(မွၵ်ႇမူဝ်ႁဵဝ်းၶမ်း သူင်ႇၶၢဝ်ႇ) ပၢင်ဢုပ်ႇဢူဝ်းၶူၼ်ႉၶႂႃႉ တွၼ်ႈၵၢၼ်သၽႃးၸိူဝ်ႉၸၢတ်ႈလႄႈ လွင်ႈၾၼ်(ယိူင်းဢၢၼ်း) ၾႅတ်ႊၻရႄႊ ၸတ်းႁဵတ်းတီႈ ဝဵင်းလူင်တူၼ်ႈတီး မီးၽူႈၶဝ်ႈႁူမ်ႈထွမ်ႇၸွမ်း 50 ပၢႆ။

ဝၼ်းတီႈ 28/1/2020 ယၢမ်းၵၢင်ၼႂ် 8 မူင်းၶိုင်ႈ ထိုင် 12 မူင်းၶိုင်ႈ ယူႇတီႈၸုမ်း PI (Pyidaungsu Institute) လႄႈ ၸုမ်း Joint Peace Fun ႁူမ်ႈၸတ်ႁဵတ်းပၢင်ဢုပ်ႇဢူဝ်းလၢတ်ႈၼႄ ၵၢၼ်ၶူၼ်ႉၶႂႃႉ ၸိုဝ်ႈႁူဝ်ၶေႃႈ ဢၼ်ဝႃႈ တွၼ်ႈၵၢၼ်သၽႃးၸိူဝ်ႉ ၸၢတ်ႈလႄႈ လွင်ႈၾၼ်ၾႅတ်ႊၻရႄႊ ၸတ်းႁဵတ်းတီႈႁူင်းႁႅမ်း Cherry Queen Hotel ဝဵင်းလူင်တူၼ်ႈတီး ၸိုင်ႈတႆးပွတ်း ၸၢၼ်း။

ၼႂ်းႁူဝ်ၶေႃႈၶူၼ်ႉၶႂႃႉၼၼ်ႉ တွၼ်ႈၼိုင်ႈ တွၼ်ႈၵၢၼ်မၢႆမီႈမိူင်းႁူမ်ႈတုမ်ၼႆႉ ႁႂ်းမီးႁႅင်းမႃးလိူဝ်ၵဝ်ႇလႄႈ ႁႂ်ႈဝူၼ်ႉပႃး လွင်ႈ ၶၵ်ႉတွၼ်ႈၽူႈ တႅၼ်းသၽႃးၸိူဝ်ႉၸၢတ်ႈ တွၼ်ႈတႃႇၵေႃႇသၢင်ႈမိူင်းႁူမ်ႈတုမ် ၾႅတ်ႊၻရႄႊ၊ ၻီႊမူဝ်ႊၶရေႊသီႊ မိူဝ်း ၼႃႈ။ ထႅင်ႈတွၼ်ႈ ၼိုင်ႈသမ်ႉ တွၼ်ႈၵၢၼ်ၸုမ်းယိပ်းၵွင်ႈၵၢင်ႇလႄႈ တၢင်းႁၼ်ထိုင်ၶဝ် ၸဵမ်ၸိူဝ်းၼႆႉ။

ၸၢႆးထုၼ်းဢွင်ႇလုၼ်ႇ ၽူႈၶူၼ်ႉၶႂႃႉၸုမ်း PI လၢတ်ႈဝႃႈ “ ၶၵ်ႉတွၼ်ႈလူင် 2 ဢၼ် ဢၼ်လႆႈ ဢုပ်ႇၵႂႃႇမိူဝ်ႈၼႆႉ ၶႃႈဝူၼ်ႉဝႃႈ ပဵၼ်လွင်ႈယႂ်ႇတႃႇမိူင်းႁူမ်ႈတုမ်၊ တႃႇၶၢဝ်းတၢင်းမိူဝ်းၼႃႈလႄႈ တႃႇလွင်ႈငမ်းယဵၼ်ယူႇ။ ႁဝ်းၶႃႈလႆႈၶူၼ်ႉ ၶႂႃႉဢွၵ်ႇမႃးၽိုၼ် လိၵ်ႈသွင်ၽိုၼ်ၼႆႉ ဢၼ်ၼိုင်ႈၵေႃႈ ပဵၼ်ၶၵ်ႉတွၼ်ႈၽူႈတႅၼ်းသၽႃးၸိူဝ်ႉၸၢတ်ႈလႄႈ ယိူင်းဢၢၼ်း ၾႅတ်ႊၻရႄႊ။ ၽူႈတႅၼ်းသၽႃးၸိူဝ်ႉၸၢတ်ႈၼႆႉသမ်ႉ ႁႄႉၵင်ႈပၼ် တႃႇဝၢၼ်ႈမိူင်းလႆႈမွၵ်ႈႁိုဝ်။ ယဝ်ႉၵေႃႈ မိူၼ်ၼင်ႇ ၼႃႈလိၼ်ၽွင်း ငမ်းတူဝ်ၵဝ်ႇ ၸိူဝ်းၼၼ်ႉလူး ၶဝ်သမ်ႉႁဵတ်းသင်ပၼ်လႆႈၽွင်ႈ ၸဵမ်ၸိူဝ်းၼႆႉ” ဝႃႈၼႆ။

ၼႂ်းပၢင်ဢုပ်ႇဢူဝ်းၶူၼ်ႉၶႂႃႉၼႆႉ လႆႈဢုပ်ႇၶႆႈၼႄ တွၼ်ႈတႃႇၶၵ်ႉတွၼ်ႈၵၢၼ်မိူင်းလႄႈ လွင်ႈႁူမ်ႇလူမ်ႈ ဢၼ်တေလႆႈဝူၼ်ႉ ပႃးတၢင်းႁၼ်ထိုင်ၸုမ်းယိပ်းၵွင်ႈၵၢင်ႇၸၢဝ်းၶိူဝ်း၊ လွင်ႈယုမ်ႇယမ်လႄႈ ၵႃႈၶၼ် ၸဵမ်ၸိူဝ်းၼႆႉသေ သပ်းလႅင်းလၢတ်ႈၼႄ ပႃးလွင်ႈၶူၼ်ႉၶႂႃႉ လွင်ႈၶိုၼ်ႈယႂ်ႇၸုမ်းလႄႈ လွင်ႈလႅၵ်ႈလၢႆႈၸုမ်း ၸိူဝ်းၼႆႉ။

ၸၢႆးထုၼ်းဢွင်ႇလုၼ်ႇ သိုပ်ႇလၢတ်ႈဝႃႈ “ ထႅင်ႈတွၼ်ႈၼိုင်ႈသမ်ႉ တွၼ်ႈၵၢၼ်ႁူမ်ႇလူမ်ႈၶႃႈ။ ၼႆႉၵေႃႈၵူၼ်းႁဝ်းႁၼ်ထိုင်ဝႃႈ ၵဵဝ်ႇၵပ်းၸုမ်းယိပ်းၵွင်ႈၵၢင်ႇၵူၺ်း။ ၵူၺ်းၵႃႈ ဢမ်ႇၸႂ်ႈၶႃႈ မိူၼ်ၼင်ႇ မိူင်းၶိုၼ်ႈယႂ်ႇ ၵၢပ်ႈပၢၼ်မႂ်ႇၼႆႉ ၶဝ်တေမီးပၼ် လွင်ႈ ႁူမ်ႇလူမ်ႈၼႂ်းမိူင်း ဢမ်ႇၼၼ် တွၼ်ႈၵၢၼ် ဢုပ်ႉပိူင်ႇပိုၼ်ႉတီႈ ဢၼ်ဢမ်ႇၸႂ်ႈလူင်ပွင်ၸိုင်ႈ ၸိူဝ်းၼႆႉ ၶဝ်သမ်ႉ ပၼ်လွင်ႈ ႁူမ်ႇလူမ်ႈၸိူင်ႉႁိုဝ်” ဝႃႈၼႆ။

မၼ်းၸၢႆးလၢတ်ႈဝႃႈ – ယိူင်းဢၢၼ်း ဢၼ်လႆႈၸတ်းႁဵတ်းပၢင်ဢုပ်ႇဢူဝ်းၶူၼ်ႉၶႂႃႉၼႆႉ ၶႂ်ႈႁႂ်ႈတွၼ်ႈၵၢၼ်မၢႆမီႈဢၼ်ယူႇတႂ်ႈ ပိူင်ငဝ်ႈပိုင်းမိူင်း 2008 ၼၼ်ႉ ႁႂ်ႈလီလိူဝ်ၵဝ်ႇ ၾႅတ်ႊၻရႄႊ မိူဝ်းၼႃႈၵေႃႈ ႁႂ်ႈလႆႈလီလိူဝ်ၵဝ်ႇ ဝႃႈၼႆ။

ၽူႈၶဝ်ႈႁူမ်ႈလူင်းပိုၼ်ႉတီႈ ၶူၼ်ႉၶႂႃႉၵေႃႉၼိုင်ႈ လၢတ်ႈၼႄဝႃႈ “ ဢၼ်ႁဝ်းၶႃႈ လႆႈၶူၼ်ႉၶႂႃႉၼႆႉ ပိူင်လူင်မၼ်း ၶၵ်ႉတွၼ်ႈ ၽူႈတႅၼ်းသၽႃးၸိူဝ်ႉၸၢတ်ႈ။ တွၼ်ႈတႃႇတေၶဝ်ႈႁႃလူင်ပွင်ၸိုင်ႈပိုၼ်ႉတီႈၼႆႉ တွင်ႈထၢမ်ၶဝ်တႄႉ ဢမ်ႇပေႃး မီးလွင်ႈ ယၢပ်ႇ၊ ၼႂ်းပိုၼ်ႉတီႈမိူင်းဢွၼ်ႇတႄႉငၢႆႈၶႃႈဢေႃႈ တႃႇၶဝ်ႈႁႃၽွင်းလူင်ၸၼ်ႉၸႄႈမိူင်းတႄႉ ယၢပ်ႇၶႃႈ။ ၾၢႆႇတၢင်တူဝ် တပ်ႉမတေႃႇၵေႃႈ ႁဝ်းၶႃႈယၢမ်ႈၶတ်းၸႂ်တႃႇတေတွင်ႈထၢမ်ၶဝ်ယူႇၵူၺ်းၵႃႈ ၶဝ်ဢမ်ႇပၼ်”ဝႃႈၼႆ။

ၼႂ်းပၢင်ဢုပ်ႇဢူဝ်းၶူၼ်ႉၶႂႃႉၼႆႉ မီးလူင်ပွင်ၸိုင်ႈၾၢႆႇၸၢဝ်းၶိူဝ်း၊ ၸုမ်းယိပ်းၵွင်ႈၵၢင်ႇ မိူၼ်ၼင်ႇ RCSS၊ SSPP၊ ၽူႈတႅၼ်း သၽႃး၊ ပႃႇတီႇတႆး၊ ပဢူဝ်း၊ တဢၢင်း၊ ၽူႈတႅၼ်းသၽႃးၵဝ်ႇလႄႈ ၸုမ်း EAO ၶဝ်မႃးၶဝ်ႈႁူမ်ႈ။