တႃႇတေႁႄႉၵင်ႈ ၸိူဝ်ႉမႅင်းဝႆးရတ်ႊသ် ၶူဝ်ႊရူဝ်ႊၼႃႊ လႆႈၼိုင်ႈၾၢႆႇၼိုင်ႈတၢင်းၼႆသေ ၶွမ်ႊမတီႊပွင်ပဵၼ်ပၢင်ပွႆး ဝၼ်း ၶိူဝ်းတႆး ဝဵင်းမူႇၸေႊ ဢုပ်ႇဢူဝ်းတႅပ်းတတ်းၵၼ်ဝႃႈ တေဢမ်ႇၸတ်းႁဵတ်းပၢင်ပွႆး ဝၼ်းၶိူဝ်းတႆးႁိုဝ် ဝၼ်းၸိူဝ်ႉၸၢတ်ႈ ၸိုင်ႈတႆး ၶွပ်ႈၶူပ်ႇ 73 ပီ။
ဝၼ်းတီႈ 29/1/2020 ယၢမ်းဝၢႆးဝၼ်း 1 မူင်း ၶွမ်ႊမတီႊပွင်ပဵၼ်ပၢင်ပွႆးဝၼ်းၶိူဝ်းတႆး ၸႄႈဝဵင်းမူႇၸေႊ ၸတ်းႁဵတ်းပၢင်ၵုမ် ဢုပ်ႇဢူဝ်းၵၼ် တီႈႁူင်းႁေႃၵေႃလိၵ်ႈလၢႆး မူႇၸေႊ ပွၵ်ႉၸၢၼ်း ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။
ၸၢႆးမျၢတ်ႉဢွင်ႇ ၵႅမ်ၽူႈၼမ်းၼႂ်း ၶွမ်ႊမတီႊပွင်ပဵၼ်ပၢင်ပွႆး ဝၼ်းၶိူဝ်းတႆး ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ပီၼႆႉ ပၢင်ပွႆးဝၼ်းၶိူဝ်းတႆးႁဝ်းၶႃႈ တီႈမူႇၸေႊၼႆႉ တေဢမ်ႇၸတ်းႁဵတ်းယဝ်ႉၶႃႈ။ ဝဵင်းမူႇၸေႊႁဝ်းၶႃႈၼႆႉ ပဵၼ်ဝဵင်း ဢၼ်တိတ်း ၸပ်း မိူင်းၶႄႇဝဵင်းၼိုင်ႈ။ ယွၼ်ႉဝႃႈ တၢင်းမိူင်းၶႄႇသမ်ႉ မႅင်းဝႆးရတ်ႊသ် ၶူဝ်ႊရူဝ်ႊၼႃႊၽႄႈၼမ်လႄႈ ၸင်ႇလႆႈတႅပ်း တတ်းဝႃႈ တေဢမ်ႇၸတ်းႁဵတ်းပွႆးဝၼ်းၶိူဝ်းတႆးယဝ်ႉ” ဝႃႈၼႆ။
ပၢင်ၵုမ်လူင် တွၼ်ႈတႃႇ ပွႆးဝၼ်းၶိူဝ်းတႆး ၶွပ်ႈၶူပ်ႇ 73 ပီ တီႈမူႇၸေႊၼႆႉ လႆႈဢုပ်ႇဢူဝ်းတႅပ်းတတ်းလႆႈၸႂ်ၵၼ်ၼႂ်းပၢင်ၵုမ် မီး 3 ၶေႃႈ။ ၼႂ်း 3 ၶေႃႈၼၼ်ႉ တႅပ်းတတ်းတေဢမ်ႇၸတ်းႁဵတ်းပွႆးၶိူဝ်းတႆး ၶွပ်ႈၶူပ်ႇ 73 ပီ။ တေႁဵတ်းလိၵ်ႈဝႂ်ပိဝ်သေလူင်း ပိုၼ်ႉတီႈယိုၼ်ႈထိုင်ၵူၼ်းၸွမ်းၼႂ်းဝၢၼ်ႈ၊ ၼႂ်းယွမ်ႇ၊ ၼႂ်းပွၵ်ႉၵႂႃႇ။ တီႈယူႇတီႈၾၢႆႇပွင်ႇၶၢဝ်ႇသေ ပိုၼ်ၽၢဝ်ႇ လၢတ်ႈၼႄ လွင်ႈဢမ်ႇၸတ်းႁဵတ်းဝၼ်းၶိူဝ်းတႆးလႄႈ တိုၵ်းသူၼ်းႁႂ်ႈဢွၼ်ၵၼ်ပူၵ်းၸွမ်ပိဝ်/ တုင်းၸိူဝ်ႉၸၢတ်ႈၸိုင်ႈတႆးၵႂႃႇ ၼႂ်းဝၼ်း တီႈ 7/2/2020 ၸၢႆးမျၢတ်ႉဢွင်ႇသပ်းလႅင်းလၢတ်ႈၼႄၼင်ႇၼႆ။
ၸၢႆးမျၢတ်ႉဢွင်ႇ သိုပ်ႇလၢတ်ႈဝႃႈ “မေႃယႃလူင်တီႈမူႇၸေႊၵေႃႈဝႃႈ ၶိူင်ႈၵူတ်ႇထတ်းၵူၼ်းၸပ်းၸိူဝ်ႉမႅင်းၼႆႉ တီႈမိူင်းမၢၼ်ႈ ယင်းပႆႇမီး။ ယွၼ်ႉၼၼ် ၼင်ႇႁိုဝ်တေပဵၼ်လွင်ႈႁႄႉၵင်ႈမႅင်းၼႆႉၵေႃႈပႃးၼႆလႄႈ တေဢမ်ႇႁဵတ်းပွႆးၶႃႈ” ဝႃႈၼႆ။
ပၢင်ၵုမ်လူင် တွၼ်ႈတႃႇ ပွႆးဝၼ်းၶိူဝ်းတႆး ၶွပ်ႈၶူပ်ႇ 73 ပီ တီႈမူႇၸေႊၼႆႉ ၵေႃႇမတီႇပွင်ပဵၼ်ပၢင်ပွႆးလႄႈ ၽူႈၵွၼ်းပွၵ်ႉ/ ဢိူင်ႇ ၶဝ်ႈႁူမ်ႈဢုပ်ႇဢူဝ်းၵၼ်ၵႂႃႇ တင်းမူတ်းမီးမွၵ်ႈ 30 ၵေႃႉ။
