မီးၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းၸုမ်းၼိုင်ႈ ၵႂႃႇဝၢင်းၶိူင်ႈပၼ် သိုၵ်းလူင်ပွင်ၸိုင်ႈမၢၼ်ႈ တီႈဝဵင်းမိူင်းၵူဝ်း ၸိုင်ႈတႆးပွတ်း ႁွင်ႇ၊ သိုၵ်း KIA ဝႃႈ ဢမ်ႇၸႂ်ႈၸုမ်းသိုၵ်းၶဝ်။
ဝၼ်းတီႈ 30/1/2020 ယူႇတီႈႁွင်ႈၵၢၼ်ပိုၼ်ၽၢဝ်ႇတပ်ႉသိုၵ်းလူင်ပွင်ၸိုင်ႈမၢၼ်ႈပိုၼ်ၽၢဝ်ႇဝႃႈ မီးတပ်ႉသိုၵ်း KIA ဢၼ် ဢဝ် ႁူမ်ႇလူမ်ႈတၢင်းဝဵင်းမိူင်းၵူဝ်း ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇၼၼ်ႉ ဝၢင်းၶိူင်ႈပၼ် တပ်ႉသိုၵ်းလူင်ပွင်ၸိုင်ႈ မၢၼ်ႈ ႁႅင်းသိုၵ်း 21 ၵေႃႉ။ ၼႂ်းၼၼ်ႉ ပႃးၸၼ်ႉၶုၼ်သိုၵ်းလူင် 3 ၵေႃႉ။ ၶိူင်ႈၵွင်ႈၵၢင်ႇ 10 လဝ်း၊ မၢၵ်ႇၵွင်ႈ 128 လုၵ်ႈ၊ မႅၵ်ႉၵွင်ႈ 9 ဢၼ် ဝႃႈၼႆ။
ၸဝ်ႈသိုၵ်းလူင် ၼေႃႇပူႇ ၽူႈၶၢၼ်ပၢၵ်ႇ သိုၵ်း KIA လၢတ်ႈတီႈၽူႈတွႆႇႁွၵ်ႈဝႃႈ “ ၾၢႆႇပွင်ႇၶၢဝ်ႇ တပ်ႉသိုၵ်းလူင်ပွင်ၸိုင်ႈ ပိုၼ်ၽၢဝ်ႇဢွၵ်ႇဝႆႉဝႃႈ သိုၵ်း KIA ႁႅင်းၵူၼ်း 21 ၵေႃႉ ၵႂႃႇဝၢင်းၶိူင်ႈပၼ်ၶဝ်ၼၼ်ႉ မၼ်းဢမ်ႇၸႂ်ႈပဵၼ်ၶၢဝ်ႇမၢၼ်ႇမႅၼ်ႈ။ ၸုမ်းဢၼ်ၵႂႃႇဝၢင်းၶိူင်ႈၼၼ်ႉ ဢမ်ႇၸႂ်ႈၵူၼ်းသိုၵ်းႁဝ်း၊ ဢမ်ႇၵဵဝ်ႇၶွင်ႈၸွမ်းၸုမ်းႁဝ်း” ဝႃႈၼႆ။
ၵဵဝ်ႇၵပ်းလွင်ႈၼႆႉ ၽူႈတွႆႇႁွၵ်ႈၶတ်းၸႂ်ၵပ်းသိုပ်ႇၸူး ၾၢႆႇပွင်ႇၶၢဝ်ႇ တပ်ႉသိုၵ်းလူင်ပွင်ၸိုင်ႈယူႇၵေႃႈ ၵပ်းသိုပ်ႇဢမ်ႇလႆႈ လႄႈ ဢမ်ႇၸၢင်ႈတွင်ႈထၢမ်။
ၸဝ်ႈသိုၵ်းလူင် ၼေႃႇပူႇသိုပ်ႇလၢတ်ႈဝႃႈ “ ၸွမ်းၼင်ႇ ႁဝ်းၶႃႈ လႆႈႁူႉတႄႉ တီႈမိူင်းၵူဝ်းၼၼ်ႉ မီးၵူၼ်းၵေႃႉၼိုင်ႈ ၶႂ်ႈၶွတ်ႇၽွတ်ႈ ၸုမ်းပျီႇတူႉၸိတ်ႉမႂ်ႇထႅင်ႈၸုမ်းၼိုင်ႈ။ သင်ဝႃႈ တေၶွတ်ႇၽွတ်ႈၸုမ်းပျီႇတူႉၸိတ်ႉမႂ်ႇ ၸိုင် တေလႆႈမီးႁႅင်းၵူၼ်း တီႈဢေႇ သုတ်း 60 ၵေႃႉ။ ယဝ်ႉၵေႃႈ တေႃႈလဵဝ် ၶဝ်တိုၵ်ႉၵဵပ်းၵူၼ်း/ ႁွမ်ၵူၼ်းယူႇ” ဝႃႈၼႆ။
ဝဵင်းမိူင်းၵူဝ်းၼႆႉ မိူဝ်ႈပူၼ်ႉမႃး ပီ 2016 ၼၼ်ႉ သိုၵ်း KIA တင်း သိုၵ်းလူင်ပွင်ၸိုင်ႈမၢၼ်ႈ ပဵၼ်ပၢင်တိုၵ်းၵၼ်ႁၢဝ်ႈႁႅင်းသေ ၵူၼ်းမိူင်းပိုၼ်ႉတီႈ လႆႈတိူဝ်ႉမၢတ်ႇၸဵပ်း၊ လူႉတၢႆၸွမ်းတင်းၼမ်။ ယဝ်ႉၵေႃႈ ဝတ်ႉဝႃး၊ ႁူင်းႁဵၼ်းလႄႈ ႁိူၼ်းယေး ၸိူဝ်းၼႆႉ ၵေႃႈ လႆႈလူႉၵွႆၸွမ်းတင်းၼမ်။
ယဝ်ႉၵေႃႈ ဢွင်ႈတီႈၼၼ်ႉ မီးသိုၵ်းလူင်ပွင်ၸိုင်ႈမၢၼ်ႈ၊ သိုၵ်း KIA လႄႈ ၸုမ်းပျီႇတူႉၸိတ်ႉ တူင်ႉၼိုင်ၵႂႃႇမႃးဝႆႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ