ၽၵ်းတူ လႅၼ်လိၼ်တႆး – ၶႄႇ တၢင်းပွတ်းမူႇၸေႊ ဢမ်ႇဢိုတ်း ပိုတ်ႇပၼ်ၵူၼ်းၶဝ်ႈဢွၵ်ႇ မိူၼ်ပၵ်းၵဝ်ႇပိူင်ၵဝ်ႇၵူၺ်း ၽူႈ တႅၼ်းသၽႃး မူႇၸေႊလၢတ်ႈ။
ဝၼ်းတီႈ 28/1/2020 ၵူၼ်းမိူင်းလႄႈ ၸဝ်ႈၼႃႈတီႈၾၢႆႇၵဵဝ်ႇၶွင်ႈ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇၸတ်းႁဵတ်းပၢင် ၵုမ်ၶိုၵ်ႉၶၵ်ႉ ဢုပ်ႇဢူဝ်းၵၼ် ၸွင်ႇတေဢိုတ်းၽၵ်းတူ ၶဝ်ႈဢွၵ်ႇမိူင်းႁႃႉ ဢမ်ႇဢိုတ်း။ လႆႈၸႂ်တူၵ်းလူင်းၵၼ်ဝႃႈ တေဢမ်ႇ ဢိုတ်း တေပိုတ်ႇပၼ်ၵူၼ်းမိူင်းၶဝ်ႈဢွၵ်ႇၵႂႃႇမႃး မိူၼ်ၵဝ်ႇၵူၺ်း ဝႃႈၼႆ။
ၸၢႆးၵျေႃႇတဵင်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ (1) ၸႄႈဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ တေႃႈ လဵဝ်ၼႆႉ တီႈၽၵ်းတူ တၢင်းသွင်ၾင်ႇတႄႉ ဢမ်ႇဢိုတ်းၶႃႈ။ ႁဵတ်းသင်လႄႈဝႃႈ ဢမ်ႇဢိုတ်းၼႆ ၵွပ်ႈပိူဝ်ႈဝႃႈ တၢင်းၾင်ႇ မိူင်းၶႄႇၼၼ်ႉ တေႃႈလဵဝ် ပဵၼ်ပီမႂ်ႇၶႄႇၶဝ်သေ ၶဝ်ဢိုတ်းႁူင်းၵၢၼ်ၶဝ်ဝႆႉ ၵမ်းၼႆႉ ၵူၼ်းမိူင်းႁဝ်း ဢၼ်ၵႂႃႇႁဵတ်းၵၢၼ် တၢင်းၾင်ႇပုၼ်ႉ ဢွၼ်ၵၼ်ပွၵ်ႈမႃး။ ယွၼ်ႉၼၼ် ႁဝ်းၶႃႈပိုတ်ႇၽၵ်းတူဝႆႉ ႁႂ်ႈၵူၼ်းမိူင်းႁဝ်း လႆႈၶဝ်ႈမႃးပဵၼ် တၢင်းၵၢၼ် သေ ႁဝ်းၶႃႈတေလႆႈၵူတ်ႇထတ်း ပၢႆးယူႇလီၶဝ်လႆႈလီလီ” ဝႃႈၼႆ။
ၽၵ်းတူၶဝ်ႈဢွၵ်ႇမိူင်း မိူင်းၶႄႇ လႄႈ မိူင်းတႆး တီႈမူႇၸေႊၼႆႉ တင်းမူတ်းပိုတ်ႇဝႆႉ မီးသၢမ်တီႈ၊ မိူၼ်ၼင်ႇ ၽၵ်းတူ ၸၢင်ႉ ၽိူၵ်ႇ၊ ၽၵ်းတူလူင်ႁေႃၶမ်းလႄႈ ၽၵ်းတူမၢၼ်ႈဝဵင်း ၸိူဝ်းၼႆႉ။ တေႃႈလဵဝ် ၵူၼ်းမိူင်းၶႄႇတႄႉ ဢမ်ႇၶၢမ်ႈမႃးဢႅဝ်ႇတၢင်း ၾင်ႇမူႇၸေႊယဝ်ႉ။
ၸၢႆးၵျေႃႇတဵင်း သိုပ်ႇလၢတ်ႈထႅင်ႈဝႃႈ “ တၢင်းၾင်ႇမူႇၸေႊႁဝ်းၶႃႈၼႆႉ ၶႄႇၶဝ် ဢမ်ႇမႃး၊ ယွၼ်ႉဝႃႈ တၢင်းမိူင်းၶႄႇ ၵေႃႈ ပဵၼ်ပီမႂ်ႇၶႄႇၶဝ်ၵေႃႈၸႂ်ႈ။ ယဝ်ႉၵေႃႈ တၢင်းပဵၼ်ဝႆးရတ်ႊသ်ၵေႃႈပိူင်ၼိုင်ႈသေ မီးပီႈၼွင်ႉတႆးႁဝ်း ယွမ်ႇတႂ်ႈတၢင်း မိူင်းၶႄႇ ၸိူဝ်းၼၼ်ႉ ၶဝ်ၶဝ်ႈမႃးၶၢႆၽၵ်းၶဵဝ် တၢင်းမူႇၸေႊႁဝ်းၶႃႈတႄႉ မီးယူႇၶႃႈ” ဝႃႈၼႆ။
ၽၵ်းတူၶဝ်ႈဢွၵ်ႇတၢင်းလႅၼ်လိၼ် တႆး – ၶႄႇ တီႈမူႇၸေႊ 3 ၽၵ်းတူၼၼ်ႉ ၼိုင်ႈဝၼ်းလႂ် မီးၵူၼ်းၶဝ်ႈဢွၵ်ႇၵႂႃႇမႃး ဢမ်ႇ ယွမ်း ၼိုင်ႈမိုၼ်ႇၵေႃႉ။ တေႃႈလဵဝ် ၵူၼ်းမိူင်းၶဝ်ႈဢွၵ်ႇၵႂႃႇမႃး တင်းသွင်ၾင်ႇတႄႉ တေႃႇဝၼ်းတေမီးမွၵ်ႈ 2-3 ပၢၵ်ႇ ဝႃႈၼႆ။
ၼွၵ်ႈလိူဝ်ၼၼ်ႉ ၽၵ်းတူၸွမ်းလႅၼ်လိၼ်တႆး – ၶႄႇ မိူၼ်ၼင်ႇ တၢင်းပွတ်းပၢင်ႇသၢႆး၊ ၼမ်ႉၶမ်း၊ မိူင်းၵူဝ်း၊ ၵျိၼ်ႊသၢၼ်း ၵျေႃႉ (သၢမ်ၸဵင်ႇၶမ်း)၊ ၸၢင်ႉၽိူၵ်ႇ၊ ၽၵ်းတူႁေႃၶမ်းလူင်လႄႈ မၢၼ်ႈပဵင်း ၸိူဝ်းၼႆႉတႄႉ ပိုတ်ႇဝႆႉပဵၼ်တၢင်းၵၢၼ် ၶဝ်ႈ ဢွၵ်ႇၵႂႃႇမႃး မိူၼ်ၵဝ်ႇယူႇ ဝႃႈၼႆ။
