သွင်မႄႈလုၵ်ႈ တိူဝ်ႉၺႃးမၢၵ်ႇၵွင်ႈ လူႉတၢႆထင်တီႈ ၼႂ်းၵႄႈပၢင်တိုၵ်း တပ်ႉသိုၵ်းလူင်ပွင်ၸိုင်ႈမၢၼ်ႈတင်း တပ်ႉသိုၵ်း TNLA ၼႂ်းၸႄႈဝဵင်းၵျွၵ်ႉမႄး။
ဝၼ်းတီႈ 28/1/2020 ယၢမ်းဝၢႆးဝၼ်း 3 မူင်းပၢႆ ၼၢင်းသူၺ်ႇၸိင်ႇ လႄႈ လုၵ်ႈယိင်း ၼၢင်းၶမ်းဢိင်ႇ သွင်မႄႈလုၵ်ႈလႆႈၶမ် ၼႂ်းၵႄႈပၢင်တိုၵ်း တပ်ႉသိုၵ်းလူင်ပွင်ၸိုင်ႈမၢၼ်ႈတင်း တပ်ႉသိုၵ်း TNLA တီႈႁိမ်းဝၢၼ်ႈပၢင်မၢၵ်ႇမိုဝ်း ၸႄႈဝဵင်းၵျွၵ်ႉမႄး ၸိုင်ႈ တႆးပွတ်းႁွင်ႇ တိူဝ်ႉၺႃးမၢၵ်ႇၵွင်ႈ လႆႈလူႉတၢႆထင်တီႈ။
မၢႆးသေႃႇထုၼ်း ၸုမ်းတူင်ႉၼိုင်တူင်ႇဝူင်း ၸိုင်ႈတႆးပွတ်းႁွင်ႇ ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ပဵၼ်သွင်ၵေႃႉမႄႈလုၵ်ႈ။ မိူဝ်ႈဝႃးၼၼ်ႉ ၶဝ်ၵႂႃႇသူၼ်ၼဵင်ႈသေ ပွၵ်ႈမႃး လႆႈမႃးၶမ်ၼႂ်းၵႄႈပၢင်တိုၵ်းသေ ၶႃသွင် ၵေႃႉမႄႈ လုၵ်ႈ တိူဝ်ႉၺႃးမၢၵ်ႇၵွင်ႈ လူႉတၢႆတီႈၼၼ်ႈၵမ်းလဵဝ်” ဝႃႈၼႆ။
ၶဝ်သွင်ၵေႃႉ မႄႈလုၵ်ႈတႄႉ ပူၼ်ႉၶၢပ်ႈတူဝ်ၵႂႃႇတီႈပႃႇႁဵဝ်ႈ ဝၢၼ်ႈပၢင်မၢၵ်ႇမိုဝ်းယဝ်ႉ ဝႃႈၼႆ။
ၼၢင်းမူၺ်သႅင် ၵူၼ်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ ပေႃးပဵၼ်ပၢင်တိုၵ်းမႃးၸိုင် ဢၼ်လႆႈထူပ်းၺႃးၶၢမ်ႇယူႇတႄႉ ပဵၼ် ၼၢင်းယိင်းလႄႈ လုၵ်ႈဢွၼ်ႇၶႃႈယဝ်ႉ။ မိူဝ်ႈဝႃးၵေႃႈ သွင်မႄႈလုၵ်ႈ တိူဝ်ႉၺႃးမၢၵ်ႇသေ လႆႈလူႉတၢႆၵႂႃႇ။ တွၼ်ႈတႃႇ ၵူၼ်းၸၢႆးတႄႉ ၶဝ်ဢဝ်တူဝ်လွတ်ႈ။ တႃႇၼၢင်းယိင်း၊ ၵူၼ်းထဝ်ႈလႄႈ လုၵ်ႈဢွၼ်ႇတႄႉ ပၢႆႈယၢပ်ႇ” ဝႃႈၼႆ။
ယွၼ်ႉၼၼ် ႁိမ်းဝၢၼ်ႈၺွင်ႇမွင်း ၸႄႈဝဵင်းၵျွၵ်ႉမႄးၼၼ်ႉ မီးၸုမ်းယိပ်းၵွင်ႈၵၢင်ႇတူင်ႉၼိုင်ယူႇဝႆႉသေ တွၼ်ႈတႃႇ ၵူၼ်း ဝၢၼ်ႈဢမ်ႇလႆႈႁဵတ်းႁၢင်ႈႁႅၼ်း လုၵ်းထႅၼ်ႉ လုၵ်းပဵမ်ႇ တႃႇတေမူၵ်းပၢႆႈ ဢမ်ႇမီး။ ယွၼ်ႉၼၼ် သင်ပဵၼ်လႆႈ ပၢင်တိုၵ်းၼႆႉ ဢမ်ႇၶႂ်ႈႁႂ်ႈမႃးပဵၼ်တီႈႁိမ်းဝၢၼ်ႈၵူၼ်းယူႇ ၼၢင်းမူၺ်သႅင်တုၵ်းယွၼ်းလၢတ်ႈၼႄၵႂႃႇၼင်ႇၼႆ။
ႁွင်ႈၵၢၼ်ပိုၼ်ၽၢဝ်ႇ TNLA ၵေႃႈဢွၵ်ႇဝႆႉဝႃႈ မိူဝ်ႈဝႃး ယၢမ်းဝၢႆးဝၼ်း 3 မူင်းပၢႆၼၼ်ႉ တပ်ႉသိုၵ်းတဢၢင်း TNLA တင်း တပ်ႉ သိုၵ်းလူင်ပွင်ၸိုင်ႈမၢၼ်ႈ လႆႈပဵၼ်ပၢင်တိုၵ်းၵၼ် ႁိမ်းဝၢၼ်ႈပၢင်မၢၵ်ႇမိုဝ်း ဝႃႈၼႆ။
ၵဵဝ်ႇလူၺ်ႈလွင်ႈ ပၼ်ႁႃ ၼၢင်းသူၺ်ႇၸိင်ႇတင်းလုၵ်ႈယိင်း ၼၢင်းၶမ်းဢိင်ႇ လႆႈၺႃးမၢၵ်ႇၵွင်ႈလူႉတၢႆၵႂႃႇၼႆႉ ယူႇတီႈၸုမ်း ၶၢဝ်ႇၽူႈတွႆႇ ႁွၵ်ႈ တွင်ႈထၢမ်ၵပ်းသိုပ်ႇၵႂႃႇတီႈၽူႈၶၢၼ်ပၢၵ်ႇ TNLA လႄႈ တၢင်းၾၢႆႇပွင်ႇၶၢဝ်ႇ တပ်ႉသိုၵ်းလူင်ပွင်ၸိုင်ႈ မၢၼ်ႈၵေႃႈ ဢမ်ႇမီးလွင်ႈတုမ်ႉတွပ်ႇႁပ်ႉၾူၼ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ