ၽူႈၸၢႆးၵေႃႉၼိုင်ႈ ဢႃယု 48 ပီ ၺႃးယိုဝ်း ၼႂ်းၸႄႈဝဵင်းၼမ်ႉၸၢင် မၢတ်ႇၸဵပ်းသေ လႆႈႁၢမ်သူင်ႇႁူင်းယႃၼမ်ႉၸၢင်။
ဝၼ်းတီႈ 30/1/2020 ယၢမ်းဝၢႆးဝၼ်း မွၵ်ႈ 4 မူင်းပၢႆၼၼ်ႉ ၽူႈၸၢႆး ဢႃယု 48 ပီ ၵေႃႉၼိုင်ႈ ပဵၼ်ၽူႈၵုမ်းတႃႈၵႃး သၢႆထူး သၢၼ်း (ထူးဆန်း ယာဉ်ငယ်လိုင်း ဂိတ်မှူး) ၺႃးၵူၼ်းဢမ်ႇႁူႉၾၢႆႇ ၶီႇရူတ်ႉၶိူင်ႈမႃးၸွမ်းၵၼ် 2 ၵေႃႉ လၢၵ်ႈၵွင်ႈယိုဝ်း သႂ်ႇ 4 ၵမ်း။ တိူဝ်ႉၺႃးမၼ်းၸၢႆး 3 ႁွႆး ပဵၼ်တီႈၼႂ်းၸႄႈဝဵင်းၼမ်ႉၸၢင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။
ၵူၼ်းပိုၼ်ႉတီႈၼမ်ႉၸၢင် လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းႁၢႆႉဢၼ်မႃးယိုဝ်းၼၼ်ႉ ၶဝ်ယိုဝ်း 4 ၵမ်း။ ၵူၺ်းၵႃႈ တိူဝ်ႉ မၼ်းၸၢႆး 3 ႁွႆး။ တိူဝ်ႉၺႃးတီႈပုမ် ႁွႆးၼိုင်ႈ၊ တီႈၶဵၼ်မိုဝ်းႁွႆးၼိုင်ႈလႄႈ တီႈၵွၵ်းႁူဝ် ႁွႆးၼိုင်ႈ။ တေႃႈလဵဝ် လႆႈသူင်ႇၽႃႇ တတ်းဝႆႉတီႈႁူင်းယႃၼမ်ႉၸၢင် ဢမ်ႇပေႃးထိုင်တီႈလႆႈမႆႈၸႂ်” ဝႃႈၼႆ။
သိုပ်ႇလၢတ်ႈဝႃႈ “ ၵူၼ်းဢၼ်မႃးယိုဝ်း 2 ၵေႃႉၼၼ်ႉ ၶီႈရူတ်ႉၶိူင်ႈသေမႃးယိုဝ်း ၵူၺ်းၵႃႈ ပႆႇတီႉၺွပ်းလႆႈတူဝ်။ တေႃႈ လဵဝ် ယူႇတီႈပလိၵ်ႈၶဝ် ၵူတ်ႇထတ်း တၢင်းၶဝ်ႈဢွၵ်ႇဝဵင်း ႁၢဝ်ႈႁႅင်းဝႆႉယူႇ”ဝႃႈၼႆ။
ၵဵဝ်ႇလူၺ်ႈလွင်ႈ ၽူႈၸၢႆး ဢႃယု 48 ပီ ဢၼ်ၺႃးယိုဝ်းၼႆႉ ၵူၼ်းဢၼ်မႃးယိုဝ်း 2 ၵေႃႉၼၼ်ႉ ပဵၼ်ၽႂ် တေႃႇထိုင် မိူဝ်ႈလဵဝ် ပႆႇတီႉၺွပ်းလႆႈတူဝ်။
ၽူႈၸၢႆး ဢႃယု 48 ပီ ဢၼ်ၺႃးယိုဝ်းၼၼ်ႉ ပဵၼ်ၵူၼ်းမိူင်းၽၵ်းၵႃႇၵူၺ်း ဢမ်ႇၵဵဝ်ႇၵပ်းၵၢၼ်မိူင်းသင်၊ ၸုမ်းသိုၵ်းသင် ၵူၼ်းပိုၼ်ႉတီႈ ၼမ်ႉၸၢင်လၢတ်ႈၼႄၼင်ႇၼႆ။
ၵဵဝ်ႇၵပ်းလွင်ႈၼႆႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈလႆႈတွင်ႈထၢမ်ၵႂႃႇတီႈႁူင်းပလိၵ်ႈၼမ်ႉၸၢင်သေ ပလိၵ်ႈၶဝ် တွပ်ႇဝႃႈ “ တေႃႈလဵဝ် တိုၵ်ႉၵူတ်ႇထတ်းယူႇ” ဝႃႈၼႆ။
တေႃႈလဵဝ် ၵူၼ်းမိူင်းၼမ်ႉၸၢင် ဢွၼ်ၵၼ်တိုၼ်ႇသၢၼ်ႈၵၼ် ယွၼ်ႉၵူၼ်းဢမ်ႇႁူႉၾၢႆႇ/ ၸုမ်းဢမ်ႇႁူႉၾၢႆႇ ၶဝ်ႈယိုဝ်းၵူၼ်း မိူင်းၸိူင်ႉၼႆ ပဵၼ်ဢၼ်မႆႈၸႂ်ၵူဝ်ၵၼ်ဝႆႉ ၵူၼ်းမိူင်းၼမ်ႉၸၢင်လၢတ်ႈၼႄၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ