ၾႆးမႆႈႁိူၼ်းၵူၼ်းဝၢၼ်ႈၼႂ်းဢိူင်ႇမိူင်းၵူဝ်း ၸႄႈဝဵင်းတႃႈၶီႈလဵၵ်း သွင်လင် ယွၼ်ႉၾႆးမႆႈႁိူၼ်းသေ မီးၵူၼ်းလူႉတၢႆၸွမ်း ၵေႃႉၼိုင်ႈလႄႈ မၢတ်ႇၸဵပ်းၵေႃႉၼိုင်ႈ။
ဝၼ်းတီႈ 29/1/2020 ယၢမ်းႁူဝ်ၶမ်ႈ မွၵ်ႈ 6 မူင်းၼၼ်ႉ ၾႆးမႆႈႁိူၼ်းၵူၼ်းဝၢၼ်ႈ 2 လင် တီႈဝၢၼ်ႈပၢင်ဢၢင် ဢိူင်ႇမိူင်းၵူဝ်း ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း။ မႆႈပႃးၽူႈယိင်းၵေႃႉၼိုင်ႈ လႆႈလူႉတၢႆၸွမ်းလႄႈ ၽူႈၸၢႆးၵေႃႉၼိုင်ႈ လႆႈ မၢတ်ႇၸဵပ်း။
ၸၢႆးတိင်း ၽူႈၵွၼ်းဢိူင်ႇမိူင်းၵူဝ်း လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ၊ ၾႆးမႆႈႁိူၼ်းပီႈၼွင်ႉၵူၼ်းဝၢၼ်ႈႁဝ်း ဝၢၼ်ႈပၢင် ဢၢင် 2 လင်ၶႃႈ။ မီးၵူၼ်းလူႉတၢႆၸွမ်း ၵေႃႉၼိုင်ႈလႄႈ မၢတ်ႇၸဵပ်းၵေႃႉၼိုင်ႈ။ ၵဵဝ်ႇလူၺ်ႈလွင်ႈၾႆးမႆႈၼႆႉ ပဵၼ်ယွၼ်ႉသင် တႄႉတႄႉလႄႈ မႆႈဢၼ်ဝႃႈၼၼ်ႉ ပႆႇလႆႈႁူႉတႅတ်ႈတေႃးလီၶႃႈ” ဝႃႈၼႆ။
သိုဝ်ႇၶၢဝ်ႇ တႃႈၶီႈလဵၵ်း Agency တႄႉဢွၵ်ႇဝႆႉဝႃႈ ၾႆးၽီးၾႆး လၢမ်းမႆႈပႃးႁိူၼ်း ၵေႃႉပဵၼ် မႄႈၸဝ်ႈ ႁိူၼ်းတႄႉ လႆႈလူႉ တၢႆ။ ၵေႃႉပဵၼ်ပေႃႈၸဝ်ႈႁိူၼ်းတႄႉ လႆႈမၢတ်ႇၸဵပ်းသေ သူင်ႇႁူင်းယႃဝႆႉ ဝႃႈၼႆ။
ယူႇတီႈၸုမ်းၸွႆႈထႅမ်တူင်ႇဝူင်း တႃႈၶီႈလဵၵ်း လႆႈၼမ်းဢဝ်တူဝ်ၵူၼ်းတၢႆလႄႈ ၵူၼ်းမၢတ်ႇၸဵပ်း သူင်ႇႁူင်းယႃၸႄႈဝဵင်း တႃႈၶီႈလဵၵ်းဝႆႉ။ ၼၢင်းယိင်းဢၼ်လႆႈလူႉတၢႆၵႂႃႇၼၼ်ႉ ၸိုဝ်ႈႁွင်ႉ တေႃႇမီႇဢေႃႉ၊ ၽူႈၸၢႆး ၵေႃႉဢၼ်လႆႈမၢတ်ႇၸဵပ်းၵႂႃႇ ၼၼ်ႉသမ်ႉ ၸိုဝ်ႈႁွင်ႉ ဢူးယႃၵေႃႉ ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈပလိၵ်ႈၶဝ် လႆႈပိုတ်ႇလိူင်ႈၸဝ်ႈႁိူၼ်းဝႆႉ တီႈႁူင်းပလိၵ်ႈၸႄႈဝဵင်းတႃႈၶီႈလဵၵ်း ၸွမ်းၼင်ႇပၵ်းပိူင် မၢႆမီႈဝၢၼ်ႈမိူင်းမီးၼၼ်ႉ ဝႃႈၼႆ။