ၾႆးမႆႈႁၢၼ်ႉၶၢႆၶူဝ်း ၼႂ်းၵၢတ်ႇလူင် ဝဵင်းမိူင်းယႆ မီးလွင်ႈလူႉသုမ်း မွၵ်ႈပၢၵ်ႇသႅၼ်ပျႃးပၢႆ။
ဝၼ်းတီႈ 2/2/2020 ယၢမ်းၵၢင်ၼႂ် မွၵ်ႈ 9 မူင်းၶိုင်ႈပၢႆ ၾႆးမႆႈႁၢၼ်ႉၶၢႆၶူဝ်း ၼႂ်းၵၢတ်ႇလူင် ဝဵင်းမိူင်းယႆ ၸႄႈဝဵင်းမိူင်းယႆ ၸႄႈ တွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ။ ယွၼ်ႉၾႆးၾႃႉသျွတ်ႉ ဝႃႈၼႆ။
ၸၢႆးသီႇႁႃႉၵျေႃႇ ၽူႈတႅၼ်းသၽႃးၵူၼ်းမိူင်း ၸႄႈဝဵင်းမိူင်းယႆ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ။ မႆႈမိူဝ်ႈဝႃး တင်း မူတ်းမႆႈၵႂႃႇၼိုင်ႈတႅဝ်း။ ပေႃးဢဝ်ႁွင်ႈၶၢႆမၼ်းဝႃႈၸိုင် 18 ႁွင်ႈ။ ၾႆးတႄႉ မႆႈၸွမ်းတိုမ်း တႃႇၼိုင်ႈတႅဝ်းႁွင်ႈၶၢႆၶူဝ်းၼၼ်ႉ တင်းႁိုင် တေမႆႈမွၵ်ႈ 15 မိၼိတ်ႉၼႆႉ” ဝႃႈၼႆ။
မၼ်းၸၢႆး သိုပ်ႇလၢတ်ႈထႅင်ႈဝႃႈ “လွင်ႈလူႉသုမ်းတႄႉ လႆႈႁူႉဝႃႈ တေမီးမွၵ်ႈပၢၵ်ႇသႅၼ်ပၢႆ။ ၸွမ်းၼင်ႇ ၶၢဝ်ႇလူင်ပွင်ၸိုင်ႈ ဢွၵ်ႇဝႆႉတႄႉ ဢမ်ႇပေႃးလူႉသုမ်းၼမ်။ ၵဵဝ်ႇလူၺ်ႈလွင်ႈၾႆးမႆႈၼႆႉ ယွၼ်ႉဝႃႈ ႁၢၼ်ႉၶၢႆၶူဝ်းႁၢၼ်ႉ တင်ႈၼမ်ႉမႆႈဝႆႉသေ ပွၵ်ႈႁိူၼ်း၊ ၼမ်ႉမႆႈၼႂ်းမေႃႈၼၼ်ႉႁႅင်ႈသေ လႆႈဢဝ်ၾႆးမႆႈၵႂႃႇ ” ဝႃႈၼႆ။
ၵဵဝ်ႇၵပ်းလွင်ႈၼႆႉ ၵူၼ်းၼႂ်းၵၢတ်ႇလႄႈ ၽူႈမီးပုၼ်ႈၽွၼ်း ဢွၼ်ၵၼ်ၸွႆႈၶႄ ႁူတ်းၾႆးမွတ်ႇၵႂႃႇ ဝႃႈၼႆ။
ၵူၼ်းပိုၼ်ႉတီႈ ၼႂ်းၵၢတ်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၾႆးမႆႈၵၢတ်ႇၶႃႈဢေႃႈ။ မႆႈတၢင်းၼိူဝ်တိုမ်းၼၼ်ႉၶႃႈ ယွၼ်ႉဝႃႈ ပဵၼ်မႆႉပႅၼ်ႈ သၢမ်ၸၼ်ႉဝႆႉသေ မႆႈဝႆးၶႃႈဢေႃႈ။ ဢၼ်မႆႈၼႂ်းႁွင်ႈၶၢႆၶူဝ်းတႄႉ တၼ်းမႆႈလၢႆလၢႆႁွင်ႈယူႇ” ဝႃႈၼႆ။
မိူဝ်ႈပီ 2016 လိူၼ်ၵျႅၼ်ႊၼိဝ်ႊရီႊၼၼ်ႉၵေႃႈ တီႈဝဵင်းၼမ်ႉလၼ်ႈ ၸႄႈဝဵင်းသီႇပေႃႉၼၼ်ႉ ၾႆးမႆႈၵၢတ်ႇလူင် ၼင်ႇၵဝ်ႇ။ ၵူၼ်းမိူင်းလႄႈ လူင်ပွင်ၸိုင်ႈၶိုၼ်းႁူမ်ႈၵၼ် ႁဵတ်းၵၢတ်ႇမႂ်ႇယဝ်ႉသေ ပိုတ်ႇၵၢတ်ႇၼႂ်းလိူၼ်ၵျႅၼ်ႊၼိဝ်ႊရီႊ 2020 ၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ