ၵူၼ်းမိူင်းသႅၼ်ဝီ ယဝ်ႉယွၵ်ႇထဵင်မေႃးၵၼ် ထိုင်တီႈလႆႈၾၼ်းၵၼ် မၢတ်ႇၸဵပ်း

ၵူၼ်းမိူင်းသႅၼ်ဝီၵေႃႉၼိုင်ႈ ၵႂႃႇယဝ်ႉယွၵ်ႇၵူၼ်း မီးတၢင်းပဵၼ်ပၢႆးၸႂ် ထိုင်တီႈထဵင်မေႃးၵၼ်သေ ၺႃးၾၼ်း လၢႆၵမ်း၊  လႆႈႁၢမ်သူင်ႇၶဝ်ႈႁူင်းယႃ လႃႈသဵဝ်ႈ သမ်ႉပေႃးလႆႈယဵပ်ႉလၢႆႁွႆး ။

မိူဝ်ႈၼႆႉ 3/2/2020 ယၢမ်းၵၢင်ၼႂ် မွၵ်ႈ 4 မူင်းပၢႆၼၼ်ႉ ၸၢႆးၵျေႃႇဢေး ၵႂႃႇယဝ်ႉယွၵ်ႇ ၵူၼ်းဢၼ် မီးတၢင်းပဵၼ်ပၢႆးၸႂ်ၵေႃႉၼိုင်ႈတီႈၼႂ်း ပွၵ်ႉ 2 ၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆး ပွတ်းႁွင်ႇ။  ၸၢႆးၵျေႃႇဢေး ၺႃး ၾၼ်းသႂ်ႇမၢတ်ႇၸဵပ်း တီႈၶႃထိုင်တီႈလႆႈႁၢမ်သူင်ႇယႃ တူဝ်တီႈ ႁူင်းယႃ ဝဵင်းလႃႈသဵဝ်ႈ – ဝႃႈၼႆ။

ၸၢႆးၾႃႉ ၸုမ်းတူင်ႇဝူင်းၵူၼ်း ၸွႆႈထႅမ် ပရႁိတ သႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ပဵၼ်မိူဝ်ႈၼႆႉ ၵၢင်ၼႂ် ၸုမ်းႁဝ်းၶႃႈ ဢဝ်တူဝ်ၸၢႆးၵျေႃႇဢေး သူင်ႇၵႂႃႇႁူင်းယႃလႃႈသဵဝ်ႈၶႃႈဢေႃႈ။ မၼ်းၸၢႆး ၺႃးၵူၼ်းယွင်ႇ ၾၼ်းၶႃႈဢေႃႈ” ဝႃႈၼႆ။

ၸၢႆးၵျေႃႇဢေးၼႆႉ ၺႃးၾၼ်း တိူဝ်ႉတီႈမိုဝ်းသွင်ၶွၼ်၊ တိၼ်ၾၢႆႇၶႂႃၶွၼ်ၼိုင်ႈ တေႃႈလဵဝ် လႆႈသူင်ႇယူတ်းယႃတူဝ်ဝႆႉ တီႈ ႁူင်း ယႃလႃႈသဵဝ်ႈ။

“လႆႈငိၼ်းၵူၼ်းဝၢၼ်ႈလၢတ်ႈဝႃႈ ၸၢႆးၵျေႃႇဢေး ဢဝ်ၶွၼ်ႉၵႂႃႇၽတ်ႉၵူၼ်းယွင်ႇဢွၼ်တၢင်းၼႆဝႃႇ လွင်ႈၼႆႉ ၽႂ်ၵေႃႈဢမ်ႇ ႁၼ်တႂ်ႈၼႃႈတႂ်ႈတႃၼႃႇၼေႃႈ။ မၼ်းဢမ်ႇၸႂ်ႈယွင်ႇယႃႈမဝ်းၵမ် ပဵၼ်ၵူၼ်းလိူတ်ႈလူမ်းဢမ်ႇတဵမ် မႃး ၸဵမ်မိူဝ်ႈလဵၵ်ႉယဝ်ႉ” ၸၢႆးၾႃႉ လၢတ်ႈၼႄၼင်ႇၼႆ။

ၸၢႆးၵျေႃႇဢေးၼႆႉ ပဵၼ်ၵူၼ်းၸႃတိ လႃႈသဵဝ်ႈ ပွၵ်ႉ 10 မႃးၶိုၼ်ႈၶူၺ်တီႈသႅၼ်ဝီ။ ယၢမ်းလဵဝ် ယူတ်းယႃတူဝ်ဝႆႉယူတီႈ ႁူင်းယႃလူင်ၵူၼ်းမိူင်း ဝဵင်းလႃႈသဵဝ်ႈ။