ ယဝ်ႉ ဝႃႈၼႆ။
“ပဵၼ်ယွၼ်ႉသင်လႄႈ မၼ်းၸၢႆးၺႃးယိုဝ်းၼၼ်ႉ ဢမ်ႇလႆႈႁူႉၶႃႈ။ လႅပ်ႈမၼ်းၸၢႆးတေၵႂႃႇဢႅဝ်ႇထိူၼ်ႇသေ ၺႃးၵူၼ်း လႄႇ ထိူၼ်ႇၼင်ႇၵၼ် ယိုဝ်းမႅၼ်ႈၵၼ်ၵေႃႈပဵၼ်လႆႈ။ မၢၵ်ႇၵွင်ႈဢၼ်ယိုဝ်းသႂ်ႇမၼ်းၸၢႆးၼၼ်ႉ ႁဝ်းၶႃႈ လႆႈႁၼ်တီႈ တူဝ်တၢႆ မၼ်းပဵၼ်မၢၵ်ႇၵွင်ႈသတ်ႉယၢမ်းၶႃႈဢေႃႈ။ ပဵၼ်ၵေႃႉလႂ် ၽႂ်ယိုဝ်းၼၼ်ႉတႄႉ ဢမ်ႇလႆႈႁူႉၶႃႈ” ၵူၼ်းပိုၼ်ႉတီႈၼမ်ႉမႃႉ လၢတ်ႈၼႄၼင်ႇၼႆ။
တႃႇတေၺွပ်းလႆႈၵေႃႉ ယိုဝ်းၸၢႆးဢွင်ႇလူႇၼၼ်ႉ တေႃႈလဵဝ် ယူႇတီႈၽူႈယႂ်ႇၵူၼ်းလူင် လႄႈ ၽူႈမီးပုၼ်ႈၽွၼ်း ၼႂ်းပိုၼ်ႉ တီႈ တိုၵ်ႉဢွၼ်ၵၼ်သွၵ်ႈႁႃ ၵူတ်ႇထတ်းယူႇ ဝႃႈၼႆ။
ၸၢႆးဢွင်ႇလူႇၼႆႉ ပဵၼ်ၵူၼ်းလီ ဢမ်ႇတွၼ်ႉၽိတ်းမေႃး မီးပၼ်ႁႃတင်း တၢင်ႇၵေႃႉ ဢၼ်မႃးယိုဝ်းမၼ်းၸၢႆးၼၼ်ႉၵေႃႈ ဢမ်ႇလႅပ်ႈ ပဵၼ်ယွၼ်ႉ မီးလွင်ႈၸဵပ်းၸႂ်ၼိူဝ်ၵၼ်။ ဢူၺ်းၵေႃႉ ၸၢႆးဢွင်ႇလူႇ ဢွၼ်ၵၼ်ထတ်းသၢင်ဝႃႈ ပဵၼ်ၽွင်းႁူဝ်ၶမ်ႈ လႄႈ ထၢင်ႇ ထိူမ်ဝႃႈ ပဵၼ်တူဝ်ထိူၼ်ႇၼႆသေ ယိုဝ်းၺႃးမႅၼ်ႈၵေႃႈပဵၼ်လႆႈ ဝႃႈၼႆ။
ၸၢႆးဢွင်ႇလူႇၼႆႉ ပဵၼ်လုၵ်ႈၸၢႆး (လုင်းၵွၼ်း) လႄႈ ပႃႈဢိင်ႇ ယူႇဝၢၼ်ႈလူင် ဢိူင်ႇၼမ်ႉမႃႉ တိုၵ်ႉႁႃၵူပ်ႉၵူႈ မိူဝ်ႈပီပူၼ်ႉမႃး ၼၼ်ႉၵူၺ်း။ ယဝ်ႉၵေႃႈ မၼ်းၸၢႆးပဵၼ်ၵူၼ်းၼုမ်ႇ ဢၼ်မႃးတူင်ႉၼိုင် ၼႂ်းတူင်ႇဝူင်းၵူၼ်းၼုမ်ႇ ၼမ်ႉမႃႉ မႃးၵေႃႉၼိုင်ႈ ၵေႃႈၸႂ် ဝႃႈၼႆ။
ၼႂ်းထုင်ႉၼမ်ႉမႃႉၼႆႉ ၵူၼ်းဝၢၼ်ႈဢွၼ်ၵၼ်သၢၼ်ၶတ်းလွင်ႈၶွမ်ႊပၼီႊမႃးၶုတ်းထၢၼ်ႇၼႂ်းပိုၼ်ႉတီႈ ႁႂ်ႈၵိုတ်းယင်ႉ လၢႆ လၢႆၵမ်းၵေႃႈ တေႃႇထိုင်ယၢမ်းလဵဝ် ၶွမ်ႊပၼီႊၼၼ်ႉ တိုၵ်ႉသိုပ်ႇၶုတ်းယူႇ ဝႃႈၼႆ။
