(မွၵ်ႇမူဝ်ႁဵဝ်းၶမ်း – သူင်ႇၶၢဝ်ႇ) လူင်ပွင်ၸိုင်ႈမိူင်းႁူမ်ႈတုမ် ပိုၼ်ၽၢဝ်ႇဝႃႈ ၽွမ်ႉယဝ်ႉတႃႇ တေဢဝ်ၶိူင်ႈမိၼ် ၵႂႃႇ ႁပ်ႉလုၵ်ႈႁဵၼ်းဢၼ်မီးဝႆႉယူႇ ၼႂ်းဝဵင်းလူင် ဝူႊႁၢၼ်ႊၼၼ်ႉ ပွၵ်ႈမႃးၶိုၼ်း ဝႃႈၼႆ။
မိူဝ်ႈၼႆႉ ဝၼ်းတီႈ 30/1/2020 ယူႇတီႈႁွင်ႈၵၢၼ်လူင်ပွင်ၸိုင်ႈ ၾၢႆႇၼွၵ်ႈမိူင်း ဢွၵ်ႇလိၵ်ႈပိုၼ်ၽၢဝ်ႇဝႃႈ လူင်ပွင်ၸိုင်ႈမိူင်း ႁူမ်ႈတုမ်မၢၼ်ႈၽွမ်ႉယဝ်ႉတႃႇ တေဢဝ်ၶိူင်ႈမိၼ် ၶိုၵ်ႉတွၼ်း(ၽိသဵတ်ႇ) ၵႂႃႇႁပ်ႉဢဝ်လုၵ်ႈႁဵၼ်းၵူၼ်းမိူင်းႁူမ်ႈတုမ် ဢၼ် မီးယူႇၼႂ်းဝဵင်းလူင်ဝူႊႁၢၼ်ႊ ၸိုင်ႈမိူင်းၶႄႇၼၼ်ႉ ဢွၵ်ႇမႃး။ တႃႇတေဢဝ် လုၵ်ႈႁဵၼ်းဢွၵ်ႇမႃးလႆႈၼၼ်ႉ ယင်းတိုၵ်ႉၵပ်း သိုပ်ႇ ၾၢႆႇလူင်ပွင်ၸိုင်ႈၶႄႇ ဝႆႉယူႇ လုၵ်ႈႁဵၼ်းၵူၼ်းမိူင်းႁူမ်ႈတုမ် ဢၼ်ႁဵၼ်းလိၵ်ႈဝႆႉယူႇတီႈၸႄႈမိူင်းဝူႊႁၢၼ်ႊ မီးယူႇ 63 ၵေႃႉ ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ “ယူႇတီႈလုမ်းတၢင် မိူင်းႁူမ်ႈတုမ် တီႈ Beijing ၶိုၼ်းပွင်ႇၶၢဝ်ႇဝႃႈ လွင်ႈၼႆႉ ယူႇတီႈ လုမ်းတၢင်မိူင်းႁူမ်ႈတုမ်သေ ယင်းတိုၵ်ႉငူပ်ႉငီႉ တင်းႁွင်ႈၵၢၼ်ၾၢႆႇၼွၵ်ႈမိူင်း မိူင်းၶႄႇယူႇ။ ၸွမ်ၼင်ႇၶေႃႈၸီႉသင်ႇ ၾၢႆႇပၢႆး ယူႇလီပိုၼ်ႉတီႈဢွၵ်ႇဝႆႉၼၼ်ႉသေ တႃႇတေၶိုင်ပွင်ဢဝ်လုၵ်ႈႁဵၼ်းဢွၵ်ႇမႃးလႆႈၼၼ်ႉ တေလႆႈဢဝ်ၶၢဝ်းယၢမ်းမွၵ်ႈၼိုင်ႈ လိူၼ်” ဝႃႈၼႆ။
သင်ဝႃႈ လုၵ်ႈႁဵၼ်း မိူင်းႁူမ်ႈတုမ် 63 ၵေႃႉၼၼ်ႉ ပွၵ်ႈၽႅဝ်မိူင်းႁူမ်ႈတုမ်ယဝ်ႉၸိုင် တေၵူတ်ႇထတ်းတၢင်းပဵၼ်ပၼ်ၶဝ်လူး ၵွၼ်ႇ ၸင်ႇတေသူင်ႇပွၵ်ႈႁိူၼ်းၽႂ်မၼ်းၶိုၼ်း။ တႃႇၵူတ်ႇထတ်းတၢင်းပဵၼ်ပၼ်ၶဝ်ၼၼ်ႉ ႁွင်ႈၵၢၼ်ၾၢႆႇပၢႆးယူႇလီ ႁၢင်ႈ ႁႅၼ်းဝႆႉယဝ်ႉ ဝႃႈၼႆ။
ယၢမ်းလဵဝ် ၸိူဝ်ႉဝႆးရတ်ႊသ် ၶူဝ်ႊရူဝ်ႊၼႃႊၼႆႉ ၽႄႈလၢႆလၢႆမိူင်းၼႂ်းလုမ်ႈၾႃႉသေ ၼႂ်းဝၼ်းတီႈ 30/1/2020 ၼႆႉ ၵူၼ်း တိတ်းၸပ်းၸိူဝ်ႉမႅင်းမီးၵႂႃႇ 7,912 ၵေႃႉ။ ၼႂ်းၼၼ်ႉ မိူင်းၶႄႇၸပ်းတၢင်းပဵၼ် မီးယူႇ 7,801 ၵေႃႉ၊ ဢၼ်လူႉတၢႆ 170 ၵေႃႉ ပဵၼ်ၼႂ်းမိူင်းၶႄႇလွၼ်ႉလွၼ်ႉ ႁွင်ႈၵၢၼ်ၶၢဝ်ႇ South China Morning Post ဢွၵ်ႇဝႆႉ။